കഴിഞ്ഞ കുറച്ച് ദിവസങ്ങളായി വാർത്തകളിൽ നിറഞ്ഞു നിൽക്കുന്നത് ഇന്ത്യൻ ക്രിക്കറ്റ് താരം യുസ്വേന്ദ്ര ചഹലിന്റെ കുടുംബജീവിതത്തെ സംബന്ധിക്കുന്ന ഊഹാപോഹങ്ങളാണ്. ഇന്ത്യൻ ടീമിലെ ഇപ്പോഴത്തെ ഒന്നാം നമ്പർ ലെഗ് സ്പിന്നറായ ചഹലും ഭാര്യയും നർത്തകിയുമായ ധനശ്രീ വർമ്മയും തങ്ങളുടെ വിവാഹ ബന്ധം വേർപ്പെടുത്തി എന്ന തരത്തിൽ ഉള്ള വാർത്തകൾ വന്നിരുന്നു.
ഇരുവരുടെയും സോഷ്യൽ മീഡിയയിലെ ചില നീക്കങ്ങളാണ് ആരാധകർ ദുരൂഹമെന്ന് കരുതിയത്. അതിനു തക്കതായ കാരണവുമുണ്ട്. ചാഹൽ ഇൻസ്റ്റാഗ്രാമിൽ ദിവസങ്ങൾക്ക് മുമ്പ് പോസ്റ്റ് ചെയ്ത സ്റ്റോറിയിൽ ഒരു പുതിയ ജീവിതം ആരംഭിക്കുന്നു എന്ന് എഴുതിയിരുന്നു.
ഇതിനു കാരണം എന്താണെന്ന് കണ്ടെത്താനായി പിന്നീട് ആരാധകരുടെ ശ്രമം. ഒരു കൂട്ടം പറഞ്ഞത് താരത്തിന് ഒരു കുഞ്ഞ് ജനിക്കാൻ പോകുന്നത് സൂചിപ്പിക്കാനാണ് ഇങ്ങനെ ഒരു പോസ്റ്റ് ഇട്ടതെന്ന്. മറുവിഭാഗം പറഞ്ഞത് രണ്ടുപേരും തമ്മിൽ എന്തോ സ്വരചേർച്ച ഉണ്ടെന്നും വൈകാതേ തന്നെ വിവാഹമോചന വാർത്ത പുറത്തുവരുമെന്നും. ഇതിൽ ആര് പറയുന്നതാണ് ശരി എന്നറിയാൻ വേണ്ടി ആയിരുന്നു പിന്നീട് എല്ലാവരും കാത്തിരുന്നത്.
അപ്പോഴാണ് ഒരു കൂട്ടർ ധനശ്രീ തന്റെ ഇൻസ്റ്റാഗ്രാം യൂസർ നെയിമിൽ നിന്നും ചെഹൽ എന്ന പേര് ഒഴിവാക്കിയതായി കണ്ടത്. 2020ൽ വിവാഹിതരായ ശേഷം തന്റെ പേര് ധനശ്രീ വർമ്മ ചഹൽ എന്നാക്കി മാറ്റിയത് ഇപ്പോൾ ധനശ്രീ വർമ്മ എന്ന പഴയപോലെ ആകിയിട്ടുണ്ട്‌. ഇതോടെയാണ് ഇരുവരും വേർപിരിയുന്നുവെന്ന് ആരാധകർക്ക് തോന്നിത്തുടങ്ങിയത്.
മാത്രമല്ല, ഇൻസ്റ്റാഗ്രാമിൽ പങ്കുവെച്ച ഒരു ചിത്രം വലിയ രീതിയിൽ ചർച്ചയായിരുന്നു. സൂര്യകുമാർ യാദവ്, ഭാര്യ ദേവിഷ ഷെട്ടി, ശ്രേയസ് അയ്യർ എന്നിവരുടെ കൂടെ ധനശ്രീ നിൽക്കുന്ന ചിത്രമായിരുന്നു അത്. ഞങ്ങൾ ചഹലിനെ മിസ്സ് ചെയ്തില്ല എന്ന അടിക്കുറിപ്പും അതിലുണ്ടായിരുന്നു. ഇതേസമയം ബാംഗ്ലൂർ നേഷണൽ ക്രിക്കറ്റ് അക്കാദമിയിൽ പരിശീലനം നടത്താനായി വീട്ടിൽ നിന്ന് മാറിനിൽക്കുകയായിരുന്നു ചഹൽ.
മുൻപ് ശ്രേയസ് അയ്യരും ധനശ്രീ വർമ്മയും ചേർന്ന് ഡാൻസ് കളിക്കുന്ന ഒരു റീൽ വർമ്മ ഇൻസ്റ്റാഗ്രാമിൽ പങ്കുവെച്ചത് കൂടി ഉൾപ്പെടുത്തി ആരാധകർ സോഷ്യൽ മീഡിയയിൽ ചഹൽ ഒന്ന് സൂക്ഷിക്കുന്നത് നല്ലതാണ് എന്ന തരത്തിൽ ഉള്ള ഒരു ക്യാംപെയ്ൻ നടത്തിയിരുന്നു. ഇതിന് ശേഷമാണ് മേൽപ്പറഞ്ഞ സംഭവവികാസങ്ങൾ എല്ലാം ഉണ്ടായത്. അതുകൊണ്ടു തന്നെ ഇരുവരും തമ്മിലുള്ള സ്വരചേർച്ച വിവാഹമോചനം വരെ എത്തിയേക്കാം എന്ന സംശയം ആരാധകർക്ക് ബലപ്പെട്ടത്.
എന്നാൽ ഇപ്പോൾ സകല അഭ്യൂഹങ്ങളും കാറ്റിൽ പറത്തി ചഹല് തന്നെ ഇൻസ്റ്റാഗ്രാമിൽ സ്റ്റോറി പങ്കുവച്ചിരിക്കുകയാണ്. എല്ലാവരോടും ഒരപേക്ഷയുണ്ട്, എന്റെ കുടുംബബന്ധത്തെക്കുറിച്ച് പല ഊഹാപോഹങ്ങളും എയറിലുണ്ട്. ദയവു ചെയ്ത് അതിലൊന്നും വിശ്വസിക്കരുത്. ഇത്തരം കിംവദന്തികൾ പ്രചരിപ്പിക്കുന്നത് അവസാനിപ്പിക്കാൻ നിർദ്ദേശിച്ച അദ്ദേഹം എല്ലാവരോടും സ്നേഹം മാത്രമേയുള്ളൂവെന്നും വ്യക്തമാക്കി. എങ്കിലും ഈ വിഷയത്തിൽ ധനശ്രീയുടെ പ്രതികരണം ഇതുവരെ ലഭ്യമായിട്ടില്ല.
