ലണ്ടനിലെ ഓവൽ സ്റ്റേഡിയത്തിൽ നടക്കുന്ന ലോക ടെസ്റ്റ് ചാമ്പ്യൻഷിപ്പ് ഫൈനൽ മൂന്നാം ദിവസത്തിലേക്ക് കടക്കുമ്പോൾ, മത്സരം എങ്ങോട്ടാണ് നീങ്ങുന്നത് എന്ന കാര്യത്തിൽ ഇന്ന് കൂടുതൽ വ്യക്തത വരും. ഓസ്ട്രേലിയയുടെ 469 റൺസെന്ന കൂറ്റൻ ഒന്നാം ഇന്നിംഗ്സ് സ്കോർ പിന്തുടരുന്ന ടീം ഇന്ത്യ, രണ്ടാം ദിനം കളി നിർത്തുമ്പോൾ 5 വിക്കറ്റ് നഷ്ടത്തിൽ 151 റൺസ് എന്ന നിലയിലാണ്. ഓസ്ട്രേലിയൻ സ്കോറിന് ഒപ്പമെത്താൻ ഇന്ത്യക്ക് ഇനിയും 318 റൺസ് കൂടി വേണം.
ഒന്നാം ഇന്നിംഗ്സിൽ ബാറ്റിംഗിനിറങ്ങിയ ഇന്ത്യ 71/4 എന്ന നിലയിൽ തകർന്നപ്പോൾ, രഹാനെയും ജഡേജയും ചേർന്ന് അർദ്ധസെഞ്ചുറി കൂട്ടുകെട്ട് സൃഷ്ടിച്ചു. 48 റൺസുമായി മടങ്ങിയ ജഡേജ, ഇന്ത്യൻ നിരയിൽ ടോപ് സ്കോററായി. 29 റൺസോടെ രഹാനെയും 5 റൺസോടെ ഭരത്തുമാണ് ക്രീസിൽ. നേരത്തെ ഒന്നാം ഇന്നിംഗ്സിൽ 163 റൺസെടുത്ത ട്രവിസ് ഹെഡ്, 121 റൺസെടുത്ത സ്മിത്ത്, 48 റൺസെടുത്ത അലക്സ് കാരി എന്നിവരുടെ പ്രകടനമാണ് ഓസീസിനെ കൂറ്റൻ സ്കോറിലേക്ക് നയിച്ചത്. ഇന്ത്യക്കായി സിറാജ് 4 വിക്കറ്റ് വീഴ്ത്തിയപ്പോൾ, ഷമിയും താക്കൂറും 2 വിക്കറ്റ് വീതവും വീഴ്ത്തി.
അതിനിടെ മത്സരത്തിൽ ഇന്ത്യൻ നായകൻ രോഹിത് ശർമ സഹതാരങ്ങളെ മോശം ഭാഷയിൽ അഭിസംബോധന ചെയ്ത പ്രവർത്തി, സമൂഹമാധ്യമങ്ങളിൽ വൻ വിവാദമായിരിക്കുകയാണ്. ഓസ്ട്രേലിയൻ ഒന്നാം ഇന്നിംഗ്സ് ബാറ്റിംഗ് സമയത്ത്, തുടക്കത്തിൽ 3 വിക്കറ്റുകൾ നഷ്ടപ്പെട്ടശേഷം, സ്മിത്തും ഹെഡും ചേർന്ന കൂട്ടുകെട്ട് ഇന്ത്യക്ക് നിരാശയാണ് സമ്മാനിച്ചത്. എത്ര പരിശ്രമിച്ചിട്ടും ഇരുവരെയും പുറത്താക്കാൻ കഴിയാത്തതിൽ നായകൻ രോഹിത് ശർമ അസ്വസ്ഥനായിരുന്നു. ബോളർമാർ എറിഞ്ഞ് തളരുകയും ഫീൽഡർമാർ അലസരായി നിൽക്കുകയും ചെയ്തു. അന്നേരമാണ് ജഡേജ എറിഞ്ഞ ഒരു ഓവറിനിടെ രോഹിത്, ഹിന്ദിയിൽ മോശം പദപ്രയോഗങ്ങൾകൊണ്ട് ഗില്ലിനെയും പൂജാരയെയുമൊക്കെ വിളിക്കുന്നത്.
വീഡിയോ..