ഇന്ത്യയും ഓസ്ട്രേലിയയും തമ്മിലുള്ള ട്വന്റി-20 പരമ്പരയിലെ മൂന്നാം മത്സരത്തിൽ ഇന്ത്യക്ക് 6 വിക്കറ്റിന്റെ തകർപ്പൻ ജയം, ഇതോടെ 3 മത്സരങ്ങളടങ്ങിയ പരമ്പര ഇന്ത്യ 2-1 ന് സ്വന്തമാക്കി ആദ്യ മത്സരത്തിൽ തോറ്റതിന് ശേഷം ഇന്ത്യ ഗംഭീരമായി തിരിച്ച് വരികയായിരുന്നു, മത്സരത്തിൽ ടോസ് നേടിയ ഇന്ത്യൻ ക്യാപ്റ്റൻ രോഹിത് ശർമ ഓസ്ട്രേലിയയെ ബാറ്റിങ്ങിന് അയക്കുകയായിരുന്നു, റിഷഭ് പന്തിന് പകരം ഇന്ത്യൻ ടീമിൽ ഭുവനേശ്വർ കുമാർ മടങ്ങി എത്തിയപ്പോൾ, സീൻ അബോട്ടിന് പകരം ജോഷ് ഇംഗ്ലീസ് ഓസീസ് നിരയിൽ ഇടം പിടിച്ചു.
ഓസീസ് ക്യാപ്റ്റൻ ആരോൺ ഫിഞ്ചിനൊപ്പം ഇന്നിംഗ്സ് ഓപ്പൺ ചെയ്യാനെത്തിയ കാമറൂൺ ഗ്രീൻ വെടിക്കെട്ട് ഇന്നിംഗ്സ് കാഴ്ച വെച്ചപ്പോൾ അവർക്ക് മികച്ച തുടക്കം ലഭിച്ചു, ഗ്രൗണ്ടിന്റെ നാനാ ഭാഗത്തേക്കും ഫോറുകളും സിക്സറുകളും പ്രവഹിച്ചപ്പോൾ ഓസ്ട്രേലിയൻ സ്കോർബോർഡ്‌ അതി വേഗത്തിൽ ചലിച്ചു, ഫിഞ്ചിനെ (7) വീഴ്ത്തി അക്സർ പട്ടേൽ ഇന്ത്യക്ക് ആദ്യ ബ്രേക്ക് ത്രു സമ്മാനിച്ചു, പിന്നാലെ കാമറൂൺ ഗ്രീനിനെയും (51) വീഴ്ത്തി ഭുവനേശ്വർ കുമാർ ഇന്ത്യയെ മത്സരത്തിലേക്ക് തിരിച്ച് കൊണ്ട് വന്നു, വെറും 21 ബോളിൽ 7 ഫോറും 3 സിക്സും അടക്കമാണ് ഗ്രീൻ 51 റൺസ് നേടിയത്.
അക്സർ പട്ടേൽ മികച്ച രീതിയിൽ പന്തെറിഞ്ഞപ്പോൾ ഓസീസിന് ഇടവേളകളിൽ വിക്കറ്റ് നഷ്ടമായി ജോഷ് ഇംഗ്ലീസിനെയും (24) മാത്യു വെയ്ഡിനെയും (1) വീഴ്ത്തി അക്സർ പട്ടേൽ ഇന്ത്യയെ മുന്നിലെത്തിച്ചു, 117/6 എന്ന നിലയിൽ തകർന്ന ഓസ്ട്രേലിയയെ ഡാനിയേൽ സാംസും (28*) അവസാന ഓവറുകളിൽ തകർത്തടിച്ച് അർധ സെഞ്ച്വറിയുമായി (54) ടിം ഡേവിഡും ചേർന്ന് 186/7 എന്ന മികച്ച നിലയിൽ എത്തിക്കുകയായിരുന്നു.
മറുപടി ബാറ്റിങ്ങിനിറങ്ങിയ ഇന്ത്യക്ക് തുടക്കത്തിൽ തന്നെ ഓപ്പണർമാരായ രോഹിത് ശർമയെയും (17) കെ.എൽ രാഹുലിനെയും(1) നഷ്ടമായി, പിന്നീട് ക്രീസിൽ ഒത്തുചേർന്ന വിരാട് കോഹ്ലിയും, സൂര്യകുമാർ യാദവും ചേർന്ന് ഇന്ത്യയെ മുന്നോട്ടേക്ക് നയിച്ചു ഇരുവരും ചേർന്ന് 3ആം വിക്കറ്റിൽ 104 റൺസിന്റെ കൂട്ട് കെട്ട് ഉണ്ടാക്കി ഇന്ത്യയെ വിജയത്തിലേക്ക് അടുപ്പിച്ചു, ഇന്ത്യൻ വിജയത്തിൽ നട്ടെല്ല് ആയത് ഈ കൂട്ട് കെട്ട് ആണ്.
ഇന്ത്യൻ ഇന്നിംഗ്സിന്റെ തുടക്കത്തിൽ തന്നെ 2 വിക്കറ്റ് വീണിട്ടും ക്രീസിൽ എത്തിയത് മുതൽ ആക്രമിച്ച് കളിച്ച സൂര്യകുമാറിന്റെ ഇന്നിംഗ്സ് ആണ് ഇന്ത്യയുടെ വിജയത്തിൽ നിർണായകമായത്, 36 പന്തിൽ 5 ഫോറും 5 കൂറ്റൻ സിക്സും അടക്കം 69 റൺസ് നേടിയാണ് സൂര്യകുമാർ മടങ്ങിയത്, 13 ആം ഓവറിൽ ആദം സാമ്പയെ ലോങ്ങ്‌ ഓണിലേക്ക്‌ മനോഹരമായ ഒരു സിക്സ് പറത്തിയാണ് സൂര്യകുമാർ തന്റെ അർധ സെഞ്ച്വറി പൂർത്തിയാക്കിയത്, കളിയിലെ താരമായും സൂര്യകുമാർ തിരഞ്ഞെടുക്കപ്പെട്ടു.