Month: April 2023

ഇന്ന് രാത്രി ബംഗളൂരു ചിന്നസ്വാമി സ്റ്റേഡിയത്തിൽ നടക്കുന്ന മത്സരത്തിൽ ബംഗളൂരു കൊൽക്കത്തയെ നേരിടുകയാണ്. മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ കൊൽക്കത്ത കൂറ്റൻ സ്കോർ കണ്ടെത്തിയിരിക്കുകയാണ്. നിശ്ചിത 20 ഓവറിൽ അവർ 5 വിക്കറ്റ് നഷ്ടത്തിൽ 200 റൺസാണ് നേടിയത്. പരുക്ക് ഭേദമാകാത്ത ഡു പ്ലസിയ്ക്ക്‌ പകരം ഇന്നും വിരാട് കോഹ്‌ലി തന്നെയാണ് ബംഗളൂരുവിനെ നയിക്കുന്നത്.

ഒന്നാം വിക്കറ്റിൽ ഓപ്പണർമാരായ ജസൻ റോയിയും ജഗദീശനും ചേർന്ന കൂട്ടുകെട്ട് 83 റൺസ് എടുത്ത് മികച്ച തുടക്കം സമ്മാനിച്ചു. ജഗദീശൻ 27 റൺസും, റോയ് 56 റൺസും എടുത്തു. ഇരുവരും പുറത്തായശേഷം എത്തിയ വെങ്കടേശ് അയ്യരും നായകൻ നിതീഷ് റാണയും മൂന്നാം വിക്കറ്റിൽ 80 റൺസിന്റെയും കൂട്ടുകെട്ട് സൃഷ്ടിച്ചു. അയ്യർ 31 റൺസും റാണ 48 റൺസുമാണ് നേടിയത്. പുറത്താകാതെ നിന്ന 10 പന്തിൽ 18 റൺസെടുത്ത റിങ്കു സിംഗും 3 പന്തിൽ 12 റൺസെടുത്ത ഡേവിഡ് വീസും ചേർന്നാണ് സ്കോർ ഇരുന്നൂറിൽ എത്തിച്ചത്.

അതിനിടെ മത്സരത്തിൽ ബംഗളൂരുവിനെ നയിക്കുന്ന വിരാട് കോഹ്‌ലി പേസർ ഹർഷൽ പട്ടേലിനെ ദഹിപ്പിക്കുന്ന നോട്ടം നോക്കിയതിന്റെ വീഡിയോ ഇപ്പോൾ സമൂഹമാധ്യമങ്ങളിൽ തരംഗമായി മാറിയിരിക്കുകയാണ്. മത്സരത്തിൽ അവസാന ഓവറിൽ പട്ടേൽ 15 റൺസാണ് വഴങ്ങിയത്. അവസാന പന്തിൽ സ്ട്രൈക്കിൽ ഉണ്ടായിരുന്നത് നല്ല ഉയരക്കാരനായ നമീബിയൻ താരം ഡേവിഡ് വീസ് ആയിരുന്നു. എങ്കിലും യോർക്കറിന് ശ്രമിക്കാതെ ഹർഷൽ ഷോർട്ട് പിച്ച് പന്ത് ഏറിഞ്ഞപ്പോൾ, വീസ് അനായാസം തേർഡ് മാനിലേക്ക് പന്ത് കോരിയിട്ടു സിക്സ് നേടുകയായിരുന്നു. അപ്പോഴാണ് വിരാട് കോഹ്‌ലി ഹർഷലിനെ അപ്രകാരം നോക്കിക്കൊണ്ട് മൈതാനം വിട്ടുപോകുന്നത്. മത്സരത്തിൽ 4 ഓവറിൽ 44 റൺസ് വഴങ്ങിയ പട്ടേലിന്, വിക്കറ്റ് ഒന്നും ലഭിച്ചതുമില്ല.

