അവസാന ഓവറിൽ ഫിഫ്റ്റിക്ക് ഒരു റൺസ് അകലെ നിൽക്കെ സ്‌ട്രൈക് വേണോയെന്ന ചോദിച്ച ദിനേശ് കാർത്തിക്കിനോട് അടിച്ചു തകർക്കാൻ പറയുന്ന കോഹ്ലിയുടെ വീഡിയോ സോഷ്യൽ മീഡിയയിൽ വൈറലാവുകയാണ്. 19.4 ഓവറിൽ റബഡയ്ക്കെതിരെ സിക്സ് പറത്തിയതിന് പിന്നാലെയാണ് സിംഗിൾ എടുക്കണോയെന്ന് ചോദിച്ച് കാർത്തിക് എത്തിയത്, എന്നാൽ വേണ്ടെന്ന് പറഞ്ഞ് കോഹ്ലി നോൺ സ്‌ട്രൈക് നടക്കുകയായിരുന്നു.
19ആം ഓവറിൽ 49 റൺസിൽ നിൽക്കുകയായിരുന്ന കോഹ്ലിക്ക് അവസാന ഓവറിൽ ഒരു സ്‌ട്രൈകും ലഭിച്ചിരുന്നില്ല. തൊട്ടടുത്ത പന്തിലും സിക്സ് പറത്തി കാർത്തിക് വെടിക്കെട്ട് തുടരുകയായിരുന്നു. കോഹ്ലിയുടെ നിസ്വാർത്ഥതയെ ആരാധകർ സോഷ്യൽ മീഡിയയിൽ പ്രശംസിക്കുകയാണ്.
മത്സരത്തിൽ ഇന്ത്യയുടെ മുൻനിര താരങ്ങൾ തകർത്താടിയപ്പോൾ 3 വിക്കറ്റ് നഷ്ട്ടത്തിൽ ഇന്ത്യ 237 റൺസ് നേടി. 22 പന്തിൽ 61 റൺസ് നേടിയ സൂര്യകുമാർ യാദവിന്റെ ഇന്നിംഗ്സാണ് ഇന്ത്യൻ സ്‌കോർ അതിവേഗത്തിലാക്കിയത്. ഓപ്പണർമാരായ രോഹിതും (37 പന്തിൽ 43) രാഹുലും (28 പന്തിൽ 57) ഇന്ത്യയ്ക്ക് മികച്ച തുടക്കമാണ് നൽകിയത്. 9.5 ഓവറിൽ 96 റൺസ് നേടിയിരുന്നു.
കോഹ്ലി പുറത്താകാതെ 28 പന്തിൽ 49 റൺസ് നേടിയിട്ടുണ്ട്. അവസാനമായി ക്രീസിൽ എത്തിയ കാർത്തിക്കും മോശമാക്കിയില്ല, 7 പന്തിൽ 17 റൺസ് നേടി. പന്തെറിഞ്ഞവരെല്ലാം അടി വാങ്ങിച്ച് കൂട്ടിയ മത്സരത്തിൽ മഹാരാജ് മാത്രമാണ് 6ന് താഴെ എക്കൊണമിയിൽ റൺസ് വിട്ടുനൽകിയത്. 4 ഓവറിൽ 23 റൺസ് വഴങ്ങി 2 നിർണായക വിക്കറ്റ് വീഴ്ത്തി. 4 ഓവറിൽ 57 വഴങ്ങിയ റബദയാണ് ഏറ്റവും കൂടുതൽ റൺസ് വഴങ്ങിയത്.