Month: May 2023

പതിനാറാം ഐപിഎൽ സീസണിന്റെ കലാശപോരാട്ടത്തിനായി തയ്യാറെടുക്കുകയാണ് ഇന്ത്യൻ ക്രിക്കറ്റ് ലോകം. ഞായറാഴ്ച രാത്രി ഗുജറാത്തിലെ അഹമ്മദാബാദ് നരേന്ദ്ര മോദി സ്റ്റേഡിയത്തിൽ നടക്കുന്ന ഫൈനലിൽ ചെന്നൈ സൂപ്പർ കിംഗ്സ്, ഹോംടീമായ ഗുജറാത്ത് ടൈറ്റൻസിനെയാണ് നേരിടുന്നത്. നീണ്ട രണ്ട് മാസക്കാലത്തെ ആവേശപോരാട്ടങ്ങൾക്ക് ശേഷം ടൂർണമെന്റിൽ ഏറ്റവും മികവ് പുലർത്തിയ രണ്ട് ടീമുകൾ തന്നെയാണ് ഫൈനലിൽ ഏറ്റുമുട്ടാൻ പോകുന്നത്.

നാലുതവണ ജേതാക്കളായ ചെന്നൈ ഇതിഹാസതാരം ധോണിയുടെ കീഴിൽ ഇറങ്ങുമ്പോൾ, യുവഇന്ത്യയുടെ ഭാവി ക്യാപ്റ്റൻ എന്ന് വിശേഷിപ്പിക്കപ്പെടുന്ന ഹർദിക്‌ പാണ്ഡ്യയുടെ കീഴിലാണ് നിലവിലെ ചാമ്പ്യന്മാരായ ഗുജറാത്ത് ഇറങ്ങുന്നത്. ഐപിഎൽ കിരീടം നിലനിർത്താൻ ലക്ഷ്യമിട്ട് ഗുജറാത്തും, ഒരു കിരീടംകൂടി നേടി മുംബൈയുടെ അഞ്ച് കിരീടങ്ങളുടെ റെക്കോർഡിനൊപ്പമെത്താൻ ചെന്നൈയും ഇറങ്ങുമ്പോൾ പോരാട്ടം തീപാറുമെന്നുറപ്പ്‌.

ലീഗ് ഘട്ടത്തിൽ പോയിന്റ് പട്ടികയിൽ ഒന്നാമതും രണ്ടാമതും എത്തിയ ഗുജറാത്തും ചെന്നൈയും തമ്മിൽ നടന്ന ഒന്നാം ക്വാളിഫയർ മത്സരത്തിൽ, 15 റൺസിന് വിജയിച്ചാണ് ചെന്നൈ ഫൈനലിലെത്തുന്ന ആദ്യ ടീമായത്. ഇന്നലെ രാത്രി നടന്ന രണ്ടാം ക്വാളിഫയർ മത്സരത്തിൽ മുംബൈ ഇന്ത്യൻസിനെ 62 റൺസിന് കീഴടക്കിയാണ് ചെന്നൈയുമായുളള മറ്റൊരു പോരാട്ടത്തിന് ഗുജറാത്ത് എത്തുന്നത്. സീസൺ ഉദ്ഘാടനമത്സരത്തിൽ ഇരുടീമുകളും ഏറ്റുമുട്ടിയപ്പോൾ ഗുജറാത്ത് ആയിരുന്നു വിജയിച്ചത്.

അതിനിടെ ഫൈനൽ മത്സരത്തിന് മുൻപ്, ഇന്ത്യൻ ക്രിക്കറ്റിന് നാണക്കേടായി ഒരു സംഭവം ഇപ്പോൾ സമൂഹമാധ്യമങ്ങളിൽ വൈറലായി മാറിയിരിക്കുകയാണ്. അഹമ്മദാബാദിലെ നരേന്ദ്ര മോദി സ്റ്റേഡിയത്തിനുമുന്നിൽ ടിക്കറ്റ് എടുക്കാനായി എത്തിയവരുടെ തിക്കിലും തിരക്കിലും പെട്ട് ഒരുപാട് പേർക്ക് പരുക്കേൽക്കുന്ന സംഭവമുണ്ടായി. ബിസിസിഐയുടെ കെടുകാര്യസ്ഥതയാണ് സംഭവത്തിന് കാരണമായതെന്ന് ആരാധകർ പറയുന്നു.

Disappointed to witness the chaos in Hyderabad, Chennai, and now Ahmedabad due to the mismanagement of ticketing by BCCI.
Black marketing openly thriving is unacceptable.
It's high time BCCI addresses this issue and adopts a permanent solution like e-ticketing.
Cricket fans… pic.twitter.com/GaOIM6jWqg

— N I K H I L (@nikhilkalavale) May 26, 2023

തിരക്ക് ഒഴിവാക്കാനായി ഓൺലൈനിൽ ടിക്കറ്റ് ബുക്ക് ചെയ്തവർക്കുപോലും, അതിന്റെ പ്രിന്റ് ഔട്ട് ടിക്കറ്റ് എടുക്കണമെന്ന നിബന്ധന വച്ചതാണ് സംഭവം വഷളാകാൻ കാരണമായി പറയപ്പെടുന്നത്. മാത്രമല്ല, പറഞ്ഞ സമയത്തിന് ടിക്കറ്റ് കൗണ്ടർ തുറക്കുകയും ചെയ്തില്ല. ഏറെനേരം കഴിഞ്ഞ് തുറന്നപ്പോൾ, അഞ്ച് ടിക്കറ്റ് കൗണ്ടർ ഉള്ളതിൽ ഒരെണ്ണം മാത്രം തുറന്നുകൊടുത്തതും തള്ളിക്കയറ്റത്തിന് കാരണമായി. അതും 45°C പൊള്ളുന്ന വെയിലിൽ നിർത്തി ആളുകളെ കഷ്ടപ്പെടുത്തിയെന്നും ആരോപണമുണ്ട്.

