Month: May 2023

ഐപിഎൽ പതിനാറാം സീസണിന്റെ ഒന്നാം ക്വാളിഫയർ മത്സരത്തിൽ നിലവിലെ ചാമ്പ്യന്മാരായ ഗുജറാത്തിനെ 15 റൺസിന് പരാജയപ്പെടുത്തി, ചെന്നൈ തങ്ങളുടെ പത്താം ഐപിഎൽ ഫൈനലിലേക്ക് യോഗ്യത നേടി. ആർത്തിരമ്പിയ ചെന്നൈ കാണികളുടെ മുൻപിൽ പ്ലേഓഫ് കളിക്കാൻ കഴിഞ്ഞ ആനുകൂല്യത്തിൽ മികച്ച പ്രകടനം പുറത്തെടുത്ത അവർ, ടേബിൾ ടോപ്പേഴ്സായി എത്തിയ ഗുജറാത്തിനെ നിഷ്പ്രഭമാക്കി.

മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ചെന്നൈ, ഓപ്പണർമാരായ ഗെയ്ക്‌വാദിന്റെയും(60) കോൺവെയുടെയും(40) മികവിൽ ഭേദപ്പെട്ട തുടക്കം കുറിക്കുകയും, രഹാനെ, അമ്പാട്ടി റായിഡു, ജഡേജ എന്നിവരുടെ ചെറുസംഭാവനകളും കൂടിയായപ്പോൾ, അത്യാവശ്യം നല്ല സ്കോർ കണ്ടെത്തുകയും ചെയ്തു. മറുപടി ബാറ്റിങ്ങിൽ ഒരുവശത്ത് വിക്കറ്റുകൾ വീണുകൊണ്ടിരുന്നപ്പോഴും 42 റൺസുമായി പൊരുതിയത്, കഴിഞ്ഞ രണ്ട് മത്സരങ്ങളിലും സെഞ്ചുറി നേടിയ ഓപ്പണർ ഗിൽ ആയിരുന്നു.

പേസർ ദീപക് ചഹാറിന്റെ പന്തിൽ

ഗിൽ പുറത്താകുമ്പോൾ സ്കോർ 13.1 ഓവറിൽ 88/5. അതോടെ ചെന്നൈ ആരാധകർ ആഘോഷം തുടങ്ങി. പക്ഷേ പിന്നീടെത്തിയ റാഷിദ് ഖാൻ വിട്ടുകൊടുക്കാൻ തയ്യാറായില്ല. 16 പന്തിൽ 3 ഫോറും 2 സിക്സും അടക്കം 30 റൺസെടുത്ത അദ്ദേഹം, വമ്പനടികൾ തുടങ്ങിയതോടെ ചെന്നൈ ഗാലറി പതിയെ നിശബ്ദമായി തുടങ്ങിയിരുന്നു. അത്രയും മികച്ച ഫോമിൽ നിൽക്കുന്ന താരമാണ് അദ്ദേഹം, മത്സരം ഒറ്റയ്ക്ക് പിടിച്ചെടുക്കാൻ കഴിവുള്ള താരം.

പക്ഷേ ചെന്നൈ നായകൻ ധോണിയൊരുക്കിയ കെണിയിൽ റാഷിദ് ഖാൻ വീണുപോകുകയായിരുന്നു. തുഷാർ ദേശ്പാണ്ഡെ എറിഞ്ഞ പത്തൊമ്പതാം ഓവറിന്റെ മൂന്നാം പന്തിലാണ് അദ്ദേഹം പുറത്താകുന്നത്. തുടർച്ചയായി ഓഫ് സ്റ്റമ്പിനു വെളിയിൽ എറിയാൻ, ധോണി ബോളർക്ക് നിർദേശം നൽകുകയായിരുന്നു. ആദ്യ പന്തിൽ പക്ഷേ, എക്സ്ട്രാ കവറിലൂടെ അദ്ദേഹം ബൗണ്ടറി നേടിയെങ്കിലും, അതേ പന്ത് തന്നെ എറിയാൻ ധോണി പറഞ്ഞു. ഓഫ് സ്റ്റമ്പിന് വെളിയിൽ വൈഡ് ലൈനിനോട് ചേർന്നെറിഞ്ഞ രണ്ടാം പന്തിൽ റാഷിദ് ഖാന് ഒന്നും ചെയ്യാൻ കഴിഞ്ഞില്ല.

