Month: May 2023

ഇന്നലെ രാത്രി ചെപ്പോക്കിലെ തങ്ങളുടെ അവസാന ലീഗ് മത്സരത്തിൽ കൊൽക്കത്തയോട്‌ ആറ് വിക്കറ്റിന്റെ പരാജയം ചെന്നൈ ഏറ്റുവാങ്ങിയിരുന്നു. ടോസ് നേടി ആദ്യം ബാറ്റിംഗ് തെരഞ്ഞെടുത്ത അവർക്ക് നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 144 റൺസ് എടുക്കാനേ കഴിഞ്ഞുള്ളൂ. 34 പന്തിൽ 48 റൺസെടുത്ത ശിവം ദുബേ ടോപ് സ്കോററായി. മറുപടി ബാറ്റിങ്ങിൽ കൊൽക്കത്ത 18.3 ഓവറിൽ വെറും 4 വിക്കറ്റ് നഷ്ടത്തിൽ വിജയലക്ഷ്യം മറികടന്നു. 57 റൺസോടെ പുറത്താകാതെ നിന്ന നായകൻ നിതീഷ് റാണയും, 54 റൺസെടുത്ത കളിയിലെ താരമായ റിങ്കു സിംഗും ചേർന്ന് അവരെ വിജയത്തിൽ എത്തിച്ചു.

മത്സരത്തിൽ പരാജയപ്പെട്ടെങ്കിലും ചെന്നൈ ഫാൻസിന് ഒരിക്കലും മറക്കാനാകാത്ത ഓർമകളാണ് ഇന്നലത്തെ രാത്രി സമ്മാനിച്ചത്. ചെന്നൈയുടെ ഈ സീസണിലെ ഹോംഗ്രൗണ്ടിലെ അവസാന ലീഗ്‌ മത്സരമായിരുന്നു ഇന്നലെ നടന്നത്. 15 പോയിന്റുമായി പട്ടികയിൽ രണ്ടാമത് നിൽക്കുന്ന ചെന്നൈ, പ്ലേഓഫിൽ എത്താനുള്ള സാധ്യതയുമുണ്ട്. അങ്ങനെ വന്നാൽ ഒരിക്കൽകൂടി അവർ ചെന്നൈയിൽ കളിക്കാനെത്തും. കാരണം, പ്ലേഓഫിലെ ക്വാളിഫയർ മത്സരവും എലിമിനേറ്റർ മത്സരവും നടക്കുന്നത് ചെന്നൈയിലാണ്.

ഇന്നലെ മത്സരം കഴിഞ്ഞ് ചെന്നൈ ആരാധകരുടെ പ്രിയപ്പെട്ട ‘തല’ ധോണിയുടെ നേതൃത്വത്തിൽ ടീമംഗങ്ങളും കോച്ചിംഗ് സ്റ്റാഫും എല്ലാം ചേർന്ന് ഗ്രൗണ്ടിന് ചുറ്റും വലംവച്ചുകൊണ്ട് കാണികളുടെ അകമഴിഞ്ഞ പിന്തുണയ്ക്ക് നന്ദി അറിയിച്ചിരുന്നു. ധോണിയും സഹതാരങ്ങളും ചേർന്ന് ചെന്നൈയുടെ ഒരുപാട് ജേഴ്സികൾ കാണികൾക്ക് എറിഞ്ഞുകൊടുക്കുന്ന കാഴ്ചയും കാണാൻ സാധിച്ചു. കയ്യിൽ ഒരു ടെന്നിസ് റാക്കറ്റ് പിടിച്ചിരുന്ന ധോണി നിറയെ പന്തുകളും ഗാലറിയിലേക്ക് അടിച്ചു കൊടുത്തുകൊണ്ടിരുന്നു.

