ഏഷ്യ കപ്പ് ക്രിക്കറ്റ് ടൂർണമെൻ്റിൽ ഇന്നലെ പാക്കിസ്ഥാനെതിരെ ഇന്ത്യയുടെ ആദ്യ മത്സരം മഴമൂലം ഉപേക്ഷിക്കുകയായിരുന്നു. ശ്രീലങ്കയിലെ പല്ലേക്കേലെ സ്റ്റേഡിയത്തിൽ നടന്ന പോരാട്ടത്തിൽ ടോസ് നേടിയ ടീം ഇന്ത്യ ആദ്യം ബാറ്റിംഗ് തെരഞ്ഞെടുക്കുകയായിരുന്നു. പാക്കിസ്ഥാൻ പേസർമാർക്ക് മുന്നിൽ ഇന്ത്യൻ ടോപ് ഓർഡർ അടിയറവ് പറയുന്ന കാഴ്ചയാണ് പിന്നീട് കാണാൻ കഴിഞ്ഞത്. ഇടയ്ക്കിടെ മഴ കളി തടസ്സപ്പെടുത്തുകയും ചെയ്തു.
15 ഓവറിൽ 66/4 എന്ന നിലയിൽ തകർന്ന ഇന്ത്യയെ വൈസ് ക്യാപ്റ്റൻ ഹർദിക് പാണ്ഡ്യയും വിക്കറ്റ് കീപ്പർ ഇഷാൻ കിഷനും ചേർന്ന 138 റൺസിൻ്റെ കൂട്ടുകെട്ടാണ് കരകയറ്റിയത്. പാണ്ഡ്യ 87 റൺസും കിഷൻ 82 റൺസും എടുത്ത് പുറത്തായശേഷം വീണ്ടും ഒരു കൂട്ടത്തകർച്ചയായിരുന്നു. ഇന്ത്യയുടെ അവസാന 5 വിക്കറ്റുകൾ 27 റൺസ് എടുക്കുന്നതിനിടെ നിലംപൊത്തി. അതോടെ 48.5 ഓവറിൽ 266 റൺസിൽ ഇന്ത്യ ഓൾഔട്ടായി.
ഇന്ത്യയുടെ എല്ലാ വിക്കറ്റുകളും പാക്ക് പേസർമാർക്കായിരുന്നു. ഷഹീൻ അഫ്രീദി 4 വിക്കറ്റും, റൗഫും നസീമും 3 വിക്കറ്റ് വീതവും വീഴ്ത്തി. തുടർന്ന് പാക്ക് ബാറ്റിംഗ് ആരംഭിക്കാനിരുന്ന സമയത്ത് വീണ്ടും മഴയെത്തി. എങ്കിലും ഓവർ ചുരുക്കിയുള്ള റൺചേസ് ഉണ്ടാകുമെന്ന് കരുതി ആരാധകർ കാത്തിരുന്നെങ്കിലും ഫലമുണ്ടായില്ല. അതോടെ ഇരു ടീമുകളും ഓരോ പോയിൻ്റ് വീതം പങ്കിട്ടു. ആദ്യ മത്സരത്തിൽ നേപ്പാളിനെ കീഴടക്കിയ പാക്കിസ്ഥാൻ, സൂപ്പർ ഫോർ ഘട്ടത്തിലേക്ക് യോഗ്യത നേടുകയും ചെയ്തു. ഇന്ത്യ തിങ്കളാഴ്ച നേപ്പാളിനെ നേരിടും.
അതിനിടെ ഇന്ത്യൻ നായകൻ രോഹിത് ശർമയുടെ ഒരു വീഡിയോയാണ് ഇപ്പോൾ സമൂഹമാധ്യമങ്ങളിൽ വൈറലായി മാറിയിരിക്കുന്നത്. പുറത്തായശേഷം നിരാശനായി ഡഗ്ഔട്ടിൽ മടങ്ങിയെത്തിയ രോഹിത്തിൻ്റെ ദൃശ്യങ്ങൾ പകർത്തുകയായിരുന്ന ക്യാമറമാനെ ശകാരിക്കുന്നതാണ് വീഡിയോ. ഇത്രയും എടുത്തതൊക്കെ മതി, ഇനി സ്ഥലം വിടാൻ നോക്കൂ എന്ന തരത്തിൽ. 22 പന്തിൽ 11 റൺസെടുത്ത രോഹിത്, ഷഹീൻ അഫ്രീദിയുടെ പന്തിൽ ക്ലീൻബോൾഡ് ആയാണ് പുറത്തായത്.
വീഡിയോ കാണാം..