ഇന്നലെ രാത്രി ചെന്നൈയിൽ നടന്ന ഐപിഎൽ പ്ലേഓഫിലെ എലിമിനേറ്റർ മത്സരത്തിൽ, ലഖ്നൗവിനെതിരെ മുംബൈ ഇന്ത്യൻസിന് തകർപ്പൻ വിജയം. 81 റൺസിന് അവരെ കീഴടക്കിയ മുംബൈ, വെള്ളിയാഴ്ച നടക്കുന്ന രണ്ടാം ക്വാളിഫയർ മത്സരത്തിൽ ഗുജറാത്ത് ടൈറ്റൻസിനെ നേരിടും. തോൽവിയോടെ ലഖ്നൗ സൂപ്പർ ജയന്റ്സ് ടൂർണമെന്റിൽ നിന്നും പുറത്തായി.
മത്സരത്തിൽ ടോസ് നേടി ആദ്യം ബാറ്റിംഗിനിറങ്ങിയ മുംബൈ നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 182 റൺസാണ് നേടിയത്. ടീമിലെ ഒരു താരത്തിനും അർദ്ധസെഞ്ചുറി നേടാൻ സാധിച്ചിരുന്നില്ല. എങ്കിലും എല്ലാവരും ചെറിയ ചെറിയ സംഭാവനകൾ നൽകിയിരുന്നു. മറുപടി ബാറ്റിങ്ങിൽ 3.3 ഓവറിൽ വെറും 5 റൺസ് മാത്രം വിട്ടുകൊടുത്ത് അഞ്ച് വിക്കറ്റ് വീഴ്ത്തിയ പേസർ ആകാശ് മധ്വാളിനു മുന്നിൽ ലഖ്നൗ അടിയറവ് പറഞ്ഞു. 16.3 ഓവറിൽ 101 റൺസ് എടുക്കുന്നതിനിടെ അവർ എല്ലാവരും പുറത്തായി. 3 റൺഔട്ടുകളും അവരെ തളർത്തി.
മത്സരത്തിൽ ലഖ്നൗ ഓൾറൗണ്ടർ കൃഷണപ്പ ഗൗതം പുറത്തായത്, ഒരു മികച്ച ടാഗ് ടീം റൺഔട്ടിലാണ്. പിയുഷ് ചൗള എറിഞ്ഞ പതിമൂന്നാം ഓവറിന്റെ മൂന്നാം പന്തിൽ ആയിരുന്നു വിക്കറ്റ്. ഓഫ് സൈഡിൽ തട്ടിയിട്ട് സിംഗിൾ എടുക്കാനായിരുന്നു ഗൗതമിന്റെ ശ്രമം. എന്നാൽ ബാക്ക്വേർഡ് പോയിന്റിൽ നിന്നിരുന്ന ഗ്രീൻ, പറന്നു പിടിച്ചതോടെ ഗൗതം ഒന്നുനിൽക്കുന്നു. ഡൈവ് ചെയ്ത ഗ്രീൻ പന്ത് താഴത്തുകൂടെ ഉരുട്ടിയിടുന്നത് കണ്ട ഗൗതം, വീണ്ടും റൺ ഓടാൻ തുടങ്ങുന്നു.
പക്ഷേ നോൺസ്ട്രൈക്കർ എൻഡിൽ ഉണ്ടായിരുന്ന ദീപക് ഹൂഡ നോ.. നോ.. എന്ന് അലറിവിളിച്ചുകൊണ്ടിരുന്നു. കാരണം, കവറിൽ നിന്നിരുന്ന നായകൻ രോഹിത് ശർമയുടെ കൈകളിലേക്കാണ് പന്ത് പോകുന്നത് എന്ന് മനസ്സിലായി. അബദ്ധം മനസ്സിലാക്കിയ ഗൗതം ബാറ്റിംഗ് എൻഡിലേക്ക് തിരിഞ്ഞോടി. എങ്കിലും ഞൊടിയിടയിൽ പന്ത് കൈക്കലാക്കിയ രോഹിത് ശർമ, ഒരു ബുള്ളറ്റ് ത്രോയിലൂടെ വിക്കറ്റിൽ എറിഞ്ഞു കൊള്ളിക്കുകയായിരുന്നു.
റൺഔട്ട് വീഡിയോ…