ഗ്രൗണ്ട് സ്റ്റാഫും ക്യാമറമാൻമാരും ധോണിയുടെ ഒപ്പംനിന്നു ചിത്രമെടുക്കാനും ഓട്ടോഗ്രാഫ് വാങ്ങാനും മത്സരിച്ചു. സുരക്ഷഡ്യൂട്ടിയിൽ ഉണ്ടായിരുന്ന പോലീസുകാരും ധോണിയ്ക്ക്‌ ഷൈക്ക് ഹാൻഡ് നൽകാനും ഓട്ടോഗ്രാഫ് വാങ്ങാനും കാത്തുനിന്നു. മത്സരം അവസാനിച്ചിട്ടും ഒരു ചെന്നൈ ആരാധകനും സ്റ്റേഡിയംവിട്ട് പോയിരുന്നില്ല. ധോണി തങ്ങളുടെ അടുത്തേക്ക് വരുന്ന നിമിഷങ്ങൾ ക്യാമറയിൽ പകർത്താൻ എല്ലാവരും തയ്യാറെടുത്തു നിൽക്കുകയായിരുന്നു. അതിനിടെ മുൻ ഇന്ത്യൻ താരവും ഇന്നലെ കമന്ററി പാനലിൽ ഉൾപ്പെടുകയും ചെയ്‌തിരുന്ന സുനിൽ ഗാവസ്കർ വരെ, തന്റെ ഷർട്ടിന്റെ പോക്കറ്റിന് സമീപം ധോണിയെക്കൊണ്ട് ഒപ്പു വാങ്ങിപ്പിക്കുന്നതും ശ്രദ്ധേയമായി.

ഞായറാഴ്ച രാത്രി നടന്ന മത്സരത്തിൽ ചെപ്പോക്കിൽ ചെന്നൈയെ 6 വിക്കറ്റിന് കീഴടക്കി, കൊൽക്കത്ത നൈറ്റ് റൈഡേഴ്സ് പ്ലേഓഫിന്റെ നേരിയ പ്രതീക്ഷ നിലനിർത്തി. ടോസ് നേടി ആദ്യം ബാറ്റിംഗിനിറങ്ങിയ ചെന്നൈയെ നിശ്ചിത 20 ഓവറിൽ 6 വിക്കറ്റിന് 144 റൺസിൽ ഒതുക്കിയ കൊൽക്കത്ത, 18.3 ഓവറിൽ 4 വിക്കറ്റ് നഷ്ടത്തിൽ വിജയലക്ഷ്യം മറികടക്കുകയായിരുന്നു. ചെന്നൈ നിരയിൽ 34 പന്തിൽ 48 റൺസെടുത്ത ശിവം ദുബേ ടോപ് സ്കോററായപ്പോൾ, നാലാം വിക്കറ്റിൽ 99 റൺസിന്റെ കൂട്ടുകെട്ട് സൃഷ്ടിച്ച റിങ്കു സിംഗിന്റെയും(54) നായകൻ നിതീഷ് റാണയുടെയും(57*) മികവിലാണ് അവർ അനായാസം വിജയത്തിലേക്ക് എത്തിയത്.

ചെന്നൈയിലെ ആർത്തിരമ്പിനിന്ന കാണികൾക്ക് മുന്നിൽ രണ്ടേ രണ്ട് പന്ത് നേരിടാൻ മാത്രമായാണ് നായകൻ ധോണി ഇന്ന് കളത്തിലിറങ്ങിയത്. അതിലൊന്ന് ക്ലീൻബോൾഡ് ആകുകയും ചെയ്തു. എങ്കിലും ഫ്രീഹിറ്റ് പന്ത് ആയിരുന്നതുകൊണ്ട് പുറത്താകാതെ രക്ഷപ്പെട്ടു. വൈഭവ് അറോറ എറിഞ്ഞ അവസാന ഓവറിലെ നാലാം പന്തിൽ ജഡേജ പുറത്തായതോടെയാണ് ധോണി ക്രീസിൽ എത്തുന്നത്. ധോണിയുടെ ബാറ്റിൽ നിന്നും ഒരു ബൗണ്ടറിയെങ്കിലും പ്രതീക്ഷിച്ച് ആർപ്പുവിളികളുമായി നിൽക്കുകയായിരുന്നു ചെന്നൈ ആരാധകർ.