ഇന്നലെ രാത്രി അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ നിലവിലെ ചാമ്പ്യന്മാരായ ഗുജറാത്ത് ടൈറ്റൻസ് അഞ്ചുതവണ ജേതാക്കളായ മുംബൈ ഇന്ത്യൻസിനെ 55 റൺസിന് കീഴടക്കിയിരുന്നു. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഗുജറാത്ത് നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 207 റൺസെന്ന കൂറ്റൻ ടോട്ടൽ കണ്ടെത്തി. മറുപടി ബാറ്റിങ്ങിൽ മുംബൈയ്ക്ക് 20 ഓവറിൽ 9 വിക്കറ്റ് നഷ്ടത്തിൽ 152 റൺസ് എടുക്കാനേ കഴിഞ്ഞുള്ളൂ. മൂന്ന് വിക്കറ്റുമായി സ്പിന്നർ നൂർ അഹമ്മദ് തിളങ്ങിയപ്പോൾ, രണ്ട് വിക്കറ്റ് വീതം വീഴ്ത്തിയ റാഷിദ് ഖാനും മോഹിത് ശർമയും മികച്ച പിന്തുണ നൽകി.

നേരത്തെ ആദ്യ ബാറ്റിങ്ങിൽ 56 റൺസെടുത്ത ഓപ്പണർ ഗിൽ ഗുജറാത്തിന് മികച്ച തുടക്കം സമ്മാനിച്ചു. എങ്കിലും മറ്റുള്ള ടോപ് ഓർഡർ താരങ്ങളുടെ മോശം ഫോം മൂലം, സ്കോർ 12 ഓവറിൽ 100/4 എന്ന നിലയിലായിരുന്നു. തുടർന്ന് അവസാന ഓവറുകളിൽ വെടിക്കെട്ട് ബാറ്റിംഗ് കാഴ്ച്ചവെച്ച മില്ലറിന്റെയും അഭിനവ് മനോഹറിന്റെയും രാഹുൽ തേവാത്തിയയുടെയും ഇന്നിങ്സ്സുകളാണ് അവരെ ഇരുനൂറ് കടത്തിയത്. മില്ലർ 22 പന്തിൽ 46 റൺസും, മനോഹർ 21 പന്തിൽ 42 റൺസും തെവാത്തിയ 5 പന്തിൽ മൂന്നു സിക്സടക്കം പുറത്താകാതെ 20 റൺസുമാണ് നേടിയത്.

മുംബൈ നിരയിൽ 21 പന്തിൽ നിന്നും മൂന്നു വീതം ഫോറും സിക് സും അടക്കം 40 റൺസെടുത്ത നേഹാൾ വാധേരയാണ് ടോപ് സ്കോററായത്. എങ്കിലും ഇപ്പോൾ സമൂഹമാധ്യമങ്ങളിൽ അദ്ദേഹം മുംബൈ ആരാധകരുടെ വിമർശനങ്ങൾ ഏറ്റുവാങ്ങിക്കൊണ്ടിരിക്കുകയാണ്. ഇന്നലെത്തെ മുംബൈ ബാറ്റിങ്ങിന് ഇടയിലുണ്ടായ ചില സംഭവങ്ങളാണ് അതിന് കാരണം. പതിമൂന്നാം ഓവറിൽ സൂര്യകുമാർ പുറത്താകുമ്പോൾ സ്കോർ 90/6. പിന്നീടെത്തിയ പിയുഷ് ചൗള ഭേദപ്പെട്ട ബാറ്റിംഗ് കാഴ്ച്ചവെച്ചിരുന്നു. 12 പന്തിൽ 18 റൺസെടുത്ത ചൗളയെ പതിനെട്ടാം ഓവറിന്റെ ആദ്യ പന്തിൽ ഇല്ലാത്ത റണ്ണിനായി ഓടിച്ച വദ്ദേര പുറത്താക്കി.

തൊട്ടടുത്ത പന്തിൽ സിംഗിൾ ഓടാൻ അവസരം ലഭിച്ചിട്ടും വധേര ഓടാൻ കൂട്ടാക്കിയില്ല. എങ്കിലും നോൺസ്ട്രൈക്കർ എൻഡിൽ ഉണ്ടായിരുന്ന അർജുൻ ടെൻഡുൽക്കർ ഓട്ടം തുടർന്ന് ബാറ്റിംഗ് എൻഡിൽ എത്തിയതോടെ അദ്ദേഹത്തിന് സിംഗിൾ ഓടെണ്ടിവന്നു. തുടർന്ന് ആ ഓവറിലെ നാലാം പന്തിൽ സ്ട്രൈക്ക് ലഭിച്ചപ്പോൾ അദ്ദേഹം പുറത്താവുകയും ചെയ്തു. അർജുൻ ടെൻഡുൽക്കർ ആകട്ടെ, അടുത്ത ഓവറിൽ ഒരു കിടിലൻ സിക്സ് നേടിയത് കാണികൾ വളരെ ആവേശത്തോടെയാണ് സ്വീകരിച്ചത്. അർജുന്റെ ഐപിഎൽ കരിയറിലെ ആദ്യ സിക്സ്!.

