രാജ്യാന്തര ക്രിക്കറ്റിൽ നിന്നും വിരമിച്ച താരങ്ങളെ ഉൾപ്പെടുത്തി സംഘടിപ്പിക്കുന്ന ലജൻഡ്സ് ലീഗ് ക്രിക്കറ്റ് ടൂർണമെന്റിന് ഇന്നലെ ഖത്തറിൽ തുടക്കമായിരുന്നു. എല്ലാതവണത്തെയുംപോലെ മൂന്ന് ടീമുകളാണ് ടൂർണമെന്റിൽ മാറ്റുരയ്ക്കുന്നത്. ഇന്ത്യ മഹാരാജാസ്, ഏഷ്യ ലയൺസ്, വേൾഡ് ജയന്റ്സ്‌ എന്നീ ടീമുകളാണവ. ഇവർ പരസ്പരം രണ്ടുതവണ ഏറ്റുമുട്ടിയശേഷം കൂടുതൽ പോയിന്റ് നേടുന്ന രണ്ട് ടീമുകൾ മാർച്ച് 20ന് നടക്കുന്ന ഫൈനലിലേക്ക് യോഗ്യത നേടും. എല്ലാ മത്സരങ്ങളും നടക്കുന്നത് ദോഹയിലെ വെസ്റ്റ് എൻഡ് പാർക്ക് അന്താരാഷ്ട്ര സ്റ്റേഡിയത്തിലാണ്.
ഇന്നലെ നടന്ന ഉദ്ഘാടന മത്സരത്തിൽ ഗൗതം ഗംഭീർ നയിച്ച ഇന്ത്യ മഹാരാജാസ് ടീമിനെ ഷഹീദ് അഫ്രീദിയുടെ നേതൃത്വത്തിലുള്ള ഏഷ്യ ലയൺസ് ടീം 9 റൺസിന് പരാജയപ്പെടുത്തിയിരുന്നു. ഇന്ന് നടക്കുന്ന ടൂർണമെന്റിലെ രണ്ടാം മത്സരത്തിൽ ഇന്ത്യ മഹാരാജാസ് വേൾഡ് ജയന്റ്സ്‌ ടീമിനെ നേരിടുകയാണ്. മത്സരത്തിൽ ടോസ് നേടിയ വേൾഡ് ജയന്റ്സ്‌ ടീം ആദ്യം ബാറ്റിംഗ് തെരഞ്ഞെടുത്തു. ആരോൺ ഫിഞ്ച് നായകനായ ടീമിൽ ക്രിസ് ഗെയ്ൽ, ജാക് കാലിസ്, റോസ് ടെയ്‌ലർ, ഷൈൻ വാട്സൺ, ബ്രെറ്റ് ലീ തുടങ്ങിയ പ്രമുഖരും അണിനിരക്കുന്നു. ഗൗതം ഗംഭീർ, ഉത്തപ്പ, റൈന, ഹർഭജൻ, പഠാൻ സഹോദരങ്ങൾ, എന്നിവരൊക്കെ ഇന്ത്യൻ നിരയിലും.
മത്സരത്തിന്റെ മൂന്നാം ഓവറിൽ തന്നെ അപകടകാരിയായ ഓപ്പണർ ക്രിസ് ഗെയിൽ ഹർഭജൻ സിങ്ങിന്റെ മനോഹരമായ ഒരു പന്തിൽ ക്ലീൻ ബോൾഡ് ആയി മടങ്ങിയിരിക്കുകയാണ്. ആദ്യ രണ്ട് പന്തുകളും ഏറൗണ്ട് ദി വിക്കറ്റിൽ പന്തെറിഞ്ഞപ്പോൾ രണ്ടും വൈഡ് ബോൾ ആയിരുന്നു. അതോടെയാണ് ഭാജി അടുത്ത പന്ത് ഓവർ ദി വിക്കറ്റ് എറിയാൻ തുടങ്ങിയത്. ആദ്യ പന്തിൽ തന്നെ അതിനുള്ള പ്രതിഫലം ലഭിക്കുകയും ചെയ്തു. ലെഗ് സൈഡിലൂടെ പോകുകയായിരുന്ന പന്തിനെ തട്ടിയിടാൻ ശ്രമിച്ച അദ്ദേഹത്തിന് പിഴച്ചു. പന്ത് പിന്നിലൂടെ പോയി ടേൺ ചെയ്ത് ലെഗ് സ്റ്റമ്പിൽ പതിക്കുകയായിരുന്നു. അപ്രതീക്ഷിത പുറത്താകലിൽ അമ്പരന്ന് ഗെയിൽ കുറച്ച് നേരം നിസ്സഹായനായി നിന്ന് പവലിയനിലേക്ക് മടങ്ങി. ഹർഭജൻ തന്റെ പഴയ പ്രതാപത്തിന്റെ ഓർമകൾ വീണ്ടും ഒരിക്കൽ കൂടി പുതുക്കി.
വീഡിയോ :