രവീന്ദ്ര ജഡേജയുടെ മികച്ച ഫിനിഷിങ് ഇന്നലെ ചെന്നൈയ്ക്ക് സമ്മാനിച്ചത് അഞ്ചാം ഐപിഎൽ കിരീടനേട്ടമാണ്. മോഹിത് ശർമ എറിഞ്ഞ ഇരുപതാം ഓവറിന്റെ അവസാന രണ്ട് പന്തുകളിൽ നിന്നും 10 റൺസായിരുന്നു ചെന്നൈയ്ക്ക് ജയിക്കാൻ വേണ്ടിയിരുന്നത്. അഞ്ചാം പന്തിൽ സിക്സും, അവസാന പന്തിൽ ഫോറും അടക്കം 6 പന്തിൽ 15 റൺസോടെ പുറത്താകാതെ നിന്ന ജഡേജ, ചെന്നൈയുടെ വീരനായകനായി.
ഞായറാഴ്ച നടക്കേണ്ടിയിരുന്ന ഫൈനൽ മത്സരം മഴമൂലം റിസർവ് ദിനമായ തിങ്കളാഴ്ച രാത്രിയിലേക്ക് മാറ്റുകയായിരുന്നു. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഗുജറാത്ത്, നിശ്ചിത 20 ഓവറിൽ 4 വിക്കറ്റ് നഷ്ടത്തിൽ 214 റൺസ് എന്ന കൂറ്റൻ സ്കോർ കണ്ടെത്തി. 47 പന്തിൽ 96 റൺസുമായി സായി സുദർശൻ ടോപ് സ്കോററായപ്പോൾ, അർദ്ധസെഞ്ചുറിയുമായി സാഹ മികച്ച പിന്തുണ നൽകി. മറുപടി ബാറ്റിങ്ങിൽ വെറും മൂന്നു പന്ത് എറിഞ്ഞപ്പോഴേക്കും മഴ പെയ്തതോടെ കളി തടസ്സപ്പെട്ടു. പിന്നീട് 15 ഓവറിൽ 171 റൺസ് വിജയലക്ഷ്യമാക്കി നിശ്ചയിച്ചു.
ഒന്നാം വിക്കറ്റിൽ 6.3 ഓവറിൽ 74 റൺസ് കൂട്ടിച്ചേർത്ത ഓപ്പണർമാരായ ഗെയ്ക്വാദും കോൺവെയും മികച്ച തുടക്കം സമ്മാനിച്ചു. തുടർന്ന് വന്ന ഓരോ താരങ്ങളും അവരവരുടേതായ രീതിയിൽ സംഭാവന നൽകാൻ ശ്രമിച്ചു. എങ്കിലും വൻ സ്കോറുകൾ എടുക്കുന്നതിന് മുന്നേ അവരെ പുറത്താക്കി ഗുജറാത്തും ഒപ്പത്തിനൊപ്പം നിന്നു. ഒടുവിൽ ജഡേജയുടെ അവിസ്മരണീയ ഫിനിഷിംഗിൽ വിജയം ചെന്നൈയ്ക്കൊപ്പം.
ചെന്നൈ ഡഗ്ഔട്ട് ഒന്നടങ്കം ജഡേജയേ കെട്ടിപിടിച്ച് അഭിനന്ദിക്കുന്ന സമയത്ത്, ഗാലറിയിൽ ആനന്ദാശ്രു പൊഴിച്ചുനിൽക്കുന്ന അദ്ദേഹത്തിന്റെ ഭാര്യ റിവാബായുടെ ദൃശ്യങ്ങൾ സമൂഹമാധ്യമങ്ങളിൽ വൈറലായി മാറിയിരിക്കുകയാണ്. ജഡേജയുടെ മോശം ഫോമിന്റെ പേരിൽ ചെന്നൈ ഫാൻസ് വരെ വിമർശനങ്ങൾ ഉയർത്തിയ സമയത്ത്, താരത്തിന് പരസ്യപിന്തുണയുമായി റിവാബ എത്തിയിരുന്നു. സ്വന്തം കഴിവിൽ ഉറച്ചുവിശ്വസിക്കാനും ഒരുനാൾ വിജയം നിങ്ങളെ തേടിയെത്തുമെന്നും അവർ ട്വീറ്റ് ചെയ്തിരുന്നു. ചെന്നൈയ്ക്ക് ട്രോഫി നേടിക്കൊടുത്തുകൊണ്ട് ജഡേജ, അത് സഫലമാക്കി. മത്സരശേഷം മൈതാനത്ത് എത്തിയ റിവാബായും ജഡേജയും കെട്ടിപ്പിടിച്ചുനിന്ന് വിജയം ആഘോഷിക്കുകയും ചെയ്തു.
വീഡിയോ…