ഇന്നലെ ഹൈദരാബാദിലെ രാജീവ് ഗാന്ധി അന്താരാഷ്ട്ര സ്റ്റേഡിയത്തിൽ നടന്ന ഐപിഎൽ പോയിന്റ് പട്ടികയിലെ അവസാനസ്ഥാനക്കാരുടെ പോരാട്ടത്തിൽ ‍ഡൽഹി ക്യാപിറ്റൽസിന് 7 റൺസിന്റെ ആവേശവിജയം. മത്സരത്തിൽ ടോസ് നേടി ആദ്യം ബാറ്റിംഗിനിറങ്ങിയ ‍ഡൽഹി നിശ്ചിത 20 ഓവറിൽ 9 വിക്കറ്റ് നഷ്ടത്തിൽ 144 റൺസാണ് നേടിയത്. ഹൈദരാബാദിന്റെ മറുപടി 20 ഓവറിൽ 137/6 എന്ന നിലയിൽ അവസാനിക്കുകയായിരുന്നു. ബാറ്റുകൊണ്ടും പന്തുകൊണ്ടും തിളങ്ങിയ സ്പിന്നർ അക്ഷർ പട്ടേലാണ് കളിയിലെ താരമായി തിരഞ്ഞെടുക്കപ്പെട്ടത്.

ആദ്യ ബാറ്റിങ്ങിൽ ‍ഡൽഹി ഓപ്പണർ ഫിൽ സാൾട്ടിനെ ഭുവനേശ്വർ പൂജ്യത്തിന് പുറത്താക്കി. എങ്കിലും വാർണറും മിച്ചൽ മാർഷും ചേർന്ന് അവരെ മുന്നോട്ടുനയിച്ചു. 15 പന്തിൽ 5 ബൗണ്ടറിയടക്കം 25 റൺസോടെ നന്നായി തുടങ്ങിയ മാർഷിനെ നടരാജൻ വിക്കറ്റിന് മുന്നിൽ കുരുക്കി. പിന്നീട് ‍ഡൽഹിയ്‌ക്ക് ബാറ്റിംഗ് തകർച്ചയായിരുന്നു. വാഷിങ്ടൺ സുന്ദർ എറിഞ്ഞ എട്ടാം ഓവറിൽ വാർണറും, സർഫറാസ് ഖാനും, അമൻ ഖാനും അടക്കം 3 വിക്കറ്റുകളാണ് വീഴ്ത്തിയത്. അതോടെ എട്ടോവറിൽ 62/5 എന്ന നിലയിലായ ‍ഡൽഹിയെ ഭേദപ്പെട്ട സ്കോർ കണ്ടെത്താൻ സഹായിച്ചത്‌ 34 റൺസ് വീതമെടുത്ത അക്ഷർ പട്ടേലിന്റെയും മനീഷ് പാണ്ഡെയുടെയും ഇന്നിങ്സുകളാണ്.

