ഏഷ്യ കപ്പ് ക്രിക്കറ്റ് ടൂർണമെൻ്റിൽ സൂപ്പർ ഫോർ ഘട്ടത്തിൽ എല്ലാവരും കാത്തിരുന്ന ഇന്ത്യ പാക്കിസ്ഥാൻ പോരാട്ടം ഇന്നലെ മഴമൂലം തടസ്സപ്പെട്ടിരുന്നു. ടൂർണമെൻ്റിൻ്റെ തുടക്കത്തിൽ ഇരു ടീമുകളും ഏറ്റുമുട്ടിയ അവസരത്തിൽ മഴ മൂലം മത്സരം ഉപേക്ഷിക്കുകയാണ് ഉണ്ടായത്. അതുകൊണ്ട് തന്നെ സൂപ്പർ ഫോർ ഘട്ടത്തിൽ ഇന്ത്യ പാക്കിസ്ഥാൻ മത്സരത്തിന് റിസർവ്വ് ദിനം അനുവദിച്ചു. അതിനാൽ ഇന്നലെ കളി നിർത്തുമ്പോൾ ഉള്ള സ്കോറിൽ നിന്നും ഇന്ന് മത്സരം പുനരാരംഭിക്കും.
ഇന്നലെ മത്സരത്തിൽ ടോസ് നേടിയ പാക്ക് നായകൻ ബാബർ അസം ഫീൽഡിംഗ് തെരഞ്ഞെടുക്കുകയായിരുന്നു. നായകൻ രോഹിത് ഒരുവശത്ത് ശ്രദ്ധയോടെ തുടങ്ങിയപ്പോൾ, മറുവശത്ത് ഗിൽ ആക്രമിച്ചുകളിച്ചു. പതിയെ രോഹിതും ഷോട്ടുകൾ കളിച്ചുതുടങ്ങിയതോടെ പാക്ക് ബോളർമാർ വിയർത്തു. ഒന്നാം വിക്കറ്റിൽ 16.4 ഓവറിൽ 121 റൺസാണ് ഇരുവരും ചേർന്ന് നേടിയത്. രോഹിത് 56 റൺസും ഗിൽ 58 റൺസും എടുത്ത് പുറത്തായി. മഴമൂലം കളി നിർത്തുമ്പോൾ 24.1 ഓവറിൽ 147/2 എന്ന നിലയിലാണ് ഇന്ത്യ. 17 റൺസുമായി രാഹുലും 8 റൺസുമായി കോഹ്‌ലിയും ക്രീസിലുണ്ട്.
അതിനിടെ ഇന്ത്യൻ പേസർ ജസ്പ്രീത് ബൂംറയ്ക്ക് ഒരു സ്പെഷ്യൽ സമ്മാനവുമായി എത്തിയ പാക്ക് പേസർ ഷഹീൻ അഫ്രീദിയുടെ വീഡിയോയാണ് ഇപ്പോൾ ഇൻ്റർനെറ്റിൽ തരംഗമായി മാറിയിരിക്കുന്നത്. മത്സരശേഷം താരങ്ങൾ മടങ്ങുന്ന സമയത്ത് കയ്യിൽ ഒരു പൊതിയുമായി അഫ്രീദി വരുന്നു. ബൂംറ അച്ഛനായതിൻ്റെ സന്തോഷത്തിന് ഒരു ചെറിയ ഗിഫ്റ്റ്.
ഇരുവരും അൽപനേരം സംസാരിച്ച് ഗിഫ്റ്റ് കൈമാറുന്നു. ആദ്യ മത്സരത്തിൽ പാകിസ്ഥാന് എതിരെ ടീമിൽ ഉണ്ടായിരുന്ന ബൂംറ, നേപ്പാളിന് എതിരായ മത്സരത്തിന് മുൻപ് കുഞ്ഞിൻ്റെ ജനനത്തിനായി നാട്ടിലേക്ക് മടങ്ങിയിരുന്നു. കഴിഞ്ഞ ദിവസമാണ് താരം തിരിച്ചെത്തിയത്. പാക്കിസ്ഥാൻ ക്രിക്കറ്റ് ടീം തന്നെയാണ് ഈ മനോഹര വീഡിയോ തങ്ങളുടെ സമൂഹമാധ്യമങ്ങളിൽ പങ്കുവെച്ചത്.
വീഡിയോ കാണാം..