ഒടുവിൽ അതേ ലൈനിൽ ലോ ഫുൾടോസായി വന്ന അടുത്ത പന്തിൽ ആഞ്ഞുവീശിയ റാഷിദ് നോക്കുമ്പോൾ, പന്ത് നേരെ ഡീപ് പോയിന്റ് ബൗണ്ടറിയിൽ കാവൽനിന്നിരുന്ന ഡെവോൺ കോൺവെയുടെ കൈകളിൽ ഭദ്രം. അന്നേരം ചെന്നൈ ഡഗ്ഔട്ട് ഒന്നടങ്കം വിക്കറ്റ് നേട്ടം ആഘോഷിക്കുന്ന കാഴ്ചയാണ് കാണാൻ കഴിഞ്ഞത്. അവരുടെ കോച്ചിംഗ് സ്റ്റാഫിൽ ഉൾപ്പെട്ട മുൻ ചെന്നൈ താരവുമായ ഡ്വൈൻ ബ്രാവോ, തന്റെ പ്രതാപകാലത്തെ ഓർമിപ്പിക്കുംവിധം ബൗണ്ടറിലൈനിൽ തുള്ളിച്ചാടി ആഘോഷിക്കുന്ന ദൃശ്യങ്ങളും ഇന്റർനെറ്റിൽ തരംഗമായി.

തങ്ങളുടെ ഹോംഗ്രൗണ്ടായ ചെപ്പോക്‌ സ്റ്റേഡിയത്തിൽ നടന്ന ഐപിഎൽ പ്ലേഓഫിലെ ആദ്യ ക്വാളിഫയർ മത്സരത്തിൽ, ഗുജറാത്തിനെ തകർത്ത ചെന്നൈ സൂപ്പർ കിംഗ്സ് കലാശപോരാട്ടത്തിന് യോഗ്യത നേടിയിരിക്കുകയാണ്. ടേബിൾ ടോപ്പേഴ്‌സായി എത്തിയ ഗുജറാത്ത്, 15 റൺസിനാണ്‌ ചെന്നൈയോട് അടിയറവ് പറഞ്ഞത്. ചെന്നൈയുടെ പത്താം ഐപിഎൽ ഫൈനലാണ് ഇത്. ബുധനാഴ്ച നടക്കുന്ന മുംബൈ – ലഖ്നൗ എലിമിനേറ്റർ മത്സരത്തിലെ വിജയികളെ, രണ്ടാം ക്വാളിഫയർ മത്സരത്തിൽ നേരിടുന്ന ഗുജറാത്തിന് ഫൈനലിലേക്ക് യോഗ്യത നേടാൻ ഒരവസരം കൂടിയുണ്ട്.

മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ചെന്നൈ നിശ്ചിത 20 ഓവറിൽ 7 വിക്കറ്റ് നഷ്ടത്തിൽ നേടിയത് 172 റൺസ്. ഗുജറാത്ത് 20 ഓവറിൽ 157 റൺസിൽ എല്ലാവരും പുറത്തായി. 42 റൺസെടുത്ത ഗില്ലിനും 30 റൺസെടുത്ത റാഷിദ് ഖാനും ഒഴികെ മറ്റാർക്കും ചെന്നൈ ബോളിങ് നിരയ്ക്ക്‌ മുന്നിൽ പിടിച്ചു നിൽക്കാൻ കഴിഞ്ഞില്ല. നേരത്തെ ആദ്യ ബാറ്റിങ്ങിൽ ചെന്നൈയ്ക്ക് വേണ്ടി 60 റൺസെടുത്ത ഓപ്പണർ ഋതുരാജ് ഗേയ്ക്വാദ്‌ കളിയിലെ താരമായി തിരഞ്ഞെടുക്കപ്പെട്ടു. മറ്റൊരു ഓപ്പണർ കോൺവെ 40 റൺസും, അവസാന ഓവറുകളിൽ ആഞ്ഞടിച്ച ജഡേജ 16 പന്തിൽ 22 റൺസും നേടിയിരുന്നു.