മറുപടി ബാറ്റിങ്ങിൽ ഹൈദരാബാദ് ടീമിന്റെയും സ്ഥിതി സമാനമായിരുന്നു. ഓപ്പണർ ഹാരി ബ്രൂക്ക് 14 പന്തിൽ 7 റൺസുമായി പുറത്ത്. പിന്നീട് ഇംപാക്ട് പ്ലെയറായി ഇറങ്ങിയ രാഹുൽ ത്രിപാഠിയാകട്ടെ 21 പന്തിൽ 15 റൺസാണ് നേടിയത്. ഭേദപ്പെട്ട പ്രകടനം കാഴ്ചവെച്ച മയാങ്ക്‌ അഗർവാൾ അർദ്ധസെഞ്ചുറിയ്‌ക്ക് ഒരു റൺ മാത്രം അകലെയും പുറത്തായി. അഭിഷേക് ശർമ 5 റൺസും നായകൻ മാർക്രം 3 റൺസും എടുത്തുമടങ്ങി. എങ്കിലും 19 പന്തിൽ 31 റൺസെടുത്ത വിക്കറ്റ് കീപ്പർ ക്ലാസ്സനും 15 പന്തിൽ 24 റൺസോടെ പുറത്താകാതെ നിന്ന വാഷിങ്ടൺ സുന്ദറും അവസാനം വരെ പോരാടി. പക്ഷേ സമചിത്തതയോടെ പന്തെറിഞ്ഞ ഡൽഹി ബോളർമാർ മത്സരം തങ്ങളുടെ വരുതിയിലാക്കി.

ഇന്നലെ മത്സരം ആരംഭിക്കുന്നതിന് മുൻപായി നടന്ന ഒരു അപൂർവനിമിഷം ഇന്റർനെറ്റിൽ തരംഗമായി മാറിയിരിക്കുകയാണ്. ഡൽഹി ക്യാപിറ്റൽസ് നായകനായ ഡേവിഡ് വാർണർ, സൺറൈസേഴ്സ് ഹൈദരാബാദ് പേസറായ ഭുവനേശ്വർ കുമാറിന്റെ കാൽതൊട്ടു വന്ദിക്കുന്നതാണ് വീഡിയോ. ഐപിഎല്ലിന്റെ സമൂഹമാധ്യമ അക്കൗണ്ടുകളിലാണ് ആദ്യം ഇത് പ്രത്യക്ഷപ്പെട്ടത്. മത്സരത്തിന് ടീമുകൾ തയ്യാറെടുക്കുമ്പോൾ ഡൽഹി താരമായ ഇഷാന്ത് ശർമയും ഹൈദരാബാദ് താരമായ ഭുവിയും സംസാരിച്ചുനിൽക്കുകയായിരുന്നു. അവിടേക്ക് ഓടിയെത്തിയ ‍ഡൽഹി നായകൻ വാർണർ, ഭുവിയുടെ കാൽതൊട്ടുവണങ്ങിയാണ് സംസാരം തുടങ്ങിയത്. മുൻപ് വാർണറും ഭൂവിയും ഹൈദരാബാദിൽ ഒന്നിച്ച് കളിച്ചവരാണ്.

View this post on Instagram

A post shared by IPL (@iplt20)

ഇന്നലെ കൊൽക്കത്ത നൈറ്റ് റൈഡേഴ്സിനെതിരെ ഈഡൻ ഗാർഡൻസിൽ നടന്ന മത്സരത്തിൽ, ചെന്നൈ സൂപ്പർ കിംഗ്സ് 49 റൺസിന്റെ വിജയം സ്വന്തമാക്കിയിരുന്നു. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ചെന്നൈ നിശ്ചിത 20 ഓവറിൽ 4 വിക്കറ്റ് നഷ്ടത്തിൽ 235 റൺസ് നേടിയപ്പോൾ, കൊൽക്കത്തയ്ക്ക് 8 വിക്കറ്റ് നഷ്ടത്തിൽ 186 റൺസെടുക്കാനേ കഴിഞ്ഞുള്ളൂ. 26 പന്തിൽ 61 റൺസെടുത്ത ജേസൺ റോയും 33 പന്തിൽ 53 റൺസോടെ പുറത്താകാതെ നിന്ന റിങ്കു സിംഗും പൊരുതിനോക്കിയെങ്കിലും വിജയത്തിന് അത് മതിയായിരുന്നില്ല.

