തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയത്തിൽ ഞായറാഴ്ച ഉച്ചയ്ക്ക് നടക്കുന്ന ഇന്ത്യ-ശ്രീലങ്ക ഏകദിന പരമ്പരയിലെ അവസാന മത്സരത്തിനായി കാത്തിരിക്കുകയാണ് എല്ലാ മലയാളികളും. ആദ്യ രണ്ട് മത്സരങ്ങളും വിജയിച്ച ഇന്ത്യ പരമ്പര നേരത്തെ തന്നെ സ്വന്തം പേരിലാക്കിയിരുന്നു. പത്താം തീയതി ഗുവാഹത്തിയിൽ നടന്ന മത്സരത്തിൽ 67 റൺസിന് വിജയിച്ച ഇന്ത്യ, ഇന്നലെ കൊൽക്കത്തയിൽ നടന്ന മത്സരത്തിൽ 4 വിക്കറ്റിന്റെ വിജയവും നേടിയിരുന്നു.
മത്സരത്തിൽ ടോസ് നേടി ആദ്യം ബാറ്റിങ്ങിന് ഇറങ്ങിയ ശ്രീലങ്കൻ ടീം 215 റൺസിന് ഓൾഔട്ടായി. മൂന്ന് വിക്കറ്റ് വീതം വീഴ്ത്തിയ മുഹമ്മദ് സിറാജ്, കുൽദീപ് യാദവ് എന്നിവരാണ് ശ്രീലങ്കയെ തകർത്തത്. അരങ്ങേറ്റ മത്സരം കളിച്ച ഓപ്പണർ നുവനിന്ദു ഫെർണാണ്ടോ അർദ്ധസെഞ്ചുറി നേടി. മറുപടി ബാറ്റിംഗിനിറങ്ങിയ ഇന്ത്യക്ക് ടോപ് ഓർഡർ താരങ്ങളെ ചെറിയ സ്കോറിന് നഷ്ടമായെങ്കിലും 36 റൺസ് എടുത്ത ഹർദിക് പാണ്ഡ്യയും 64 റൺസ് എടുത്ത് പുറത്താകാതെ നിന്ന രാഹുലും ചേർന്ന കൂട്ടുകെട്ട് രക്ഷയ്ക്കെത്തി. മൂന്ന് വിക്കറ്റ് വീഴ്‌ത്തുകയും 10 റൺസ് എടുത്ത് പുറത്താകാതെ നിൽക്കുകയും ചെയ്ത കുൽദീപ് യാദവ് കളിയിലെ താരമായി തിരഞ്ഞെടുക്കപ്പെട്ടു.
ഇന്നലെ മത്സരശേഷം ഈഡൻ ഗാർഡൻസിൽ പ്രത്യേക ലേസർ ഷോയും അരങ്ങേറിയിരുന്നു. അതിനിടയിൽ മുഴങ്ങിയ ഗാനത്തിനൊപ്പം സൂപ്പർ താരം വിരാട് കോഹ്‌ലിയും ഇഷാൻ കിഷനും ചേർന്ന് അൽപസമയം നൃത്തം ചെയ്തത് കാണികൾക്ക് വിരുന്നായി. ഗാലറിയോട് ചേർന്ന് വന്നുനിന്നശേഷം ഇരുവരും ഏതാനും സെക്കൻഡുകൾ നൃത്തം ചെയ്യുകയായിരുന്നു. ആർപ്പുവിളികളുമായി കാണികളും മികച്ച പ്രോത്സാഹനം നൽകി. മുൻപ് പല സന്ദർഭങ്ങളിലും ഗ്രൗണ്ടിൽ കോഹ്‌ലി ഡാൻസ് മൂവുകൾ സൃഷ്ടിക്കാറുണ്ട്. ഇഷാൻ കിഷനും ഇടയ്ക്കിടെ സമൂഹമാധ്യമങ്ങളിൽ ഡാൻസ് സ്റ്റെപ്പുകളുമായി വരാറുണ്ട്. അങ്ങനെയുള്ള രണ്ട് താരങ്ങൾ ഗ്രൗണ്ടിൽ ഒന്നിച്ചത് ആരാധകർക്ക്‌ നല്ലൊരു നിമിഷമായി.