മത്സരശേഷമുള്ള പ്രസന്റേഷൻ ചടങ്ങിന്റെ സമയത്ത് അവതാരകനായ ഹർഷ ഭോഗ്ലെ, ചെന്നൈ നായകൻ ധോണിയോട് ഒരു ചോദ്യം ചോദിച്ചു. ഇനി ഒരിക്കൽക്കൂടി താങ്കൾ ഈ ചെന്നൈയിലെ മൈതാനത്ത് കളിക്കാൻ ഇറങ്ങുമോയെന്ന്. ചെന്നൈ ഫാൻസ് മാത്രമല്ല, ലോകമെമ്പാടും ഉള്ള ധോണി ആരാധകർക്ക് അറിയാൻ ആകാംഷയുള്ള കാര്യം. അതിനുള്ള മറുപടിയായി ധോണി പറഞ്ഞത്, എനിക്ക് അത് ഉറപ്പുപറയാൻ പറ്റില്ല എന്നാണ്. കാരണം ഇനി ഡിസംബറിൽ നടക്കാൻ പോകുന്ന മിനിലേലത്തിന് 8-9 മാസത്തോളം സമയമുണ്ട്.

അതുകൊണ്ട് ഞാൻ ഇപ്പോൾതന്നെ അടുത്ത സീസൺ ആലോചിച്ച് തല പുകയ്ക്കേണ്ട ആവശ്യമുണ്ടെന്ന് തോന്നുന്നില്ല, കാരണം അതിന് ഇഷ്ടം പോലെ സമയമുണ്ട്. ഞാൻ എപ്പോഴും ചെന്നൈയുടെ കൂടെ ഉണ്ടാകുമെന്ന കാര്യത്തിൽ എനിക്ക് ഉറപ്പുതരാൻ കഴിയും. അത് ചിലപ്പോൾ പ്ലയിംഗ് ഇലവനിൽ ആകാം, അല്ലെങ്കിൽ മൈതാനത്തിന് പുറത്ത് ഇരുന്നുകൊണ്ടാകാം. എന്തായാലും തീരുമാനമെടുക്കാൻ ഇനിയും സമയമുണ്ട്, എന്നാണ് ധോണി വ്യക്തമാക്കിയത്.

ഐപി‌എൽ പതിനാറാം സീസണിലെ ഒന്നാം ക്വാളിഫയർ മത്സരത്തിൽ ചെന്നൈയ്ക്കേതിരെ ഗുജറാത്ത് ടൈറ്റൻസിന് 173 റൺസ് വിജയലക്ഷ്യം. ചെന്നൈ ചെപ്പൊക്ക്‌ സ്റ്റേഡിയത്തിൽ നടക്കുന്ന പോരാട്ടത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ചെന്നൈ നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 172 റൺസാണ് നേടിയത്. ഓപ്പണർമാരായ ഗെയ്ക്വാദ് 60 റൺസും കോൺവെ 40 റൺസും എടുത്തു ടോപ് സ്കോറർമാരായി. ജഡേജ 16 പന്തിൽ 22 റൺസ് നേടി.