നേരിട്ട ആദ്യ പന്ത് വൈഡ്, അടുത്ത പന്ത് ഓഫ്സൈഡ് യോർക്കർ, ധോണിക്ക് ഒന്നും ചെയ്യാൻ കഴിഞ്ഞില്ല. എങ്കിലും അതൊരു മുൻ കാൽ നോബോൾ ആയിരുന്നു. അതോടെ ഫ്രീഹിറ്റ് പന്തിൽ ധോണിയുടെ സിക്‌സിനായി കാണികൾ വിസിലടികൾ മുഴക്കി. എങ്കിലും അവരെയെല്ലാം നിരാശരാക്കി അദ്ദേഹം ക്ലീൻബോൾഡാകുകയാണ് ഉണ്ടായത്. ഫ്രീഹിറ്റ് ആയിരുന്നത് കൊണ്ട് വിക്കറ്റ് പരിഗണിച്ചില്ല. തുടർന്ന് അവസാന പന്തിൽ ലോങ് ഓണിലേക്ക്‌ കളിച്ച് ഡബിൾ ഓടി ഇന്നിങ്സ് അവസാനിപ്പിച്ചു മടങ്ങി.

ഈ സീസണിൽ തങ്ങളുടെ സ്വന്തം കാണികൾക്ക് മുന്നിൽ കളിക്കുന്ന അവസാന മത്സരത്തിൽ നാണംകെട്ട തോൽവിയോടെ രാജസ്ഥാന് ജയ്പൂരിൽ നിന്ന് മടക്കം. റോയൽ ചലഞ്ചേഴ്സ് ബംഗളൂരുവിനോട്‌ 112 റൺസിനാണ്‌ അവർ അടിയറവ് പറഞ്ഞത്. മത്സരത്തിൽ ടോസ് നേടി ആദ്യം ബാറ്റിംഗിനിറങ്ങിയ ബംഗളൂരു നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 171 റൺസ് നേടിയപ്പോൾ, രാജസ്ഥാൻ 10.3 ഓവറിൽ വെറും 59 റൺസിൽ ഓൾഔട്ടായി. ഐപിഎൽ ചരിത്രത്തിലെ മൂന്നാമത്തെ ഏറ്റവും മോശം ടീം ടോട്ടലാണ്‌ ഇത്.

ആദ്യ ബാറ്റിങ്ങിൽ അർദ്ധസെഞ്ചുറികൾ നേടിയ നായകൻ ഡു പ്ലസ്സിയുടെയും മക്സ്വെല്ലിന്റെയും മികവിൽ മുന്നേറിയ ബംഗളൂരുവിന്, അവസാന ഓവറുകളിൽ ആഞ്ഞടിച്ച വിക്കറ്റ് കീപ്പർ അനൂജ്‌ റാവത്തിന്റെ ഇന്നിങ്സും കരുത്തായി. 11 പന്തിൽ 3 ഫോറും 2 സിക്സുമടക്കം 29 റൺസോടെ പുറത്താകാതെ നിന്നു അദ്ദേഹം. മറുപടി ബാറ്റിംഗിനിറങ്ങിയ രാജസ്ഥാൻ താരങ്ങൾ, ഒന്നിനു പിറകെ ഒന്നായി ഡഗ് ഔട്ടിലേക്ക് മടങ്ങുന്ന കാഴ്ചയാണ് കാണാൻ കഴിഞ്ഞത്.

ഓപ്പണർമാരായ ബട്ട്‌ലറും ജെയ്സ്‌വാളും പൂജ്യത്തിന് പുറത്തായി. 19 പന്തിൽ 35 റൺസെടുത്ത ഹെറ്റ്മേയർ പൊരുതിനോക്കിയെങ്കിലും പിന്തുണ നൽകാൻ ആരും ഉണ്ടായില്ല. ബംഗളൂരുവിനായി പന്തെടുത്ത എല്ലാവരും വിക്കറ്റ് നേടിയിരുന്നു. മൂന്നോവറിൽ വെറും 10 റൺസ് വഴങ്ങി 3 വിക്കറ്റ് വീഴ്ത്തിയ ഇടംകൈയ്യൻ പേസർ വെയ്ൻ പാർണൽ കളിയിലെ താരമായി തിരഞ്ഞെടുക്കപ്പെട്ടു.

