ക്രൈസ്റ്റ് ചർച്ചിലെ ഹാഗ്ലെയ് ഓവലിൽ നടക്കുന്ന ഇന്ത്യ-ന്യൂസിലൻഡ് ഏകദിന പരമ്പരയിലെ മൂന്നാമത്തെയും അവസാനത്തെയും മത്സരത്തിൽ ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ 12 ഓവറിൽ 52/1 എന്ന നിലയിലാണ്. 22 പന്തിൽ 13 റൺസ് എടുത്ത ശുഭ്മൻ ഗിലിന്റെ വിക്കറ്റാണ് ഇന്ത്യക്ക് നഷ്ടമായത്. നേരത്തെ മഴ മൂലം അൽപസമയം വൈകിയാണ് മത്സരത്തിൽ ടോസ് ഇടാൻ കഴിഞ്ഞത്. ആദ്യ മത്സരത്തിൽ പരാജയപ്പെട്ട ഇന്ത്യക്ക് പരമ്പര സമനിലയിലാക്കാൻ ഇന്ന് വിജയം അനിവാര്യമാണ്. രണ്ടാം ഏകദിനം മഴമൂലം ഉപേക്ഷിച്ചിരുന്നു.
തുടർച്ചയായി മൂന്നാം മത്സരത്തിലും ടോസ് നേടിയ ന്യൂസിലൻഡ് നായകൻ കെയ്‌ൻ വില്യംസൺ എപ്പോഴത്തെയുംപോലെത്തന്നെ ആദ്യം ഫീൽഡിംഗ് തിരഞ്ഞെടുക്കുകയായിരുന്നു. ന്യൂസിലൻഡ് നിരയിൽ സ്പിന്നർ മൈക്കിൾ ബ്രേയ്‌സ്വെല്ലിന് പകരം പേസർ ആദം മിൽനേ ഇടംപിടിച്ചു. ടീം ഇന്ത്യയാകട്ടെ കഴിഞ്ഞ മത്സരത്തിൽ വരുത്തിയ രണ്ട് മാറ്റങ്ങൾ ഇന്നും തുടരാൻ തീരുമാനിച്ചു. മലയാളി താരം സഞ്ജു വി സാംസണ് പകരം ദീപക് ഹൂഡയും, പേസർ ശർദുൽ താക്കൂറിന് പകരം ദീപക് ചഹറുമാണ് കഴിഞ്ഞ മത്സരത്തിൽ ടീമിൽ ഇടംനേടിയത്.
ഈയിടെയായി തുടർച്ചയായി മോശം പ്രകടനങ്ങൾ കാഴ്ചവെക്കുന്ന ഇന്ത്യൻ വിക്കറ്റ് കീപ്പർ ഋഷഭ് പന്ത് മത്സരം ആരംഭിക്കുന്നതിന് മുൻപ് ഒരു അഭിമുഖം നൽകിയിരുന്നു. ട്വന്റി ട്വന്റിയിൽ ടോപ് ഓർഡർ, ഏകദിനത്തിൽ 4-5 സ്ഥാനങ്ങൾ, ടെസ്റ്റിൽ അഞ്ചാമത് എന്നിങ്ങനെ ബാറ്റ് ചെയ്യാനാണ് തനിക്കിഷ്ട്ടം എന്ന് അദ്ദേഹം വ്യക്തമാക്കി. എങ്കിലും ടീമിന്റെ വിജയത്തിനായി ഏത് പൊസിഷനിൽ ഇറക്കിയാലും കളിക്കുമെന്നും അദ്ദേഹം കൂട്ടിച്ചേർത്തു. താൻ സാധാരണ കളിക്കണക്കുകൾ നോക്കാറില്ലെന്ന് പറഞ്ഞ അദ്ദേഹം, എങ്കിലും ട്വന്റി ട്വന്റി ക്രിക്കറ്റിൽ തന്റെ റെക്കോർഡ് വളരെ മോശമാണെന്ന് തുറന്നുസമ്മതിക്കുകയും ചെയ്യുന്നുണ്ട്. വെറും 24 വയസ്സ് മാത്രം പ്രായമുള്ള തന്നെ മറ്റുള്ളവരുമായി താരതമ്യപ്പെടുത്താനുള്ള സമയമായിട്ടില്ലെന്നും പന്ത് പറയുന്നു. തനിക്ക് ഇനി വിശ്രമിക്കാൻ പോലുമുള്ള സമയമില്ല, ഇവിടെനിന്ന് നേരെ ബംഗ്ലാദേശിലെക്ക് പോകുകയാണെന്നും അദ്ദേഹം പറഞ്ഞു.