മറുപടി ബാറ്റിങ്ങിൽ 13 ഓവറിൽ 88 റൺസിൽ ഗുജറാത്തിന്റെ 5 മുൻനിര വിക്കറ്റുകൾ വീഴ്ത്തിയ ചെന്നൈ സൂപ്പർ കിംഗ്സ് മത്സരത്തിൽ പിടിമുറുക്കിയിരിക്കുകയാണ്. സാഹ 12 റൺസും നായകൻ പാണ്ഡ്യ 8 റൺസും എടുത്തു മടങ്ങിയപ്പോൾ, ഒരറ്റത്ത് ഗിൽ മാത്രം പിടിച്ചുനിന്നു. അതിനുശേഷം എത്തിയ ശനക 17 റൺസും മില്ലർ വെറും 4 റൺസും എടുത്തു പുറത്തായി. ഒടുവിൽ 38 പന്തിൽ 42 റൺസെടുത്ത ഗില്ലും പുറത്ത്.

പേസർ ദീപക് ചഹർ എറിഞ്ഞ പതിനാലാം ഓവറിന്റെ ആദ്യ പന്തിൽ പുൾഷോട്ട് കളിക്കാൻ ശ്രമിച്ച അദ്ദേഹം, ഫൈൻ ലെഗ് ബൗണ്ടറിയിൽ ക്യാച്ചെടുത്ത് പുറത്താവുകയാണ് ഉണ്ടായത്. തൊട്ടടുത്ത പന്തിൽ ഒരു രസകരമായ നിമിഷം അരങ്ങേറിയിരുന്നു. പന്ത് എറിയാൻ ഓടിയെത്തിയ ചഹർ, അത് നോൺസ്ട്രൈക്കർ എൻഡിലെ വിക്കറ്റിൽ കൊള്ളിക്കുകയായിരുന്നു. പക്ഷേ അവിടെ നിൽപ്പുണ്ടായിരുന്ന വിജയ് ശങ്കർ ക്രീസിൽ നിന്നും മുന്നോട്ട് കയറിപ്പോയിരുന്നില്ല. തെല്ല് ജാള്യതയോടെ ചാഹർ തിരികെ പന്തെറിയാൻ മടങ്ങുമ്പോൾ, ചെന്നൈ നായകൻ ധോണിയ്ക്കും ചിരിയടക്കാൻ കഴിയാതെ നിൽക്കുന്ന കാഴ്ച.

ചെന്നൈ ചെപ്പോക്ക്‌ സ്റ്റേഡിയത്തിൽ നടക്കുന്ന പതിനാറാം ഐപിഎൽ സീസൺ പ്ലേഓഫിലെ ആദ്യ ക്വാളിഫയർ മത്സരം പുരോഗമിച്ചുകൊണ്ടിരിക്കുകയാണ്. മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ചെന്നൈ നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 172 റൺസാണ് നേടിയത്. വേഗം കുറഞ്ഞ പിച്ചിൽ റൺസ് കണ്ടെത്തൽ ബുദ്ധിമുട്ടേറിയതായിരുന്നു. 60 റൺസെടുത്ത ഋതുരാജ്‌ ഗായക്വദ് ടോപ് സ്കോററായി. ഒന്നാം വിക്കറ്റിൽ ഗായക്വാദും 40 റൺസെടുത്ത കോൺവെയും 87 റൺസിന്റെ കൂട്ടുകെട്ട് സൃഷ്ടിച്ചു.

പിന്നീടെത്തിയ ശിവം ധൂബെ 1 റൺസും, രഹാനെയും റായിടുവും 17 റൺസ് വീതവും എടുത്തു പുറത്തായി. അവസാന ഓവറുകളിൽ ആഞ്ഞടിച്ച ജഡേജയുടെ മികവിൽ ചെന്നൈ പൊരുതാവുന്ന ടോട്ടലിൽ എത്തിച്ചേർന്നു. 16 പന്തിൽ 22 റൺസ് നേടിയ അദ്ദേഹം ഇന്നിങ്സിന്റെ അവസാന പന്തിൽ ആയിരുന്നു പുറത്തായത്. മൊയീൻ അലി 4 പന്തിൽ 9 റൺസോടെ പുറത്താകാതെ നിന്നു. നായകൻ ധോണി 2 പന്തിൽ 1 റൺ മാത്രം എടുത്ത് നിരാശപ്പെടുത്തി.