അതിനിടെ മത്സരത്തിൽ വിക്കറ്റ് കീപ്പർ അനൂജ് റാവത്ത് അശ്വിനെ പുറത്താക്കാൻ കാഴ്ച്ചവെച്ച റൺഔട്ട് സമൂഹമാധ്യമങ്ങളിൽ വൈറലായി മാറിയിരിക്കുകയാണ്. കരൺ ശർമ എറിഞ്ഞ എട്ടാം ഓവറിന്റെ അവസാന പന്തിൽ ഓഫ്സൈഡ് ബൗണ്ടറിയിലേക്ക് കളിച്ച ഹെറ്റ്മേയർ, ആദ്യം ഡബിൾ ഓടാൻ തുടങ്ങിയെങ്കിലും പിന്നീട് മനസ്സുമാറ്റി അശ്വിനെ മടക്കിയയച്ചു. സ്റ്റമ്പിന് പുറംതിരിഞ്ഞ് നിൽക്കുകയായിരുന്നു അനൂജ്. സിറാജിന്റെ ഡയറക്ട്ത്രോ കൈക്കലാക്കി അതേ വേഗത്തിൽ തന്റെ കാലുകൾക്കിടയിലൂടെ ധോണി സ്റ്റൈലിൽ, അദ്ദേഹം കൃത്യമായി വിക്കറ്റിൽ കൊള്ളിക്കുന്ന കാഴ്ച്ചകണ്ട് അമ്പരന്നിരിക്കുകയാണ് ക്രിക്കറ്റ് ലോകം.

ഐപിഎൽ പ്ലേഓഫ് പ്രതീക്ഷകളുമായി ഇന്ന് പരസ്പരം ഏറ്റുമുട്ടുന്നത് രണ്ട് റോയൽ ടീമുകൾ; രാജസ്ഥാൻ റോയൽസും റോയൽ ചലഞ്ചേഴ്സ് ബാംഗ്ലൂരുവും. രാജസ്ഥാന്റെ ഹോംഗ്രൗണ്ടായ ജയ്പൂരിലെ സവായ്‌ മാൻസിംഗ് സ്റ്റേഡിയത്തിൽവെച്ചാണ് മത്സരം നടക്കുന്നത്. ഇന്ന് മത്സരത്തിൽ ടോസ് നേടിയ ബംഗളൂരു നായകൻ ഫാഫ് ഡു പ്ലെസ്സി ആദ്യം ബാറ്റിംഗ് തെരഞ്ഞെടുത്തു. ഹസരംഗയ്ക്കും ഹെയ്‌സെൽവുഡിനും പകരം ബ്രൈസ്വെല്ലും പാർണലും ബംഗളൂരു നിരയിൽ ഇടംപിടിച്ചു. രാജസ്ഥാൻ നിരയിൽ പേസർ ട്രെന്റ് ബോൾട്ടിന് പകരം സ്പിന്നർ ആദം സാമ്പയും ഇടംനേടി.

പതിഞ്ഞ താളത്തിൽ ആയിരുന്നു അവരുടെ തുടക്കം. വേഗം കുറഞ്ഞ പിച്ചിൽ അനായാസം ബൗണ്ടറി കണ്ടെത്താൻ ബുദ്ധിമുട്ടാണ്. വിരാട് കോഹ്‌ലിയും ഡു പ്ലെസിയും സിംഗിളുകൾ എടുത്ത് സ്ട്രൈക്ക് റൊട്ടേറ്റ് ചെയ്ത് കളിക്കുകയായിരുന്നു. പവർപ്ലെയിൽ ആറോവറിൽ 42 റൺസാണ് ഇരുവരും ചേർന്ന് നേടിയത്. സന്ദീപ് ശർമ എറിഞ്ഞ രണ്ടോവർ ഒഴികെ ബാക്കി നലോവറും സ്പിന്നർമാരാണ്‌ എറിഞ്ഞത്.

