ഇൻഡോറിൽ നടക്കുന്ന ബോർഡർ ഗാവസ്കർ ട്രോഫി ടെസ്റ്റ് പരമ്പരയിലെ മൂന്നാം മത്സരത്തിന്റെ ആദ്യ ദിനം കളി അവസാനിക്കുമ്പോൾ ഓസ്ട്രേലിയയ്ക്ക്‌ മേൽക്കൈ. ഈ ടെസ്റ്റ് കൂടി ജയിച്ചാൽ ലോക ടെസ്റ്റ് ചാമ്പ്യൻഷിപ്പ് ഫൈനലിൽ എത്താം എന്ന പ്രതീക്ഷയോടെ സ്പിൻ പിച്ച് ഒരുക്കി ഇറങ്ങിയ ഇന്ത്യയെ ഓസീസ് സ്പിന്നർമാർ നിലംതൊടീച്ചില്ല. ടോസ് നേടി ആദ്യം ബാറ്റിങ്ങിന് ഇറങ്ങിയ ഇന്ത്യ വെറും 109 റൺസിൽ ഓൾഔട്ടായി. 22 റൺസ് എടുത്ത വിരാട് കോഹ്ലിയാണ് ടോപ് സ്കോറർ. ഇന്നിങ്സിന്റെ അവസാനം ആഞ്ഞുവീശിയ ഉമേഷ് യാദവിന്റെ ചെറു വെടിക്കെട്ട് ഇല്ലായിരുന്നുവെങ്കിൽ ഇന്ത്യൻ സ്കോർ 100 പോലും കടക്കുമായിരുന്നില്ല.
ഇടംകൈയ്യൻ സ്പിന്നർ മാത്യൂ കുനെമാൻ കരിയറിലെ ആദ്യ അഞ്ച് വിക്കറ്റ് നേട്ടം കൈവരിച്ചു. നതാൻ ലയൺ മൂന്ന് വിക്കറ്റ് വീഴ്ത്തി മികച്ച പിന്തുണ നൽകി. മറുപടി ബാറ്റിംഗിനിറങ്ങിയ ഓസീസ് ബാറ്റർമാർ കൂടുതൽ ഉത്തരവാദിത്വത്തോടെ കളിച്ചപ്പോൾ അവർ പതിയെ മത്സരത്തിൽ പിടിമുറുക്കി. 9 റൺസ് എടുത്ത ട്രവിസ്‌ ഹെഡിനെ ജഡേജ രണ്ടാം ഓവറിൽ തന്നെ മടക്കിയെങ്കിലും ലബുഷേയ്‌നും ഖവാജയും ചേർന്ന കൂട്ടുകെട്ട് അവരെ കരകയറ്റി. ലബുഷെയ്ൻ തുടക്കത്തിൽ തന്നെ ജഡേജയുടെ പന്തിൽ ക്ലീൻ ബോൾഡ് ആയെങ്കിലും അതൊരു നോബോൾ ആയിരുന്നു. ജീവൻ ലഭിച്ച അദ്ദേഹം രണ്ടാം വിക്കറ്റിൽ 96 റൺസ് കൂട്ടിച്ചേർത്തു.
ഒടുവിൽ 31 റൺസ് എടുത്ത ലബുഷേയ്‌നെ ജഡേജ തന്നെയാണ് പുറത്താക്കിയത്. പിന്നീട് 60 റൺസ് എടുത്ത ഖവാജയെയും 26 റൺസ് എടുത്ത നായകൻ സ്റ്റീവ് സ്മിത്തിനെയും ജഡേജ തന്നെ മടക്കിയെങ്കിലും അവർ അപ്പോഴേക്കും ഒന്നാം ഇന്നിംഗ്സ് ലീഡ് നേടിയിരുന്നു. ഒന്നാം ദിനം കളി നിർത്തുമ്പോൾ 156/4 എന്ന നിലയിലാണ് ടീം ഓസ്ട്രേലിയ. 7 റൺസ് എടുത്ത പീറ്റർ ഹാൻഡ്‌സ്‌കോമ്പും 6 റൺസ് എടുത്ത കാമറോൺ ഗ്രീനുമാണ് ക്രീസിൽ.
അതിനിടെ ഇന്ത്യൻ ടീമിന്റെ ബോളിങ്ങിനിടയിൽ ടീം പ്രതിസന്ധി ഘട്ടത്തിൽ നിൽക്കുമ്പോഴും കൂളായി ഡാൻസ് സ്റ്റെപ്പുകൾ ഇട്ട് നിൽക്കുന്ന മുൻ നായകൻ വിരാട് കോഹ്‌ലിയുടെ പ്രവർത്തി സമൂഹമാധ്യമങ്ങളിൽ ചർച്ചാവിഷയമായി. ജഡേജ ലഭുഷേയിനെ തുടക്കത്തിൽ തന്നെ ക്ലീൻ ബോൾഡ് ആകിയെങ്കിലും അതൊരു നോബോൾ ആയിരുന്നു. ശേഷം രണ്ട് തവണ ജഡേജയുടെ പന്തിൽ എൽബിഡബ്ല്യൂ റിവ്യൂ എടുത്തത് വിക്കറ്റിൽ കൊള്ളാത്ത പന്തുകളിൽ ആയിരുന്നു. ഇന്ത്യക്ക് രണ്ട് റിവ്യൂ അതോടെ നഷ്ടമായി. പിന്നീട് വിക്കറ്റ് ആകേണ്ടിയിരുന്ന അശ്വിൻ എറിഞ്ഞ ഒരു പന്തിലാകട്ടെ ഇന്ത്യ റിവ്യൂ എടുത്തതുമില്ല. ഇങ്ങനെ ഒരു അവസരത്തിലാണ് കോഹ്ലി യാതൊരു ടെൻഷനുമില്ലാതെ ഡാൻസ് കളിക്കുന്നത്. ഈ വീഡിയോ ഇപ്പോൾ സമൂഹമാധ്യമങ്ങളിൽ വൈറൽ ആയി മാറിയിരിക്കുകയാണ്.
വീഡിയോ :
