ലെജൻഡ്സ് ക്രിക്കറ്റ്‌ ലീഗിലെ ഗുജറാത്ത്‌ ജയന്റ്സും ഭിൽവാര കിംഗ്‌സും തമ്മിലുള്ള മത്സരത്തിൽ ടോസ് നേടിയ ഗുജറാത്ത്‌ ക്യാപ്റ്റൻ പാർഥിവ് പട്ടേൽ ബാറ്റിങ്ങ് തിരഞ്ഞെടുക്കുകയായിരുന്നു, ജോധ്പൂരിലാണ് മൽസരം നടക്കുന്നത്, തുടക്കത്തിൽ തന്നെ കഴിഞ്ഞ കളിയിൽ 68 റൺസ് എടുത്ത് തിളങ്ങിയ ക്രിസ് ഗെയിൽ 4 റൺസ് എടുത്ത് റൺ ഔട്ട്‌ ആയി മടങ്ങിയത് ഗുജറാത്തിന് തിരിച്ചടി ആയെങ്കിലും പിന്നീട് വന്ന ബാറ്റർമാർ അവസരത്തിനൊത്ത് ഉയർന്നത് കൊണ്ട് നിശ്ചിത 20 ഓവറിൽ ഗുജറാത്തിന് 194/7 എന്ന കൂറ്റൻ സ്കോർ നേടാനായി.
ഗെയിൽ മടങ്ങിയതിന് പിന്നാലെ 36 റൺസ് എടുത്ത തിലകരത്ന ദിൽഷനും 43 റൺസ് എടുത്ത യശ്പാൽ സിങ്ങും ഗുജറാത്തിനെ മുന്നോട്ടേക്ക് നയിച്ചു, ദിൽഷനും യശ്പാൽ സിങ്ങും ഗുജറാത്ത്‌ ഇന്നിംഗ്സിന് അടിത്തറ പണിതപ്പോൾ അത് കെട്ടിപ്പൊക്കി 194 ൽ എത്തിച്ചത് അവസാന ഓവറുകളിൽ തകർത്തടിച്ച കെവിൻ ഒബ്രിയാന്റെയും ജീവൻ മെൻഡിസിന്റെയും ഇന്നിങ്ങ്സിന്റെ പിൻബലത്തിലാണ്, വെറും 24 ബോളിൽ 2 ഫോറും 4 സിക്സും അടക്കം 45 റൺസ് ആണ് കെവിൻ ഒബ്രിയാൻ അടിച്ച് കൂട്ടിയത്, മറുവശത്ത് 24 റൺസ് എടുത്ത ജീവൻ മെൻഡിസും മികച്ച പിന്തുണ നൽകി.
മത്സരത്തിൽ ഭിൽവാര കിങ്ങ്സിന് വേണ്ടി മികച്ച ബോളിംഗ് പ്രകടനം ആണ് ശ്രീശാന്ത് നടത്തിയത് 4 ഓവറിൽ 28 റൺസ് വഴങ്ങി അപകടകാരികളായ ദിൽഷന്റെയും (36) സ്റ്റുവർട്ട് ബിന്നിയുടെയും (4) വിക്കറ്റുകളാണ് ശ്രീശാന്ത് സ്വന്തമാക്കിയത്, ഇരുവരുടെയും കുറ്റി തെറിപ്പിക്കുകയായിരുന്നു ശ്രീശാന്ത്, മത്സരത്തിന്റെ അവസാന ഓവറിൽ മികച്ച ഫീൽഡിങ്ങിലൂടെ റയാഡ് എംറിത്തിനെ റൺ ഔട്ട്‌ ആക്കാനും ശ്രീശാന്തിന് സാധിച്ചു, ഇന്നത്തെ മത്സരം ജയിക്കുന്ന ടീമിന് ഫൈനലിലേക്ക് മുന്നേറാം.