ഏഴാം ഓവറിൽ പന്തെറിയാൻ എത്തിയത് മലയാളി പേസർ കെ എം ആസിഫ്. കൊൽക്കത്തയിൽ നടന്ന മത്സരത്തിൽ 3 ഓവറിൽ 27 റൺസ് മാത്രം വിട്ടുകൊടുത്ത് അപകടകാരിയായ ആന്ദ്രേ റസ്സലിനെ പുറത്താക്കി മികച്ച ബോളിങ് കാഴ്ചവെച്ച ആസിഫിന് ഇന്നും അവസരം ലഭിച്ചു. തന്റെ ആദ്യ ഓവറിൽതന്നെ അവസാന പന്തിൽ ഇന്ത്യൻ ഇതിഹാസതാരമായ വിരാട് കോഹ്‌ലിയുടെ വിക്കറ്റ് വീഴ്ത്തിയാണ്, ആസിഫ് ടീം മാനേജ്മെന്റ് തന്നിൽ അർപ്പിച്ച വിശ്വാസം കാത്തത്.

ആസിഫിന്റെ ‘നക്കിൾ ബോൾ’ മനസ്സിലാക്കാതെ ക്രീസിൽ നിന്നും മുന്നോട്ട് കയറിവന്ന് വേഗത്തിൽ ബാറ്റ് വീശിയ കോഹ്‌ലിയ്‌ക്ക് പിഴച്ചു. പന്ത് അൽപം സമയമെടുത്താണ് ബാറ്റിലേക്ക് വന്നത്. അതോടെ വായുവിൽ ഉയർന്ന പന്ത്, എക്സ്ട്രാ കവറിൽ നിന്നിരുന്ന ജെയ്സ്വാൾ തന്റെ വലതുവശത്തേക്ക് ഓടി കൈപ്പിടിയിൽ ഒതുക്കി. ആസിഫിന്റെ ഐപിഎൽ കരിയറിലെ സ്വപ്നവിക്കറ്റുകളിൽ ഒന്ന് നേടാനായതിന്റെ സന്തോഷം കാണാമായിരുന്നു. 19 പന്തിൽ 18 റൺസുമായി കോഹ്‌ലി മടങ്ങി.

ഹൈദരാബാദിൽ ഇന്ന് ഉച്ചകഴിഞ്ഞു നടന്ന മത്സരത്തിൽ 7 വിക്കറ്റിന് വിജയിച്ച ലഖ്നൗ സൂപ്പർ ജയന്റ്‌സ്, പോയിന്റ് പട്ടികയിൽ നാലാമതെത്തി പ്ലേഓഫ് പ്രതീക്ഷകൾ സജീവമാക്കിയിരിക്കുകയാണ്‌. മത്സരത്തിൽ ടോസ് നേടി ആദ്യം ബാറ്റിംഗിനിറങ്ങിയ ഹൈദരാബാദ്, നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 182 റൺസാണ് നേടിയത്. ക്ലാസൻ 47 റൺസും അബ്ദുൽ സമദ് പുറത്താകാതെ 37 റൺസും എടുത്തു. മറുപടി ബാറ്റിങ്ങിൽ ലഖ്നൗ 19.2 ഓവറിൽ 3 വിക്കറ്റ് നഷ്ടത്തിൽ വിജയലക്ഷ്യം മറികടന്നു.

64 റൺസോടെ പുറത്താകാതെ നിന്ന പ്രേരക് മങ്കാദ് കളിയിലെ താരമായി തിരഞ്ഞെടുക്കപ്പെട്ടു. 25 പന്തിൽ 40 റൺസെടുത്ത മാർക്കസ് സ്റ്റോയിനിസ്‌, 13 പന്തിൽ നിന്നും പുറത്താകാതെ 44 റൺസ് നേടിയ നിക്കോളാസ് പുറൻ എന്നിവരും ലഖ്നൗവിന്റെ വിജയം അനായാസമാക്കി. ഓപ്പണർ ക്വിന്റൻ ഡി കോക്ക് 19 പന്തിൽ 29 റൺസും നേടിയിരുന്നു. ഇരു ടീമുകൾക്കും തുല്യ ജയസാധ്യത ഉണ്ടായിരുന്ന ഘട്ടത്തിൽനിന്നും മത്സരം ലഖ്നൗവിന് അനുകൂലമാക്കിയത്‌ അഭിഷേക് ശർമ എറിഞ്ഞ പതിനാറാം ഓവർ ആയിരുന്നു.

