2021ലെ ടി20 ലോകക്കപ്പിന് ശേഷം ഇന്ത്യയും പാകിസ്ഥാനും തമ്മിൽ അന്താരാഷ്ട്ര ക്രിക്കറ്റിൽ വീണ്ടും നേർക്കുനേർ വരികയാണ്. 28ന് നടക്കുന്ന മത്സരത്തിലാണ് ചിരകാലിക വൈരാകികൾ ഏറ്റുമുട്ടുന്നത്. ഇരു ടീമുകളും പരിശീലന തിരക്കിലാണ്. എന്നാൽ ഇതിനിടെ പരിക്കേറ്റ് ഏഷ്യക്കപ്പിനുള്ള പാക് ടീമിൽ നിന്ന് പുറത്തായ ഷഹീൻ അഫ്രീദിയെ കാണാൻ എത്തിയ ഇന്ത്യൻ താരങ്ങളുടെ വീഡിയോ സോഷ്യൽ മീഡിയയിൽ വൈറലാണ്.
ടീമിൽ നിന്ന് പുറത്താണെങ്കിലും ഷഹീൻ അഫ്രീദി ടീമിനൊപ്പം യുഎഇയിൽ തന്നെയാണ്. പരിശീലനത്തിനായി ഗ്രൗണ്ടിൽ എത്തിയ ഇന്ത്യൻ താരങ്ങളായ കോഹ്ലി, ചാഹൽ, റിഷഭ് പന്ത്, കെഎൽ രാഹുൽ എന്നിവർ വിശേഷങ്ങൾ തിരക്കുന്നതും ചിരി പങ്കിടുന്നതും വീഡിയോയിൽ കാണാം.
ഈ കൂടിക്കാഴ്ചയുടെ വീഡിയോ പാകിസ്ഥാൻ ക്രിക്കറ്റ് ബോർഡാണ് സോഷ്യൽ മീഡിയയിൽ ഷെയർ ചെയ്തത്, നിമിഷങ്ങൾക്കകം തന്നെ വീഡിയോ തരംഗമാവുകയായിരുന്നു. ഇക്കഴിഞ്ഞ ശ്രീലങ്കയ്ക്കെതിരായ ടെസ്റ്റ് മത്സരത്തിനിടെ ഫീൽഡിങ്ങിനിടെയാണ് ഷഹീൻ അഫ്രീദിക്ക് കാലിന് പരിക്കേറ്റത്.
ഏഷ്യാ കപ്പ് ടീമിൽ ഷഹീന്റെ അഭാവം പാകിസ്ഥാൻ ടീമിന് കനത്ത തിരിച്ചടിയാണ്. ബാബർ അസം കൂട്ടരും അവസാനമായി ഇന്ത്യയെ നേരിട്ടപ്പോൾ ഇന്ത്യൻ മുൻനിരയെ തകർത്തത് ഈ ഇടങ്കയ്യൻ സ്പീഡ്സ്റ്ററായിരുന്നു. കഴിഞ്ഞ വർഷത്തെ ടി20 ലോകകപ്പിലെ ഗ്രൂപ്പ് ഘട്ടത്തിൽ ഇന്ത്യ-പാക് പോരാട്ടത്തിനിടെ ഇന്ത്യയുടെ രോഹിത് ശർമ്മ, കെഎൽ രാഹുൽ, വിരാട് കോഹ്ലി എന്നിവരെ പുറത്താക്കി ഷഹീൻ മികച്ച പ്രകടനം നടത്തിയിരുന്നു.