കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടക്കുന്ന ഇന്ത്യ ശ്രീലങ്ക ഏകദിന പരമ്പരയിലെ അവസാന മത്സരത്തിൽ ടീം ഇന്ത്യക്ക് ആദ്യം ബാറ്റിംഗ്. ആദ്യ രണ്ട് മത്സരങ്ങളും വിജയിച്ച ഇന്ത്യ, നേരത്തെതന്നെ പരമ്പര സ്വന്തം പേരിലാക്കിയിരുന്നു. ഗുവാഹത്തിയിൽ നടന്ന ആദ്യ മത്സരത്തിൽ 67 റൺസിന് വിജയിച്ച ഇന്ത്യ, കൊൽക്കത്തയിൽ നടന്ന രണ്ടാം മത്സരത്തിൽ 4 വിക്കറ്റിന്റെ വിജയവും നേടിയിരുന്നു. പരമ്പര തൂത്തുവാരാൻ ടീം ഇന്ത്യ ശ്രമിക്കുമ്പോൾ, ആശ്വാസജയം തേടിയാണ് ശ്രീലങ്ക ഇറങ്ങുന്നത്.
നേരത്തെ മത്സരത്തിൽ ടോസ് നേടിയ ഇന്ത്യൻ നായകൻ രോഹിത് ശർമ ആദ്യം ബാറ്റിംഗ് തെരഞ്ഞെടുക്കുകയായിരുന്നു. രാത്രിയിൽ മഞ്ഞ് പെയ്യാൻ സാധ്യത ഉള്ളതുകൊണ്ട് ടോസ് നേടുന്ന ടീമുകൾ ആദ്യം ബോളിങ് തിരഞ്ഞെടുക്കും എന്നായിരുന്നു വിലയിരുത്തൽ. മത്സരത്തിൽ വൈസ് ക്യാപ്റ്റൻ ഓൾറൗണ്ടർ ഹാർദിക് പാണ്ഡ്യക്കും പേസർ ഉമ്രാൻ മാലിക്കിനും ടീം മാനേജ്മെന്റ് വിശ്രമം നൽകിയപ്പോൾ സൂര്യകുമാർ യാദവും സ്പിന്നർ വാഷിങ്ടൺ സുന്ദറും ടീമിലെത്തി. ശ്രീലങ്കൻ നിരയിൽ ദനഞ്ജയ ഡെ സിൽവക്കും ദുനിത്ത് വെല്ലലാഗേക്കും പകരം അശേൻ ബന്ദാരയും ജെഫ്രി വാണ്ടേഴ്‌സായും ഉൾപ്പെട്ടു.
മത്സരത്തിൽ പതിഞ്ഞ താളത്തിൽ തുടങ്ങിയ ഇന്ത്യൻ ഓപ്പണർമാരായ നായകൻ രോഹിത് ശർമയും യുവതാരം ശുഭ്മാൻ ഗില്ലും ആറാം ഓവറിൽ വിശ്വരൂപം പുറത്തെടുക്കുകയായിരുന്നു. പേസർ ലഹീരു കുമാര എറിഞ്ഞ ഓവറിൽ 23 റൺസ് ആയിരുന്നു ഇരുവരും ചേർന്നെടുത്തത്.
വീഡിയോ :
ആദ്യ പന്ത് നേരിട്ട രോഹിത് മിഡ് വിക്കറ്റിലേക്ക്‌ കിടിലൻ ഫ്ളിക്ക്‌ ഷോട്ടിലൂടെ സിക്സ് പറത്തി. രണ്ടാം പന്തിൽ സിംഗിൾ എടുത്ത് ഗില്ലിന്‌ സ്ട്രൈക്ക് കൈമാറി. തുടർന്നുള്ള നാല് പന്തുകളിൽ ഒന്നിനു പിറകെ ഒന്നായി ബൗണ്ടറി കടത്തിയ ഗിൽ കാണികളെ ആവേശത്തിൽ ആക്കുകയും ഇന്ത്യയുടെ തുടക്കം ഗംഭീരമാക്കുകയും ചെയ്തു. അഞ്ചോവറിൽ 19 റൺസ് മാത്രമായിരുന്ന ഇന്ത്യ അതോടെ 6 ഓവറിൽ 42 റൺസ്.