ചെന്നൈ നിരയിൽ 29 പന്തിൽ നിന്നും 71 റൺസോടെ പുറത്താകാതെ നിന്ന അജിൻക്യ രഹാനെയാണ് കളിയിലെ താരമായി തിരഞ്ഞെടുക്കപ്പെട്ടത്. ഒന്നാം വിക്കറ്റിൽ 7.3 ഓവറിൽ 73 റൺസ് കൂട്ടിച്ചേർത്ത് ഋതുരാജ് ഗായക്വാദും കോൺവെയും മിന്നുന്ന തുടക്കംകുറിച്ചു. 35 റൺസെടുത്ത ഋതുരാജ് മടങ്ങിയശേഷമാണ് രഹാനെ ക്രീസിൽ എത്തിയത്‌. രണ്ടാം വിക്കറ്റിൽ കോൺവേക്കൊപ്പം 36 റൺസും, മൂന്നാം വിക്കറ്റിൽ ദുബെയ്ക്കൊപ്പം 85 റൺസും, നാലാം വിക്കറ്റിൽ ജഡേജയ്‌ക്കൊപ്പം 38 റൺസും രഹാനെ കൂട്ടുകെട്ട് സൃഷ്ടിച്ചു. ഓപ്പണർ കോൺവേ 40 പന്തിൽ 56 റൺസും, ശിവം ദുബേ 21 പന്തിൽ 50 റൺസും, ജഡേജ 8 പന്തിൽ 18 റൺസും എടുത്താണ് പുറത്തായത്.

പുറത്താകാതെ നിന്ന രഹാനെ ആറ് കിടിലൻ ഫോറും അഞ്ച് കൂറ്റൻ സിക്‌സുകളുമാണ് പറത്തിയത്‌; സ്ട്രൈക്ക് റേറ്റ് ആകട്ടെ 244.83! കഴിഞ്ഞ സീസണിൽ കൊൽക്കത്ത നൈറ്റ് റൈഡേഴ്സ് താരമായിരുന്ന രഹാനെയെ, ഈ സീസണിൽ ചെന്നൈ ടീമിൽ എടുക്കുകയായിരുന്നു. സീസണിൽ ഇതുവരെ കളിച്ച മത്സരങ്ങളിലെല്ലാം മികച്ച അറ്റാക്കിങ് ഇന്നിങ്സുകളാണ്‌ അദ്ദേഹം കളിച്ചിട്ടുള്ളത്. തന്റെ പഴയകാല പ്രതാപത്തിന്റെ ഓർമകൾ വീണ്ടും ഒരിക്കൽകൂടി അലയടിപ്പിക്കുന്ന ഷോട്ടുകളുമായി അദ്ദേഹം ചെന്നൈ ആരാധകരുടെ മനസ്സിൽ ഇടംനേടിയിരിക്കുന്നു. സാധാരണ കോപ്പിബുക്ക് ശൈലിയിൽ കളിക്കുന്ന അദ്ദേഹം, ഇന്നലെ റിവേഴ്സ് സ്വീപ്പും സ്‌കൂപ്പും അടക്കമുള്ള ഷോട്ടുകൾ പായിച്ചതിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായി മാറിയിരിക്കുകയാണ്.

കൊൽക്കത്തയ്‌ക്കെതിരെ ഈഡൻ ഗാർഡൻസിൽ ഞായറാഴ്ച രാത്രി നടന്ന മത്സരത്തിൽ ചെന്നൈ സൂപ്പർ കിംഗ്സ് 49 റൺസിന്റെ തകർപ്പൻ വിജയം സ്വന്തമാക്കി. മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ചെന്നൈ നിശ്ചിത 20 ഓവറിൽ 4 വിക്കറ്റ് നഷ്ടത്തിൽ 235 റൺസെന്ന കൂറ്റൻ സ്കോർ കണ്ടെത്തി. കൊൽക്കത്തയുടെ മറുപടി 8 വിക്കറ്റ് നഷ്ടത്തിൽ 186 റൺസിൽ അവസാനിക്കുകയായിരുന്നു. ചെന്നൈയ്ക്കായി 29 പന്തിൽ 71 റൺസോടെ പുറത്താകാതെ നിന്ന അജിൻക്യ രഹാനെ കളിയിലെ താരമായി തിരഞ്ഞെടുക്കപ്പെട്ടു.

