മുൻ ഇന്ത്യൻ താരം ഗൗതം ഗംഭീറും മുൻ പാകിസ്ഥാൻ താരം ഷാഹിദ് അഫ്രിദിയും അത്ര രസത്തിൽ അല്ലെന്ന ക്രിക്കറ്റ് ലോകത്ത് പുതിയതല്ല. ഇരുവരും സോഷ്യൽ മീഡിയയിലൂടെ പലപ്പോഴും ഏറ്റുമുട്ടിയിട്ടുണ്ട്. ഇപ്പോഴിതാ ഇരുവരെയും ബന്ധപ്പെട്ട് പുതിയ വിവാദം ഉയരുകയാണ്. ഞായറാഴ്ച നടന്ന വാശിയേറിയ ഇന്ത്യ – പാകിസ്ഥാൻ മത്സരത്തിന് മുന്നോടിയായുള്ള ടെലിവിഷൻ ചർച്ചയ്ക്കിടെയാണ് സംഭവം അരങ്ങേറിയത്.
ചർച്ചയ്ക്കിടെ അഫ്രീദി ഗംഭീറിനെതിരെ നടത്തിയ പരാമർശമാണ് വിവാദമായത്. എന്നാൽ ഇതിൽ ഏറ്റവും കൂടുതൽ വിമർശനം ഏറ്റുവാങ്ങിയത് അതേ ചർച്ചയിൽ പങ്കെടുത്ത ഹർഭജൻ സിങ്ങാണ്. സംഭവം ഇങ്ങനെ…
“ഒരു ഇന്ത്യൻ താരങ്ങളുമായി എനിക്ക് യാതൊരു പ്രശ്നമില്ല. ശരിയാണ്, ചിലപ്പോൾ ഗൗതം ഗംഭീറുമായി ചില തർക്കങ്ങൾ സോഷ്യൽ മീഡിയയിൽ ഉണ്ടാകാറുണ്ട്. ഇന്ത്യൻ ടീമിൽ പോലും ആരും ഇഷ്ടപ്പെടാത്ത ഒരു വ്യക്തിയാണ് ഗൗതമെന്നാണ് എനിക്ക് തോന്നുന്നത്,” ഇന്ത്യൻ കളിക്കാരുമായുള്ള ബന്ധത്തെക്കുറിച്ച് സംസാരിക്കവെ അഫ്രീദി പറഞ്ഞു.
ഇത് കേട്ട് ഹർഭജൻ സിങ് ചിരിച്ചത് ഇന്ത്യൻ ആരാധകരുടെ വിമർശനത്തിന് ഇടയാക്കി. ഗംഭീറിനെ കുറിച്ചുള്ള കമന്റിന് ശേഷം ഹർഭജൻ അഫ്രീദിയുമായി ചിരി പങ്കിട്ടതിൽ നിരാശ പ്രകടിപ്പിച്ച് ഇന്ത്യൻ ആരാധകർ രംഗത്തെത്തി. ഒരു ഇന്ത്യൻ താരത്തിനെതിരെ ഇങ്ങനെയൊരു പരാമർശം നടത്തുമ്പോൾ ഒന്നിച്ച് കളിച്ച താങ്കൾ ഇങ്ങനെയാണോ പ്രതികരിക്കേണ്ടതെന്ന് ആരാധകർ ആരാഞ്ഞു.
അതേസമയം പാകിസ്ഥാനെതിരെ 5 വിക്കറ്റിന്റെ തകർപ്പൻ ജയമാണ് ഇന്ത്യ സ്വന്തമാക്കിയത്. അവസാന ഓവർ വരെ നീണ്ടു നിന്ന മത്സരം 2 പന്തുകൾ ബാക്കി നിൽക്കെ ഹർദിക് പാണ്ഡ്യ സിക്സ് പറത്തിയാണ് വിജയക്കൊടി പാറിപ്പിക്കുകയായിരുന്നു. 148 വിജയലക്ഷ്യവുമായി ചെയ്‌സിങിന് ഇറങ്ങിയ ഇന്ത്യയെ പാകിസ്ഥാൻ ബൗളർമാർ സമ്മർദ്ദത്തിലാക്കിയെങ്കിലും ജഡേജയുടെയും ഹർദിക്കിന്റെയും കൂട്ടുകെട്ട് മത്സരം ഇന്ത്യയുടെ വരുതിയിലാക്കുകയായിരുന്നു.