ഇന്നലെ ന്യൂസിലൻഡിനെ 168 റൺസിന് തകർത്ത് ട്വന്റി ട്വന്റി പരമ്പര വിജയം നേടിയതിന്റെ ആഘോഷത്തിലാണ് ഇന്ത്യൻ ആരാധകർ. അഹമ്മദാബാദിൽ നടന്ന മത്സരത്തിൽ ടോസ് നേടി ആദ്യം ബാറ്റ് ചെയ്ത ഇന്ത്യ ഓപ്പണർ ഗിൽ പുറത്താകാതെ നേടിയ 126 റൺസിന്റെ മികവിൽ നിശ്ചിത 20 ഓവറിൽ 4 വിക്കറ്റ് നഷ്ടത്തിൽ 234 റൺസ് എടുത്തിരുന്നു. ന്യൂസിലൻഡിന്റെ മറുപടി 12.1 ഓവറിൽ വെറും 66 റൺസിൽ ഒതുങ്ങി. നാല് വിക്കറ്റ് വീഴ്ത്തിയ നായകൻ പാണ്ഡ്യ പരമ്പരയിലെ താരമായി തിരഞ്ഞെടുക്കപ്പെട്ടപ്പോൾ തകർപ്പൻ സെഞ്ചുറി നേടിയ ഗിൽ കളിയിലെ താരമായി തിരഞ്ഞെടുക്കപ്പെട്ടു.
ഓപ്പണർ ഇഷാൻ കിഷൻ രണ്ടാം ഓവറിൽ മടങ്ങിയെങ്കിലും ഗിൽ, ത്രിപാഠിയുമൊത്ത രണ്ടാം വിക്കറ്റ് കൂട്ടുകെട്ടിൽ 80 റൺസ് ചേർത്തു. 22 പന്തിൽ 44 റൺസ് എടുത്ത ത്രിപാഠി മടങ്ങിയശേഷം 23 റൺസ് എടുത്ത സൂര്യകുമാർ യാദവിനൊപ്പം 38 റൺസ് കൂട്ടുകെട്ടിലും അതിനുശേഷം എത്തിയ 30 റൺസ് എടുത്ത നായകൻ പാണ്ഡ്യക്കൊപ്പം 103 റൺസ് കൂട്ടുകെട്ടിലും ഗിൽ പങ്കുചേർന്നിരുന്നു. ആദ്യം പതിഞ്ഞ താളത്തിൽ തുടങ്ങിയശേഷം അവസാന ഓവറുകളിൽ കത്തിക്കയറിയ ഇന്നിങ്സ് ആയിരുന്നു ഗിൽ കളിച്ചത്. സെഞ്ചുറി നേടിയശേഷവും വമ്പനടികൾ തുടർന്ന ഗിൽ, ട്വന്റി ട്വന്റി ക്രിക്കറ്റിലെ ഒരു ഇന്ത്യൻ താരത്തിന്റെ ഏറ്റവും ഉയർന്ന വ്യക്തിഗത സ്കോറിനുള്ള റെക്കോർഡും സ്വന്തം പേരിലാക്കി.
ഇന്നലെ മത്സരം കഴിഞ്ഞ് കിരീടം ഏറ്റുവാങ്ങിയ ശേഷം നായകൻ ഹാർദിക് പാണ്ഡ്യ തന്റെ മുൻ നായകരെപ്പോലെ ടീമിലെ യുവതാരത്തിന് ട്രോഫി ഉയർത്താനായി നൽകുന്ന പതിവ് തുടർന്നിരുന്നു. ഇത്തവണ ഇന്ത്യൻ സ്ക്വാഡിലെ ഏറ്റവും ചെറുപ്പമായ പൃഥ്വി ഷായ്ക്കാണ് അവസരം ലഭിച്ചത്. പാണ്ഡ്യയുടെ കയ്യിൽനിന്നും അത് ഏറ്റുവാങ്ങുന്ന സമയത്തെ പൃഥ്വിയുടെ റിയാക്ഷനാണ് ഇപ്പോൾ സമൂഹമാധ്യമങ്ങളിൽ വൈറൽ ആയിക്കൊണ്ടിരിക്കുന്നത്. താൻ വിചാരിച്ചതിലും അധികം ഭാരം ഉണ്ടായപ്പോൾ അദ്ദേഹം ഒരു അമ്പരപ്പോടെ നിൽക്കുന്ന ദൃശ്യങ്ങളാണ് അത്. പരമ്പരയിലെ മൂന്ന് മത്സരങ്ങളിലും അവസരം ലഭിക്കാതിരുന്ന അദ്ദേഹം പക്ഷേ ഡഗ് ഔട്ടിൽ വളരെ ഉന്മേഷവാനായി കാണപ്പെട്ടിരുന്നു.