ഡൽഹിയിൽ നടക്കുന്ന ബോർഡർ ഗാവസ്കർ ട്രോഫി രണ്ടാം ടെസ്റ്റ് മത്സരത്തിൽ ഓസ്ട്രേലിയയുടെ ഒന്നാം ഇന്നിംഗ്സ് സ്കോറായ 263 റൺസ് പിന്തുടർന്ന് ഇന്നലെ 9 ഓവറിൽ വിക്കറ്റ് നഷ്ടപ്പെടാതെ 21 റൺസ് നേടിയിരുന്ന ഇന്ത്യക്ക് ബാറ്റിംഗ് തകർച്ച. ഇന്ന് വൈസ് ക്യാപ്റ്റൻ രാഹുലിന്റെയും വിക്കറ്റാണ്‌ ആദ്യം നഷ്ടമായത്. പതിനെട്ടാം ഓവറിൽ നതാൻ ലയൺ അദ്ദേഹത്തെ വിക്കറ്റിന് മുന്നിൽ കുരുക്കി പുറത്താക്കി. തുടർന്ന് ഇരുപതാം ഓവറിലെ രണ്ടാം പന്തിൽ നായകൻ രോഹിത് ശർമ്മയെ ക്ലീൻ ബോൾഡ് ചെയ്ത ലയൺ, നാലാം പന്തിൽ തന്റെ നൂറാം ടെസ്റ്റ് കളിക്കുന്ന പൂജാരയെ പൂജ്യത്തിലും പുറത്താക്കി ഇന്ത്യയെ ഞെട്ടിച്ചു. തുടർന്ന് ലയാണിന്റെ തന്നെ പന്തിൽ പീറ്റർ ഹാൻഡ്‌സ്‌കോമ്പിന്റെ കിടിലൻ റിഫ്ലക്സ് ക്യാച്ചിലൂടെ ശ്രേയസ് അയ്യരും കൂടാരം കയറിയപ്പോൾ ഇന്ത്യൻ സ്കോർ 66/4.
വിരാട് കോഹ്‌ലിയും രവീന്ദ്ര ജഡേജയും ചേർന്ന കൂട്ടുകെട്ട് കൂടുതൽ വിക്കറ്റ് നഷ്ടമാകാതെ ബാറ്റ് ചെയ്ത് ലഞ്ചിന് പിരിഞ്ഞു. മത്സരം പുനരാരംഭിച്ച സമയത്ത് ജഡേജയും സ്റ്റീവൻ സ്മിത്തും പരസ്പരം കൂട്ടിയിടിക്കുന്ന നിമിഷമുണ്ടായി. നതൻ ലയൺ എറിഞ്ഞ നാല്പതാം ഓവറിന്റെ അവസാന പന്തിൽ ആയിരുന്നു അത്. കവറിലേക്ക് തട്ടിയിട്ട് സിംഗിൾ എടുക്കാൻ താൽപര്യം കാണിച്ച ജഡേജ പിച്ചിന്റെ പകുതിയോളം ദൂരം പിന്നിട്ടിരുന്നു. എന്നാൽ നോൺ സ്ട്രൈക്കർ എൻഡിൽ ഉണ്ടായിരുന്ന വിരാട് കോഹ്‌ലി അദ്ദേഹത്തെ മടക്കി അയക്കുകയായിരുന്നു.
ഫീൽഡർ പന്ത് വിക്കറ്റ് കീപ്പർക്ക് നൽകുന്നതിന് മുന്നേതന്നെ ജഡേജ തിരികെയോടി ക്രീസിൽ എത്തിയെങ്കിലും, അവിടെ സ്ലിപ്പിൽ നിൽക്കുകയായിരുന്ന സ്റ്റീവൻ സ്മിത്ത്, ഓവർ പൂർത്തിയായശേഷം മറ്റേ എൻഡിലേക്ക്‌ നീങ്ങുന്ന അവസ്ഥയിൽ പരസ്പരം കൂട്ടിയിടിക്കുകയായിരുന്നു. എങ്കിലും ഇരുവരും ചേർന്ന് കെട്ടിപ്പിടിച്ച് നിന്നതുകൊണ്ട് രണ്ടാളും വീഴാതെ രക്ഷപ്പെട്ടു. തുടർന്ന് പരസ്പരം പുഞ്ചിരി സമ്മാനിച്ച് ഒരു ചെറിയ ഹസ്തദാനവും നൽകി ഇരുവരും മടങ്ങിയപ്പോൾ ഗാലറിയിൽ നിന്നും ആർപ്പുവിളികൾ ഉയർന്നു.