അതിനിടെ മത്സരത്തിൽ അമ്പാട്ടി റായിഡു ഒരു റൺഔട്ടിൽ നിന്നും രക്ഷപ്പെട്ട സമയത്ത്, ഗാലറിയിൽ പേടിയോടെ നോക്കിക്കാണുന്ന ഒരു ചെന്നൈ ആരാധികയുടെ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറൽ ആയി മാറിയിരിക്കുന്നത്. പതിനാറാം ഓവറിന്റെ അവസാന പന്തിൽ ഷമിയുടെ കിടിലൻ യോർക്കർ. ഓഫ് സൈഡിലേക്ക് തട്ടിയിട്ട റായിഡു, സിംഗിൾ എടുക്കാനായി ഓടി. പക്ഷേ എക്സ്ട്രാ കവറിൽ നിന്നിരുന്ന ഗുജറാത്ത് നായകൻ പാണ്ഡ്യ പന്ത് പറന്നുപിടിച്ച് ത്രോ ചെയ്യുന്നു. പക്ഷേ ഭാഗ്യത്തിന് അത് വിക്കറ്റിൽ കൊള്ളാതെ പോകുന്നു. അന്നേരമാണ് ഗാലറിയിൽ ആ യുവതി ഭയത്തോടെ നോക്കി നിന്നുപോയത്. ഒടുവിൽ വിക്കറ്റ് പോയില്ല എന്ന ആശ്വാസവും.

ഐപിഎൽ ക്രിക്കറ്റ് ടൂർണമെന്റ് അതിന്റെ പതിനാറ് സീസണുകൾ പിന്നിടുമ്പോൾ, ഒരു ട്രോഫിയ്ക്കായുള്ള റോയൽ ചലഞ്ചേഴ്സ് ബംഗളൂരുവിന്റെ കാത്തിരിപ്പ് ഇനിയും നീളും. ഇന്നലെ ചിന്നസ്വാമി സ്റ്റേഡിയത്തിൽ നടന്ന മത്സരത്തിൽ ജയിച്ചാൽ പ്ലേഓഫിൽ കടക്കാമെന്ന അവരുടെ മോഹങ്ങളെ തട്ടിത്തെറിപ്പിച്ച്, ഗുജറാത്ത് ടൈറ്റൻസ് ആധികാരികവിജയം നേടിയിരുന്നു. ടേബിൾടോപ്പേഴ്സായി പ്ലേഓഫിൽ എത്തിയ അവർ, ചൊവ്വാഴ്ച നടക്കുന്ന ആദ്യ ക്വാളിഫയർ മത്സരത്തിൽ ചെന്നൈയെ നേരിടും.

ഇന്നലെ നടന്ന പോരാട്ടത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ബംഗളൂരു, വിരാട് കോഹ്‌ലിയുടെ ഏഴാം ഐപിഎൽ സെഞ്ചുറിയുടെ മികവിൽ നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 197 റൺസാണ് നേടിയത്. ഓപ്പണർ ശുഭ്മൻ ഗില്ലിന്റെ സെഞ്ചുറിയിലൂടെ തിരിച്ചടിച്ച ഗുജറാത്ത്, നാല് വിക്കറ്റ് നഷ്ടത്തിൽ 19.1 ഓവറിൽ വിജയലക്ഷ്യം മറികടന്നു. അർദ്ധസെഞ്ചുറി നേടിയ വിജയ് ശങ്കർ മികച്ച പിന്തുണ നൽകി. ഗിൽ തന്നെയാണ് കളിയിലെ താരമായി തിരഞ്ഞെടുക്കപ്പെട്ടത്.