ഒന്നാം വിക്കറ്റിൽ 7.3 ഓവറിൽ 73 റൺസെടുത്ത ഋതുരാജ്‌ – കോൺവേ സഖ്യം ചെന്നൈയ്ക്ക് മികച്ച തുടക്കം നൽകി. തുടർന്ന് കഴിഞ്ഞ മത്സരത്തിലെ അതേ സ്കോറായ 35 റൺസിൽ ഋതുരാജ് മടങ്ങി. രഹാനെ ക്രീസിൽ എത്തിയതു മുതൽ അടിതുടങ്ങി. 40 പന്തിൽ 56 റൺസുമായി കോൺവെ പുറത്താകുമ്പോൾ ക്രീസിലെത്തിയ ശിവം ദുബെയുമൊത്ത് രഹാനെ 85 റൺസിന്റെ കൂട്ടുകെട്ട് സൃഷ്ടിച്ചു. 21 പന്തിൽ 50 റൺസെടുത്ത ദുബെ മടങ്ങിയശേഷം എത്തിയ ജഡേജ 8 പന്തിൽ 18 റൺസ് നേടി പുറത്തായി. നായകൻ ധോണി 2 റൺസോടെ പുറത്താകാതെ നിന്നു.

കൂറ്റൻ വിജയലക്ഷ്യം പിന്തുടർന്ന കൊൽക്കത്തയ്ക്ക് ആദ്യ രണ്ട് ഓവറിനുള്ളിൽതന്നെ ഓപ്പണർമാരായ നരൈനെയും ജഗദീശനെയും നഷ്ടമായി. ഇംപാക്ട് പ്ലെയറായി ഇറങ്ങിയ വെങ്കടേഷ് അയ്യർ 20 റൺസും നായകൻ നിതീഷ് റാണ 27 റൺസുമെടുത്ത് പുറത്തായി. അതോടെ നില പരുങ്ങലിലായ അവർക്ക് ആശ്വാസമായി അഞ്ചാം വിക്കറ്റിൽ ഒത്തുചേർന്ന ജേസൺ റോയിടെയും റിങ്കു സിങ്ങിന്റെയും 65 റൺസ് കൂട്ടുകെട്ട്. റോയ് 26 പന്തിൽ 61 റൺസോടെ മടങ്ങിയശേഷം പിന്നീട് ആർക്കും മികച്ച ഇന്നിങ്സ് കളിക്കാൻ കഴിഞ്ഞില്ല. റിങ്കു സിംഗ് 33 പന്തിൽ 53 റൺസോടെ പുറത്താകാതെ നിന്നു.

മത്സരത്തിൽ മികച്ച നായകമികവ് പ്രകടിപ്പിച്ച ചെന്നൈ നായകൻ മഹേന്ദ്ര സിംഗ് ധോണി കളിക്കളത്തിലെ തീരുമാനങ്ങളിലും മികച്ചുനിന്നിരുന്നു. അമ്പയറുടെ തീരുമാനം പുനഃപരിശോധിക്കുന്ന ‘ഡിസിഷൻ റിവ്യൂ സിസ്റ്റം’ എന്ന ഡിആർഎസിന് പലപ്പോഴും ആരാധകർ ബഹുമാനപൂർവ്വം വിളിക്കുന്നത് ‘ധോണി റിവ്യൂ സിസ്റ്റം’ എന്നാണ്. ഇന്ത്യൻ ടീമിന്റെ നായകനായി ഇരുന്നപ്പോഴും ഐപിഎല്ലിൽ ചെന്നൈയെ നയിച്ചപ്പോഴും ഇതിനു മാറ്റമൊന്നും ഉണ്ടായിട്ടില്ല. ഇന്നലെ തുഷാർ ദേശ്പാണ്ഡെയുടെ പതിനെട്ടാം ഓവറിലെ മൂന്നാം പന്തിൽ ഡേവിഡ് വീസിന്റെ എൽബിഡബ്ല്യൂ അപ്പീൽ ചെയ്തെങ്കിലും അമ്പയർ ഔട്ട് നൽകിയിരുന്നില്ല. പന്ത് അദ്ദേഹത്തിന്റെ തുടയിലാണ് കൊണ്ടത്. എങ്കിലും അത് ഔട്ട് ആയേക്കാം എന്നുകരുതി ധോണി റിവ്യൂ നൽകിയപ്പോൾ ലെഗ് സ്റ്റമ്പിൽ പതിക്കുമെന്ന് വ്യക്തമായി.