മത്സരത്തിൽ അവസാന 30 പന്തിൽ 69 റൺസായിരുന്നു അവർക്ക് ജയിക്കാൻ വേണ്ടിയിരുന്നത്. സ്ട്രൈക്കിൽ ഉണ്ടായിരുന്നത് സ്‌റ്റോയിനിസ്. ആദ്യ പന്തിൽ ഫുൾടോസ് സിക്സ് പോയി. അടുത്ത പന്തിൽ വൈഡ്, രണ്ടാം പന്തിൽ വീണ്ടുമൊരു സിക്സ്. മൂന്നാം പന്തിലും സിക്സ് അടിക്കാൻ ശ്രമിച്ച അദ്ദേഹത്തിന് പിഴച്ചു; ബൗണ്ടറിലൈനിൽ അബ്ദുൽ സമദ് ക്യാച്ച് എടുത്തു. പിന്നീട് ബാറ്റിങ്ങിന് ഇറങ്ങിയ നിക്കോളാസ് പുറൻ, അവസാന മൂന്ന് പന്തും ഗാലറിയിൽ എത്തിക്കുകയായിരുന്നു. അതോടെ അവസാന 24 പന്തിൽ നിന്നും 38 റൺസ് മാത്രമായി വിജയലക്ഷ്യം ചുരുങ്ങി.

സ്വന്തം ഹോംഗ്രൗണ്ടിൽ സൂര്യകുമാർ യാദവ് കന്നി ഐപിഎൽ സെഞ്ചുറിയുമായി അഴിഞ്ഞാടിയപ്പോൾ ഗുജറാത്ത് ടൈറ്റൻസിനെതിരെ മുംബൈയ്ക്ക് കൂറ്റൻ സ്കോർ. വാങ്കഡെ സ്റ്റേഡിയത്തിൽ നടക്കുന്ന മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ മുംബൈ നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 218 റൺസാണ് നേടിയത്. 49 പന്ത് നേരിട്ട സൂര്യ 11 ഫോറും 6 സിക്സും അടക്കം 103 റൺസോടെ പുറത്താകാതെ നിന്നു.

പവർപ്ലെയിലെ ആറോവറിൽ 61 റൺസ് കൂട്ടിച്ചേർത്ത് രോഹിത് – കിഷൻ സഖ്യം അവർക്ക് മികച്ച തുടക്കം നൽകി. എങ്കിലും ഇരുവരും റാഷിദ് ഖാൻ എറിഞ്ഞ ഏഴാം ഓവറിൽ പുറത്തായി. തുടർന്ന് എത്തിയ നേഹാൽ വദേരയെ തന്റെ അടുത്ത ഓവറിൽ റാഷിദ് തന്നെ മടക്കി. എങ്കിലും സൂര്യക്കൊപ്പം ചേർന്ന മുംബൈ ജേഴ്സിയിൽ തന്റെ കന്നിമത്സരം കളിക്കുന്ന മലയാളി താരം വിഷ്ണു വിനോദ്, നാലാം വിക്കറ്റിൽ 65 റൺസിന്റെ കൂട്ടുകെട്ടിൽ പങ്കാളിയായി. 20 പന്തിൽ രണ്ടു വീതം ഫോറും സിക്സുമായി 30 റൺസോടെ വിഷ്ണു മടങ്ങി.