മത്സരത്തിൽ തകർപ്പൻ സെഞ്ചുറി നേടിയിട്ടും തന്റെ ടീം മോശം ബോളിങ്ങിൽ പരാജയപ്പെടുന്നത് ഡഗ്ഔട്ടിൽ ഇരുന്ന വിരാട് കോഹ്‌ലി നിരാശയോടെയാണ് നോക്കിക്കണ്ടത്. ഫീൽഡിംഗ് സമയത്ത് ഒരു ക്യാച്ച് എടുക്കുന്നതിനിടയിൽ കാൽമുട്ടിനു പരുക്കേറ്റ അദ്ദേഹം, ശേഷിച്ച സമയം ഡഗ്ഔട്ടിൽ ഇരുന്നാണ് കളി കണ്ടത്. അവസാന ഓവറിൽ ആദ്യ പന്തിൽ ഫ്രീഹിറ്റ് ആകുകയും, അതിൽ സിക്സ് പറത്തി സെഞ്ചുറിനേട്ടവും ടീമിന്റെ വിജയവും ഗിൽ നേടിയെടുത്തു.

ദേഷ്യവും സങ്കടവും ഒന്നിച്ചുവന്ന ആ നിമിഷത്തിൽ വിരാട് കോഹ്‌ലിയ്‌ക്ക് തന്റെ ശാന്തത നഷ്ടപ്പെടുന്നത് കാണാൻ കഴിഞ്ഞു. തന്റെ കയ്യിലിരുന്ന വെള്ളംകുപ്പി താഴേക്ക് വലിച്ചെറിഞ്ഞാണ് കോഹ്‌ലി അരിശം തീർത്തത്. കണ്ണുകൾ ദുഃഖഭാരത്താൽ കലങ്ങിയിരിക്കുന്നതും കാണാമായിരുന്നു. എങ്കിലും ഇതൊക്കെ അല്പസമയത്തേക്ക്‌ മാത്രമേ ഉണ്ടായുള്ളൂ. അതുകഴിഞ്ഞ് തലയുയർത്തി മൈതാനത്തിലേക്ക് ഇറങ്ങിയ കോഹ്‌ലി, ഗുജറാത്ത് താരങ്ങളെ അഭിനന്ദിക്കുകയും ചിന്നസ്വാമിയിലെ കാണികൾക്ക് നന്ദി പറയുകയും ചെയ്തു.

ഐപിഎൽ സീസണിലെ അവസാന ലീഗ് മത്സരത്തിൽ, ഇന്നലെ ബംഗളൂരുവിന്റെ വിജയത്തിനായി ചിന്നസ്വാമി സ്റ്റേഡിയത്തിൽ ആർപ്പുവിളിച്ച ആയിരക്കണക്കിന് ആരാധകരെ നിരാശരാക്കി, ഗുജറാത്ത് ടൈറ്റൻസ് 6 വിക്കറ്റിന്റെ തകർപ്പൻ വിജയം സ്വന്തമാക്കിയിരുന്നു. ജയിച്ചാൽ പ്ലേഓഫ് എന്ന ഒറ്റലക്ഷ്യവുമായി ഇറങ്ങിയ ബംഗളൂരു, ടോസ് നഷ്ടപ്പെട്ട് ആദ്യം ബാറ്റിങ്ങിന് അയയ്ക്കപ്പെട്ടു. ഏഴാം ഐപിഎൽ സെഞ്ചുറി നേടിയ വിരാട് കോഹ്‌ലിയുടെ മികവിൽ അവർ നിശ്ചിത 20 ഓവറിൽ 197/5 എന്ന തരക്കേടില്ലാത്ത സ്കോർ കണ്ടെത്തി.

