ട്രിനിഡാഡിലെ പോർട്ട് ഓഫ് സ്പെയിനിൽ നടക്കുന്ന ഇന്ത്യ – വെസ്റ്റിൻഡീസ് ടെസ്റ്റ് പരമ്പരയിലെ രണ്ടാമത്തെയും അവസാനത്തെയും മത്സരത്തിൽ, ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ടീം ഇന്ത്യക്ക് കൂറ്റൻ ഒന്നാം ഇന്നിംഗ്സ് സ്കോർ. സെഞ്ചുറി നേടിയ വിരാട് കോഹ്‌ലിയുടെയും അർദ്ധ സെഞ്ചുറികളുമായി തിളങ്ങിയ ജൈസ്വാൾ, രോഹിത്, ജഡേജ, അശ്വിൻ എന്നിവരുടെയും മികവിൽ 438 റൺസാണ് ഇന്ത്യ അടിച്ചെടുത്തത്. വെസ്റ്റിൻഡീസ് നിരയിൽ റോഷും വാറിക്കനും മൂന്നു വിക്കറ്റ് വീതം വീഴ്ത്തി.
രണ്ടാം ദിനം കളി നിർത്തുമ്പോൾ വെസ്റ്റിൻഡീസ് ഒന്നാം ഇന്നിംഗ്സിൽ 86/1 എന്ന നിലയിലാണ്. 33 റൺസെടുത്ത ടാഗ്നരേൻ ചന്ദേർപോളിനെ ജഡേജ അശ്വിൻ്റെ കൈകളിലെത്തിച്ചു. 37 റൺസുമായി നായകൻ ബ്രാത്ത്വൈറ്റും 14 റൺസോടെ അരങ്ങേറ്റ മത്സരം കളിക്കുന്ന മക്കെൻസിയുമാണ് ക്രീസിൽ. ഇന്നലെ മത്സരം കഴിഞ്ഞ് താരങ്ങൾ ഗ്രൗണ്ടിൽ നിന്നും മടങ്ങുന്ന സമയത്ത് ഒരു മനോഹരനിമിഷം അരങ്ങേറിയിരുന്നു.
വെസ്റ്റിൻഡീസ് ടീമിലെ വിക്കറ്റ് കീപ്പർ ജോഷ്വ ഡ സിൽവയുടെ അമ്മയ്ക്ക് വിരാട് കോഹ്‌ലിയെ കാണാനും ഒപ്പം നിന്ന് ചിത്രമെടുക്കാനും സാധിച്ചു. മത്സരത്തിനിടെ വിരാട് കോഹ്‌ലി ബാറ്റ് ചെയ്യുന്ന സമയത്ത് വിക്കറ്റിന് പിന്നിൽ നിന്നും ജോഷ്വ ഡ സിൽവയുടെ തുടർച്ചയായ പ്രോത്സാഹനം ഉണ്ടായിരുന്നു. വേഗം സെഞ്ചുറി നേട്ടം പൂർത്തിയാക്കാൻ സിൽവ നിർദേശിക്കുമ്പോൾ, എൻ്റെ വ്യക്തിഗതനേട്ടത്തെ കുറിച്ചാണോ നീ ചിന്തിക്കുന്നത് എന്ന് കോഹ്‌ലി ചോദിച്ചിരുന്നു. അപ്പോൾ, അതല്ല തൻ്റെ അമ്മ കോഹ്‌ലിയുടെ വലിയ ആരാധികയാണെന്നും മത്സരം കാണാനായി ഗ്രൗണ്ടിൽ എത്തിയിട്ടുണ്ടെന്നും സിൽവ പറഞ്ഞിരുന്നു.
ഇവരുടെ സംഭാഷണങ്ങൾ സ്റ്റമ്പ് മൈക്കിൽ പതിഞ്ഞത് സമൂഹമാധ്യമങ്ങളിൽ വൈറലായി മാറുകയും ചെയ്തിരുന്നു. തുടർന്ന് ഇന്നലെ വിരാട് തൻ്റെ സെഞ്ചുറി നേട്ടം പൂർത്തിയാക്കുകയും ചെയ്തു. മത്സരം കഴിഞ്ഞു ജോഷ്വ ഡ സിൽവയുടെ അമ്മ കരോളിൻ ഡ സിൽവ, വിരാട് കോഹ്‌ലിയെ അടുത്തുചെന്ന് കണ്ടുമുട്ടുകയും കെട്ടിപിടിച്ച് സന്തോഷം പ്രകടിപ്പിക്കുകയും ചെയ്തു. ഇരുവരും ഒന്നിച്ച് ചിത്രവും എടുത്തു. അതിനുശേഷം മാധ്യമങ്ങളെ കാണുന്ന നേരത്ത്, തൻ്റെ പ്രിയപ്പെട്ട ഇതിഹാസതാരത്തെ കണ്ടുമുട്ടിയതിൻ്റെ സന്തോഷം കൊണ്ട് അവരുടെ കണ്ണുകൾ നിറഞ്ഞിരിക്കുന്നതും കാണാം.
വീഡിയോ..