അതിനുശേഷം സൂര്യകുമാർ യാദവ് തന്റെ കരിയറിലെ ആദ്യ ഐപിഎൽ സെഞ്ചുറിയിലേക്ക് കുതിച്ചു. പേരുകേട്ട ഗുജറാത്ത് ബോളിങ് നിരയെ കടന്നാക്രമിച്ച് ഗ്രൗണ്ടിന്റെ സകലഭാഗത്തേക്കും ഷോട്ടുകൾ പായിച്ച അദ്ദേഹം, വാങ്കഡെയിൽ തിങ്ങിനിറഞ്ഞ ആരാധകരെ ആവേശത്തിൽ ആറാടിച്ചു. 97 റൺസിൽ നിൽക്കെ ഇരുപതാം ഓവറിലെ അവസാന പന്തിൽ സിക്സ് നേടിയാണ് അദ്ദേഹം ആ നാഴികക്കല്ല് പിന്നിട്ടത്. ട്വന്റി ട്വന്റി ബാറ്റിംഗ് റാങ്കിംഗിൽ ഒന്നാമത് നിൽക്കുന്ന സൂര്യക്ക്, ഇതുവരെ നേടാൻ കഴിയാതിരുന്ന ഒന്നായിരുന്നു ഒരു ഐപിഎൽ സെഞ്ചുറി!

ഐപിഎല്ലിൽ ഇന്ന് വാങ്കഡെ സ്റ്റേഡിയത്തിൽ നടക്കുന്ന മത്സരത്തിൽ നിലവിലെ ചാമ്പ്യന്മാരായ ഗുജറാത്ത് ടൈറ്റൻസ് അഞ്ചുതവണ ജേതാക്കളായ മുംബൈ ഇന്ത്യൻസിനെ നേരിടുകയാണ്. മത്സരത്തിൽ ടോസ് നേടിയ ഗുജറാത്ത് നായകൻ ഹാർദ്ധിക് പാണ്ഡ്യ മുംബൈയെ ബാറ്റിങ്ങിന് അയയ്ക്കുകയായിരുന്നു.

നായകൻ രോഹിത് ശർമയും ഇഷൻ കിഷനും ചേർന്ന സഖ്യം ഒന്നാം വിക്കറ്റിൽ 6 ഓവറിൽ 61 റൺസ് കൂട്ടിച്ചേർത്ത് മുംബൈയ്ക്ക് വെടിക്കെട്ട് തുടക്കമാണ് നൽകിയത്. 31 റൺസെടുത്ത കിഷനെയും 29 റൺസെടുത്ത രോഹിത് ശർമ്മയെയും ഒരോവറിൽതന്നെ പുറത്താക്കിയ റാഷിദ് ഖാൻ ഗുജറാത്തിന് ബ്രേക്ക്ത്രൂ നൽകി. തുടർന്നെത്തി 7 പന്തിൽ നിന്നും 15 റൺസെടുത്ത നേഹാൽ വാദേരയെയും റാഷിദ് തന്നെ മടക്കി.

എങ്കിലും പിന്നീട് ഒത്തുചേർന്ന സൂര്യകുമാർ യാദവും മലയാളി താരം വിഷ്ണു വിനോദും ഗുജറാത്ത് ബോളർമാരെ കടന്നാക്രമിച്ചു കളിക്കുകയായിരുന്നു. ഗുജറാത്ത് നിരയിലെ ഏറ്റവും വേഗമേറിയ പേസർ അൽസാരി ജോസെഫിനെ സിക്സ് അടിച്ചായിരുന്നു വിഷ്ണുവിന്റെ തുടക്കം. പിന്നീട് മുഹമ്മദ് ഷമി എറിഞ്ഞ പതിമൂന്നാം ഓവറിൽ വിഷ്ണു വിനോദ് വിശ്വരൂപം പൂണ്ടു. രണ്ടാം പന്തിൽ പുൾ ഷോട്ട് കളിച്ച് ബൗണ്ടറി നേടിയ അദ്ദേഹം മൂന്നാം പന്തിൽ കവറിനു മുകളിലൂടെ ഒരു ബുള്ളറ്റ് സിക്സും നേടി, മുംബൈ ആരാധകരുടെ മനസ്സിൽ ഇടംപിടിച്ചു.