എന്നാൽ മറുപടി ബാറ്റിങ്ങിൽ ഓപ്പണർ ശുഭ്മാൻ ഗില്ലിന്റെ സെഞ്ചുറിയിലൂടെ ഗുജറാത്ത് തിരിച്ചടിച്ചപ്പോൾ, ബംഗളൂരുവിന് നോക്കിനിൽക്കാനേ കഴിഞ്ഞുള്ളൂ. 19.1 ഓവറിൽ 4 വിക്കറ്റ് നഷ്ടത്തിൽ അവർ വിജയലക്ഷ്യം മറികടന്നു. മൂന്നാമനായി ഇറങ്ങിയ വിജയ് ശങ്കർ അർദ്ധസെഞ്ചുറി പ്രകടനത്തോടെ ഗില്ലിന്‌ മികച്ച കൂട്ടായി. ബംഗളൂരുവിന്റെ പരാജയത്തോടെ 16 പോയിന്റുളള മുംബൈ ഇന്ത്യൻസ് നാലാം സ്ഥാനക്കാരായി പ്ലേഓഫിലേക്ക് മുന്നേറി.

ഈ സീസൺ ഗില്ലിന്റെ ഏറ്റവും മികച്ച സീസൺ ആയാണ് വിലയിരുത്തപ്പെടുന്നത്. ഈ കലണ്ടർ വർഷത്തിൽ ടെസ്റ്റ് സെഞ്ച്വറിയും, ഏകദിനത്തിൽ ഇരട്ടസെഞ്ചുറിയും, അന്താരാഷ്ട്ര ട്വന്റി ട്വന്റിയിലും സെഞ്ചുറി നേടിയിരുന്ന ഗില്ലിന് ഐപിഎൽ സെഞ്ചുറി മാത്രം ഒഴിഞ്ഞുനിൽക്കുകയായിരുന്നു. ഒരുപാട് മത്സരങ്ങളിൽ തൊണ്ണൂറുകളിൽ അദ്ദേഹം പുറത്തായി. സീസണിന്റെ തുടക്കത്തിൽ അത്തരമൊരു മത്സരത്തിൽ സെഞ്ചുറി മിസ് ആയപ്പോൾ അദ്ദേഹം പറഞ്ഞൊരു വാചകമുണ്ടായിരുന്നു. ഇനിയും ഒരുപാട് മത്സരങ്ങൾ സീസണിൽ കിടക്കുകയല്ലെ, സെഞ്ചുറി നേടാൻ ഇനിയും സമയമുണ്ട് എന്ന്.

ലഖ്നൗ സൂപ്പർ ജയന്റ്‌സിനെതിരെ നടന്ന മത്സരത്തിൽ വീണ്ടും 94 റൺസിൽ നോട്ടൗട്ട്‌. എന്നാൽ സൺറൈസേഴ്സ് ഹൈദരാബാദിനെതിരെ നടന്ന കഴിഞ്ഞ മത്സരത്തിൽ ഒടുവിൽ സെഞ്ചുറിനേട്ടം പൂർത്തിയാക്കി അദ്ദേഹം കളിയിലെ താരമായി. ഇന്നലെ വീണ്ടും ഒരിക്കൽകൂടി സെഞ്ചുറിയും കളിയിലെ താരവും. ധവാനും, ബട്ട്ലർക്കും, ഇന്നലെ കോഹ്‌ലിയ്‌ക്കും ശേഷം തുടർച്ചയായ മത്സരങ്ങളിൽ സെഞ്ചുറി നേടുന്ന നാലാമത്തെ മാത്രം താരവുമായി ഗിൽ മാറി. ഇന്നലെ 52 പന്തിൽ നിന്നും 5 ഫോറും 8 സിക്‌സുമടക്കം 104 റൺസോടെ പുറത്താകാതെ നിൽക്കുകയായിരുന്നു അദ്ദേഹം.

സെഞ്ചുറി ഇന്നിങ്സ് വീഡിയോ..

