കളിക്കളത്തിൽ നിന്നുമേറ്റ പരിക്ക് മൂലം പല ജീവനും പൊലിയുന്നത് നമ്മൾ കണ്ടിട്ടുണ്ട്. മുൻ ഓസ്ട്രേലിയൻ താരം ഫിൽ ഹ്യൂസിന്റെ വേർപാട് ഇന്നും ക്രിക്കറ്റ് പ്രേമികൾക്ക് ഒരു തീരാവേദനയാണ്. ആധുനിക ക്രിക്കറ്റിൽ ക്ലോസ് ഇൻ ഫീൽഡ് നിൽക്കുമ്പോൾ ഒരിക്കലും ഹെൽമെറ്റ് ധരിക്കാതെ നിൽക്കാൻ അമ്പയർസ് അനുവദിക്കാറില്ല. ഇപ്പോഴിതാ അതുമായി ചുറ്റിപറ്റി ഒരു സംഭവം വൈറൽ ആയിരിക്കുകയാണ്. ഇന്ത്യയും ഇംഗ്ലണ്ടും തമ്മിൽ റാഞ്ചിയിൽ നടക്കുന്ന ടെസ്റ്റ് മത്സരത്തിനിടയിൽ ആയിരുന്നു സംഭവം.
ഇംഗ്ലണ്ടിന്റെ രണ്ടാം ഇന്നിങ്സിനിടെ ടെയിൽ എൻഡറായ ഷോയ്ബ് ബഷീർ സ്ട്രൈക്ക് വന്നപ്പോൾ ഇന്ത്യൻ നായകൻ രോഹിത് മിഡ് ഓഫിൽ നിന്നും സർഫറാസ് ഖാനെ ക്ലോസ് ഇൻ ഫീൽഡിലേക്ക് വരാൻ ആവശ്യപെട്ടു. ഉടൻ തന്നെ സർഫറാസ് ഷോർട്ട് ലെഗ് പൊസിഷനിൽ വന്നു നിന്നു. എന്നാൽ അപ്പോൾ അമ്പയർ കുമാർ ധർമ്മസേന ഹെൽമെറ്റ് ധരിച്ചതിന് ശേഷമേ നിൽക്കാൻ പാടുള്ളുവെന്ന് സർഫറാസിനോട് പറഞ്ഞു. ഒരു ബോൾ അല്ലെ ഉള്ളു ഓവർ അവസാനിക്കാൻ, അതിനാൽ സാരമില്ല എന്നായിരുന്നു സർഫറാസിന്റെ മറുപടി. എന്നാൽ അമ്പയർ അത് അനുവദിച്ചില്ല.
അതേസമയം മുംബൈക്കാരന്റെ ടിപ്പിക്കൽ സ്റ്റൈലിൽ ക്യാപ്റ്റൻ രോഹിത് ശർമ്മയും സർഫറാസിനോട് രസകരമായ കമന്റ് പാസ്സ് ചെയ്തു. ‘ഭായ് ഹീറോ ആകാൻ ഒന്നും നോക്കണ്ട. പോയി ഹെൽമെറ്റ് വച്ചിട്ട് വന്ന് നിൽക്കു’, എന്നായിരുന്നു രോഹിത്തിന്റെ കമന്റ്. തുടർന്ന് റിസർവ് താരം സർഫറാസിന് ഹെൽമെറ്റ് കൊണ്ട് നൽകുകയും അത് ധരിച്ചതിന് ശേഷവുമായിരുന്നു അദ്ദേഹം ഫീൽഡ് നിന്നതും. രോഹിത്തിന്റെ ആ വൈറൽ കമന്റിന്റെ വീഡിയോ താഴെ ചേർക്കുന്നു.