ഓസ്‌ട്രേലിയയ്ക്കെതിരായ മത്സരത്തിനിടെ ആരാധകരെയും സഹതാരങ്ങളെയും അമ്പരപ്പിച്ച് അയർലൻഡ് താരത്തിന്റെ അവിശ്വസനീയ ഫീല്ഡിങ്. മാർക് അടെയ്ർ എറിഞ്ഞ 15ആം ഓവറിലെ രണ്ടാം പന്തിലാണ് സംഭവം. സ്റ്റോയ്നിസ് ബാറ്റിൽ നിന്ന് പിറന്ന കൂറ്റൻ ഷോട്ട് സിക്സ് എന്ന് ഉറപ്പിച്ചിരിക്കെയാണ് ഓടിയെത്തിയ മക്കാർത്തി തടുത്തിട്ടത്.
ആദ്യം പന്ത് കൈപിടിയിൽ ഒതുക്കിയ മക്കാർത്തി, ബൗണ്ടറി ലൈനിലേക്ക് വീഴുമെന്ന് ഉറപ്പായപ്പോൾ പന്ത് എറിയുകയായിരുന്നു. ലൈനിലേക്ക് വീഴാൻ നിമിഷങ്ങൾക്ക് മുമ്പാണ് ഭദ്രമായി പന്ത് കൈയിൽ നിന്ന് ഒഴിവാക്കിയത്. 6 റൺസ് വഴങ്ങേണ്ടി ഇടത്ത് വെറും 2 റൺസിൽ ഒതുക്കി.
ഫീല്ഡിങ് ശ്രമത്തിനിടെ ചെറിയ രീതിയിൽ പരിക്കേറ്റ താരം അൽപ്പ നേരം ഇരുന്നതിന് ശേഷമാണ് ഫീല്ഡിങ് തുടർന്നത്. ഫിസിയോ എത്തി പരിക്കുകൾ ഇല്ലെന്ന് ഉറപ്പുവരുത്തുകയും ചെയ്തു. തൊട്ടടുത്ത് നിന്ന് മത്സരം കാണുകയായിരുന്ന ഓസ്‌ട്രേലിയൻ താരം വേഡും അയർലൻഡ് താരത്തിന്റെ തകർപ്പൻ ഫീല്ഡിങ്ങിൽ കയ്യടിക്കാൻ മറന്നില്ല.
മത്സരത്തിൽ ടോസ് നേടിയ അയർലൻഡ് ഓസ്‌ട്രേലിയയെ ബാറ്റിങിന് അയക്കുകയായിരുന്നു. മത്സരം 16 ഓവർ പിന്നിട്ടപ്പോൾ ഓസ്‌ട്രേലിയ 145/3 എന്ന നിലയിലാണ്. 41 പന്തിൽ 57 റൺസുമായി ക്യാപ്റ്റൻ ഫിഞ്ചും, 17 പന്തിൽ 31 റൺസുമായി സ്റ്റോയ്നിസുമാണ് ക്രീസിൽ. വാർണർ (7 പന്തിൽ 3), മാർഷ് (22 പന്തിൽ 28), മാക്‌സ്വെൽ (9 പന്തിൽ 13) എന്നിവരുടെ വിക്കറ്റുകളാണ് ഓസ്‌ട്രേലിയയ്ക്ക് നഷ്ട്ടമായത്.
വിഡിയോ കാണാം: