കഴിഞ്ഞദിവസം നടന്ന മത്സരത്തിൽ ലക്നൗ ബാംഗ്ലൂരിനെതിരെ നേടിയത് ത്രസിപ്പിക്കുന്ന ജയം ആയിരുന്നു. അവസാന പന്ത് വരെ ആവേശം നിറഞ്ഞ മത്സരത്തിൽ ലക്നൗ ജയം കൈപ്പിടിയിലാക്കിയത് അവസാന പന്തിലാണ്. മത്സരത്തിൽ ബാംഗ്ലൂരിന്റെ ബോളിംഗും കനത്തിൽ ട്രോൾ ചെയ്യപ്പെടുന്നുണ്ട്. നിക്കോളാസ് പൂരാന്റെ ഗംഭീര ബാറ്റിംഗ് ആണ് ലക്നൗവിന് തുണയായത്.
മത്സരത്തിൽ മാക്സ്വെല്ലിനും വിരാട് കോഹ്ലിക്കും ഫാഫ് ഡുപ്ലസിക്കും മാർക്കസ് സ്റ്റോയിൻസിനും നിക്കോളാസ് പൂരാനും അർദ്ധ സെഞ്ച്വറി നേടിയിരുന്നു. ഇതിന് പുറമെ അർദ്ധ സെഞ്ച്വറി നേടിയ മറ്റൊരാൾ ആവേഷ് ഖാനാണ്. പക്ഷേ ആവേഷ് അർദ്ധ സെഞ്ച്വറി നേടിയത് ബാറ്റ് കൊണ്ടല്ല ബോള് കൊണ്ടാണ് എന്ന് മാത്രം. നിരവധി ട്രോളുകൾ സോഷ്യൽ മീഡിയയിൽ ആവേഷിത്തിനെതിരെ നിറയുന്നുണ്ട്. പലതവണ ആവേഷ് ഖാൻ ട്രോളുകൾക്ക് ഇരയായിട്ടുണ്ട്. ആവേഷിന്റെ അതിരുവിട്ട ആവേശവും ട്രോളുകൾ പല ആവർത്തി നേടിക്കൊടുത്ത ഒന്നാണ്.
മത്സരത്തിൽ അവസാന പന്ത് നേരിട്ടതും ആവേഷ് ഖാനാണ്. ബോൾ ആവേഷ് ഖാൻ കൂറ്റനടി അടിക്കാൻ ശ്രമിച്ചിരുന്നു എങ്കിലും പരാജയപ്പെട്ടു. പക്ഷേ മറുവശത്തുണ്ടായിരുന്ന രവി ബിഷ്ണോയ് അതിവേഗം ഓടി ഒരു റൺ തികച്ചു. ദിനേശ് കാർത്തിക് ബോൾ മിസ്സ് ചെയ്തതാണ് സിംഗിൾ എടുക്കാൻ ലക്നൗ ബാറ്റർമാർക്ക് റൺ എടുക്കാൻ സഹായകരമായത്.
മത്സരശേഷം ലക്നൗ ബാറ്റർമാരുടെ ആഘോഷം ഇപ്പോൾ വൻ വിമർശനമാണ് നേരിട്ടുകൊണ്ടിരിക്കുന്നത്. ഇതിൽ പ്രധാനമായും വിമർശനം നേരിടുന്നത് ആവേഷ് ഖാനാണ്. മത്സരം വിജയിച്ചശേഷം തന്റെ തലയിൽ ഇട്ടിരുന്ന ഹെൽമെറ്റ് ഗ്രൗണ്ടിലേക്ക് വലിച്ചെറിഞ്ഞാണ് ആവേഷ് വിജയം ആഘോഷിച്ചത്. ഇതിനെതിരെ ആരാധകർ ശക്തമായ വിമർശനമാണ് ഉയർത്തുന്നത്. ഇത്തരത്തിലുള്ള ആഘോഷത്തിന്റെ ഒരു ആവശ്യമുണ്ടായിരുന്നില്ല എന്നാണ് മിക്ക ആളുകളുടെ അഭിപ്രായം. ഈ ആഘോഷത്തിനെതിരെ അടുത്ത ദിവസങ്ങളിൽ പിഴ ചുമത്താൻ ഉള്ള സാധ്യതയുണ്ട് എന്നുള്ള വാർത്തകളാണ് ഇപ്പോൾ വരുന്നത്. ആവേഷ് ഖാന്റെ അതിരുവിട്ട ആഘോഷ ദൃശ്യം കാണാം.