പ്ലേഓഫ് മോഹങ്ങളുമായി ബംഗളൂരു ചിന്നസ്വാമി സ്റ്റേഡിയത്തിൽ ഗുജറാത്തിനെ നേരിട്ട റോയൽ ചലഞ്ചേഴ്സിന് സങ്കടത്തോടെ മടക്കം. വിരാട് കോഹ്‌ലിയുടെ സെഞ്ചുറിയ്‌ക്ക് ശുഭ്മൻ ഗില്ലിന്റെ സെഞ്ചുറിയിലൂടെ മറുപടി നൽകിയ ഗുജറാത്ത് 20 പോയിന്റോടെ ഒന്നാം സ്ഥാനക്കാരായി പ്ലേഓഫിലേക്ക് മാർച്ച് ചെയ്തു. ഇതോടെ 16 പോയിന്റുള്ള മുംബൈ ഇന്ത്യൻസ് നാലാം സ്ഥാനക്കാരായി പ്ലേഓഫിലെത്തി. തോൽവിയോടെ ബംഗളൂരു രാജസ്ഥാനും പിന്നിൽ ആറാം സ്ഥാനത്തേക്ക് പിന്തള്ളപ്പെട്ടു.

മത്സരത്തിൽ ടോസ് നേടിയ ഗുജറാത്ത് ബംഗളൂരുവിനെ ബാറ്റിങ്ങിന് അയയ്ക്കുകയായിരുന്നു. 61 പന്തിൽ 101 റൺസോടെ പുറത്താകാതെ നിന്ന വിരാട് കോഹ്‌ലിയുടെ മികവിൽ അവർ നിശ്ചിത 20 ഓവറിൽ 197/5 എന്ന ടോട്ടൽ കണ്ടെത്തി. ഏഴാം ഐപിഎൽ സെഞ്ചുറി നേടിയ അദ്ദേഹം, ഐപിഎൽ ചരിത്രത്തിലെ ഏറ്റവും കൂടുതൽ സെഞ്ചുറി നേടുന്ന താരമായി. മറുപടി ബാറ്റിങ്ങിൽ അർദ്ധസെഞ്ചുറി നേടിയ വിജയ് ശങ്കറിന്റെയും, സെഞ്ചുറിയുമായി പുറത്താകാതെ നിന്ന ഗില്ലിന്‍റെയും മികവിൽ 19.1 ഓവറിൽ അവർ വിജയലക്ഷ്യം മറികടന്നു.

52 പന്ത് നേരിട്ട ഗിൽ, 5 ഫോറും 8 സിക്സറും അടക്കം 104 റൺസോടെ പുറത്താകാതെ നിൽക്കുകയായിരുന്നു. 98 റൺസിൽ നിന്നിരുന്ന അദ്ദേഹം, അവസാന ഓവറിലെ ആദ്യ പന്തിൽ ഫ്രീഹിറ്റിൽ സിക്സ് നേടിയാണ് സെഞ്ചുറി നേട്ടം പൂർത്തിയാക്കിയതും ടീമിനെ വിജയത്തിൽ എത്തിച്ചതും. ഗിൽ തന്നെയാണ് കളിയിലെ താരമായി തിരഞ്ഞെടുക്കപ്പെട്ടത്. കഴിഞ്ഞ മത്സരത്തിലും ഗിൽ സെഞ്ചുറി നേടി കളിയിലെ താരമായി മാറിയിരുന്നു. ശിഖർ ധവാനും, ജോസ് ബട്ട്ലർക്കും ശേഷം തുടർച്ചയായ രണ്ട് മത്സരങ്ങളിൽ സെഞ്ചുറിനേട്ടം കൈവരിച്ചതിന്റെ റെക്കോർഡിൽ ഇന്ന് വിരാട് കോഹ്‌ലിയ്‌ക്കൊപ്പം ഗില്ലും ഇടംപിടിച്ചു.

സെഞ്ചുറി സിക്സ് വീഡിയോ..