ഞായറാഴ്ച ന്യൂസിലൻഡിലെ മൗണ്ട് മൗൺഗനോയിയിൽ നടന്ന ട്വന്റി ട്വന്റി പരമ്പരയിലെ രണ്ടാം മത്സരത്തിൽ ടീം ഇന്ത്യ 65 റൺസിന് ന്യൂസിലൻഡിനെ തോൽപ്പിച്ചിരുന്നു. വെടിക്കെട്ട് സെഞ്ചുറി നേടിയ ഒന്നാം നമ്പർ ട്വന്റി ട്വന്റി ബാറ്റർ സൂര്യകുമാർ യാദവിന്റെ മികവിൽ ഇന്ത്യ ഉയർത്തിയ 192 റൺസ് വിജയലക്ഷ്യം പിന്തുടർന്ന ന്യൂസിലൻഡ് ടീം 18.5 ഓവറിൽ 126 റൺസിന് എല്ലാവരും പുറത്താവുകയായിരുന്നു. 4 വിക്കറ്റ് വീഴ്ത്തിയ ദീപക് ഹൂഡ ബോളിംഗിൽ തിളങ്ങി.
ഈ വിജയത്തോടെ മൂന്നുമത്സര ട്വന്റി ട്വന്റി പരമ്പരയിൽ ടീം ഇന്ത്യ 1-0ത്തിന് മുന്നിലെത്തിയിരിക്കുകയാണ്. വെല്ലിങ്ടണിൽ നടക്കേണ്ടിയിരുന്ന ആദ്യ ട്വന്റി ട്വന്റി പോരാട്ടം, മഴമൂലം ടോസ് ഇടാൻ പോലുമാകാതെ പൂർണമായി ഉപേക്ഷിച്ചിരുന്നു. മൂന്നാമത്തെയും അവസാനത്തെയും മത്സരം ബുധനാഴ്ച നേപ്പിയറിൽ നടക്കും. മത്സരം വിജയിച്ച് പരമ്പര സമനിലയിൽ ആക്കാൻ കിണഞ്ഞു പരിശ്രമിക്കുന്ന ന്യൂസിലൻഡ് ടീം ഇന്ത്യക്ക് വെല്ലുവിളി ഉയർത്തും എന്ന് കരുതാം.
ഞായറാഴ്ച നടന്ന മത്സരത്തിനിടെ ഇന്ത്യൻ ഡ്രസ്സിംഗ് റൂമിൽ നിന്നുള്ള ഒരു വീഡിയോ ഇപ്പോൾ സമൂഹമാധ്യമങ്ങളിൽ വൈറൽ ആകുകയാണ്. ഡ്രസ്സിംഗ് റൂമിൽ നിന്നുകൊണ്ട് വളരെ കൂളായി ഒരു വലിയ സാൻവിച്ച് ഒറ്റയ്ക്ക് തിന്നുകൊണ്ടിരിക്കുന്ന ഇന്ത്യൻ ലെഗ് സ്പിന്നർ യൂസ്‌വെന്ദ്ര ചാഹലിനെ ആദ്യം കാണാം. അൽപസമയം കഴിഞ്ഞ് ഓൾറൗണ്ടർ ശർദൂൽ താക്കൂർ അവിടെയെത്തി ചഹലിന്റെ കയ്യിലിരുന്ന സാൻവിച്ചിൽ നിന്നും ഒരു കടി കഴിച്ച് പോകുന്നു. ഇതുകണ്ട സമീപത്ത് നിൽക്കുകയായിരുന്ന പേസർ മുഹമ്മദ് സിറാജും അതേപോലെ തന്നെ ചെയ്തു. ഇന്ത്യൻ താരങ്ങൾ തമ്മിലുള്ള ആത്മബന്ധം എത്രത്തോളം ഉണ്ടെന്ന് മനസ്സിലാക്കാം എന്നാണ് ഈ വീഡിയോ കണ്ട ആരാധകരെല്ലാം ഒരേ സ്വരത്തിൽ പറയുന്നത്.
വീഡിയോ :