ഐപിഎല്ലിലെ പതിനാറാം സീസണിൽ മത്സരങ്ങൾ പുരോഗമിക്കുമ്പോൾ മലയാളിതാരം സഞ്ജു വി സാംസൺ നയിക്കുന്ന രാജസ്ഥാൻ റോയൽസാണ് ഇപ്പോൾ പോയിന്റ് പട്ടികയിൽ ഒന്നാമത്. മൂന്ന് മത്സരങ്ങളിൽ രണ്ട് ജയവും ഒരു തോൽവിയുമാണ് അവർക്കുള്ളത്. സൺറൈസേഴ്സ് ഹൈദരാബാദിനെ 72 റൺസിന് തോൽപ്പിച്ച് തുടങ്ങിയ അവർ, പക്ഷേ രണ്ടാം മത്സരത്തിൽ കേവലം 5 റൺസ് മാർജിനിൽ പഞ്ചാബ് കിംഗ്സിനോട് പരാജയപ്പെട്ടിരുന്നു. എങ്കിലും ഇന്നലെ നടന്ന മൂന്നാം മത്സരത്തിൽ ഡൽഹി ക്യാപിറ്റൽസിനെ 57 റൺസിന് പരാജയപ്പെടുത്തി റോയൽസ് വിജയവഴിയിൽ തിരിച്ചെത്തിയിരുന്നു.
പഞ്ചാബിന് എതിരായ മത്സരവും ഇന്നലെത്തെ മത്സരവും അടക്കം രണ്ട് മത്സരങ്ങൾ ഗുവാഹത്തിയിലെ ബാർസാപാര സ്റ്റേഡിയത്തിലാണ് നടന്നത്. ജയ്പൂരിലെ സവായ് മാൻ സിംഗ് സ്റ്റേഡിയമാണ് രാജസ്ഥാന്റെ ഹോംഗ്രൗണ്ട്. എങ്കിലും റോയൽസ് മാനേജ്മെന്റ് ഐപിഎൽ അധികൃതരുമായി ചർച്ചചെയ്ത് തങ്ങളുടെ രണ്ട് ഹോം മത്സരങ്ങൾ ഗുവാഹത്തിയിൽ നടത്താനുള്ള അനുമതി വാങ്ങിയിരുന്നു. നോർത്ത് ഈസ്റ്റ് സംസ്ഥാനങ്ങളിൽ നിന്നും ഐപിഎല്ലിൽ ടീമുകൾ ഒന്നുംതന്നെ ഇല്ല. അതുകൊണ്ട് അവിടെയുള്ള ക്രിക്കറ്റ് ആരാധകർക്ക് വേണ്ടി ബിസിസിഐ അത് അംഗീകരിച്ചു നൽകി.
ഇന്നലെ രാത്രി മത്സരശേഷം ഗ്രൗണ്ടിൽനിന്നും തിരികെ ഡ്രസ്സിംഗ് റൂമിലേക്ക് കയറുന്ന സമയത്ത് കാണികൾ സഞ്ജുവിനായി ആർപ്പുവിളിക്കുന്നുണ്ടായിരുന്നു. സഞ്ജു.. സഞ്ജു.. എന്നുള്ള തുടർച്ചയായ വിളികൾക്ക് സഞ്ജു തിരികെ അവർക്ക് അഭിവാദനം നൽകുകയും ചെയ്യുന്നുണ്ട്. ഈ ദൃശ്യങ്ങൾ സമൂഹമാധ്യമങ്ങളിൽ വൈറലായി മാറിയിരിക്കുകയാണ്. ഇന്ത്യൻ ടീമിൽ കളിക്കുന്ന സമയത്ത് വിദേശരാജ്യങ്ങളിൽ പര്യടനം നടത്തുമ്പോഴും ഇത്തരത്തിൽ സഞ്ജുവിന് ആരാധകപിന്തുണ ലഭിക്കാറുണ്ട്. ഇന്ത്യയിലാകട്ടെ സഞ്ജുവിന്റെ ജനപിന്തുണ വർദ്ധിച്ചുവരികയാണ് എന്നത് വെളിവാക്കുന്നതാണ് ഈ വീഡിയോ. ആദ്യ മത്സരത്തിൽ ഹൈദരാബാദിന്റെ ഹോംഗ്രൗണ്ടിൽ ബാറ്റിങ്ങിന് ഇറങ്ങിയപ്പോഴും ഓറഞ്ച് ആർമി, സഞ്ജു.. സഞ്ജു.. വിളികൾ മുഴക്കിയിരുന്ന ദൃശ്യങ്ങളും ഇന്റർനെറ്റിൽ വൈറൽ ആയിരുന്നു.