ഇന്നലെ നടന്ന മത്സരത്തിൽ ഓസ്ട്രേലിയയെ 6 വിക്കറ്റിന് പരാജയപ്പെടുത്തി ടീം ഇന്ത്യ ട്വന്റി ട്വന്റി പരമ്പര 2-1 ന് സ്വന്തമാക്കിയിരുന്നു. പന്തുകൊണ്ട് അക്‌സർ പട്ടേലും ബാറ്റുകൊണ്ട് സൂര്യകുമാർ യാദവ്, വിരാട് കോഹ്ലി, ഹാർദിക് പാണ്ഡ്യ എന്നിവർ തിളങ്ങിയപ്പോൾ ഒരു പന്ത് ബാക്കി നിൽക്കെയായിരുന്നു ഇന്ത്യയുടെ വിജയം.
ടോസ് നഷ്ടപ്പെട്ട് ആദ്യം ബാറ്റിങ്ങിന് ഇറങ്ങിയ ഓസ്ട്രേലിയ, 19 പന്തിൽ അർദ്ധ സെഞ്ചുറി നേടിയ ഓപ്പണർ കാമറൂൺ ഗ്രീൻ, ഓൾറൗണ്ടർ ടിം ഡേവിഡ് എന്നിവരുടെ മികവിലാണ് നിശ്ചിത ഇരുപത് ഓവറിൽ 7 വിക്കറ്റ് നഷ്ടത്തിൽ 186 റൺസ് എടുത്തത്. മറുപടി ബാറ്റിംഗിനിറങ്ങിയ ഇന്ത്യ നാല് വിക്കറ്റ് നഷ്ടത്തിൽ ഇരുപതാം ഓവറിന്റെ അഞ്ചാം പന്തിൽ വിജയലക്ഷ്യം മറികടന്നു.
രാഹുലും രോഹിതും പെട്ടെന്ന് മടങ്ങിയപ്പോൾ ഇന്ത്യക്കായി മൂന്നാം വിക്കറ്റിൽ ഒത്തുചേർന്ന കോഹ്‌ലിയും സൂര്യയും സെഞ്ചുറി കൂട്ടുകെട്ട് സൃഷ്ടിച്ചു. 36 പന്തിൽ അഞ്ചുവീതം ഫോറും സിക്സും പായിച്ച് 69 റൺസ് സൂര്യ നേടിയപ്പോൾ 48 പന്തിൽ നിന്നും 3 ഫോറൂം 4 സിക്സും അടക്കം 63 റൺസാണ് കോഹ്ലി എടുത്തത്. 16 പന്തിൽ 25 റൺസോടെ പുറത്താകാതെ നിന്ന ഹാർദിക് പാണ്ഡ്യയാണ് ഇന്ത്യയുടെ വിജയറൺ നേടിയത്. അവസാന ഓവറിൽ ജയിക്കാൻ 11 റൺസ് വേണ്ടപ്പോൾ ആദ്യ പന്തിൽ തന്നെ സിക്സ് നേടിയ കോഹ്ലി ഇന്ത്യൻ ടീമിന്റെ വിജയപ്രതീക്ഷ ഉയർത്തിയ ശേഷമാണ് അടുത്ത പന്തിൽ എക്സ്ട്രാ കവറിൽ ഓസീസ് നായകൻ ആരോൺ ഫിഞ്ചിന് ക്യാച്ച് നൽകി പുറത്തായത്.
191.67 എന്ന സ്ട്രൈക്ക് റേറ്റിൽ വെടിക്കെട്ട് ബാറ്റിംഗ് പ്രകടനം കാഴ്ചവെച്ച സൂര്യകുമാർ യാദവ് കളിയിലെ താരമായി തിരഞ്ഞെടുക്കപ്പെട്ടു. 3 മത്സരങ്ങളിൽ നിന്നും 8 വിക്കറ്റ് വീഴ്ത്തിയ സ്പിന്നർ അക്‌സർ പട്ടേൽ പരമ്പരയുടെ താരമായും തിരഞ്ഞെടുക്കപ്പെട്ടു. സൂപ്പർ താരം വിരാട് കോഹ്‌ലിക്കും മത്സരശേഷം ഒരു പ്രത്യേക അവാർഡ് ലഭിക്കുകയുണ്ടായി.
പരമ്പരയിലെ ഏറ്റവും ഊർജ്ജസ്വലനായ താരത്തിനുള്ള അവാർഡ് ആയിരുന്നു അത്. ആദ്യ മത്സരത്തിൽ വെറും 2 റൺസും രണ്ടാം മത്സരത്തിൽ വെറും 11 റൺസും മാത്രം നേടിയ കോഹ്ലി ഇന്നലെ മികച്ചൊരു അർദ്ധസെഞ്ചുറി നേട്ടം കുറിച്ച് ഫോമിലേക്ക് മടങ്ങിയെത്തി. മൂന്ന് മത്സരങ്ങളിലും ഗ്രൗണ്ടിൽ വളരെ ഉത്സാഹവാനായി കാണപ്പെട്ട കോഹ്ലി മികച്ച ചില ക്യാച്ചുകൾ എടുക്കുകയും റൺഔട്ട് അവസരങ്ങൾ ഒത്തിരി നേടുകയും ചെയ്തിരുന്നു.
അവാർഡ് സ്വീകരിച്ച ശേഷം മടങ്ങുംവഴി ഹാസ്യാത്മകമായി ഒരു ചെറിയ ഓട്ടവും താരം നടത്തിയിരുന്നു. കൊച്ചു കുട്ടികളെ പോലെ തുള്ളിച്ചാടി വരുന്ന കോഹ്‌ലിയുടെ എനർജെറ്റിക് വീഡിയോ ഇപ്പോൾ സമൂഹമാധ്യമങ്ങളിൽ തരംഗമായിക്കൊണ്ടിരിക്കുകയാണ്. ഇത് കണ്ടുനിന്ന ഇന്ത്യൻ ടീമിലെ സഹതാരങ്ങളും ഓസ്ട്രേലിയൻ താരങ്ങളും കോഹ്‌ലിയുടെ അപ്രതീക്ഷിത പ്രകടനത്തിൽ ചിരിച്ചുപോയി.