വീഡിയോ..

Total mismanagement in Ahmedabad for the tickets of IPL 2023 Qualifier 2 and the Final.

Fans surely deserve better than this. pic.twitter.com/1T86QjhbsI

— Mufaddal Vohra (@mufaddal_vohra) May 26, 2023

Worst management of Motera stadium Ahmedabad , People are waiting for the ticket since morning but the ground staff is not opening the gate , and the match is tomorrow , even online booked tickets need a physical one , when they will provide the ticket?? #IPL2023 @paytminsider pic.twitter.com/aUa2SekJ6T

— Aditya Baghel (@AdityaB50552945) May 25, 2023

ഐപിഎല്ലിൽ ഇന്നലെ രാത്രി അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ആവേശകരമായ രണ്ടാം ക്വാളിഫയർ മത്സരത്തിൽ മുംബൈയേ കീഴടക്കി, ഗുജറാത്ത് ചെന്നൈയുമായുള്ള കലാശപോരാട്ടത്തിന് യോഗ്യത നേടി. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഗുജറാത്ത് 60 പന്തിൽ 129 റൺസെടുത്ത ഓപ്പണർ ഗില്ലിന്റെയും മികച്ച പിന്തുണ നൽകിയ സുദർശന്റെയും നായകൻ പാണ്ഡ്യയുടെയും മികവിൽ നിശ്ചിത 20 ഓവറിൽ 3 വിക്കറ്റ് നഷ്ടത്തിൽ നേടിയത് 233 റൺസ്! മറുപടി ബാറ്റിങ്ങിൽ 18.2 ഓവറിൽ 171 റൺസിന് മുംബൈ ഓൾഔട്ടായി. സൂര്യകുമാറും തിലക് വർമയും പൊരുതിനോക്കിയെങ്കിലും വിജയത്തിന് അത് മതിയായിരുന്നില്ല.

മത്സരത്തിൽ കളിയിലെ താരമായി തിരഞ്ഞെടുക്കപ്പെട്ടത് സെഞ്ചുറിവീരൻ ഗിൽ ആണെങ്കിലും, അഞ്ച് വിക്കറ്റ് നേട്ടവുമായി തിളങ്ങിയ പേസർ മോഹിത് ശർമയുടെയും പ്രകടനം നിർണായകമായിരുന്നു. ഈ സീസണിൽ ഗുജറാത്ത് ടീമിൽ എത്തുന്നതിന് മുൻപ് അദ്ദേഹം അവസാനമായി ഒരു ഐപിഎൽ മത്സരം കളിച്ചത് 3 വർഷം മുൻപായിരുന്നു. കഴിഞ്ഞ വർഷം ലേലത്തിൽ വാങ്ങാൻ ആളില്ലാതെപോയ അദ്ദേഹത്തെ ഒരു നെറ്റ് ബോളറായി ടൈറ്റൻസ് ഉൾപ്പെടുത്തുകയും, അതിൽ മികവ് പുലർത്തിയതോടെ ഈ സീസണിൽ ടീമിൽ എത്തിക്കുകയുമായിരുന്നു.

സീസണിന്റെ തുടക്കത്തിൽ കൊൽക്കത്തയ്‌ക്കെതിരെ നടന്ന മത്സരത്തിൽ, പേസർ യാഷ് ദയാലിനേ റിങ്കു സിംഗ് ഇരുപതാം ഓവറിലെ  അവസാന അഞ്ച് പന്തുകളും സിക്സ് അടിച്ചതോടെയാണ് മോഹിത് ശർമയ്‌ക്ക് അവസരം ലഭിക്കുന്നത്. കളിച്ച ആദ്യ മത്സരത്തിൽ തന്നെ മാൻ ഓഫ് ദി മാച്ചായി ടീം തന്നിൽ അർപ്പിച്ച വിശ്വാസം കാത്ത അദ്ദേഹം, പിന്നീട് പ്ളയിങ് ഇലവനിൽ സ്ഥിരസാന്നിധ്യമായി. ചുരുങ്ങിയ മത്സരങ്ങൾ കളിച്ചുകൊണ്ട് വിക്കറ്റ് വേട്ടക്കാരുടെ പർപ്പിൾ തൊപ്പി ലിസ്റ്റിലും അദ്ദേഹം മൂന്നാമതെത്തി.

ഇന്നലെ ടോപ് ഓർഡർ തകർന്നപ്പോഴും ഒരറ്റത്ത് ലോക ഒന്നാം നമ്പർ ട്വന്റി ട്വന്റി ബാറ്ററായ സൂര്യകുമാർ യാദവ് മുംബൈയ്ക്ക് വേണ്ടി മികച്ച പോരാട്ടവീര്യം കാഴ്ച്ചവെച്ചിരുന്നു. ഇന്നിംഗ്സിലെ പതിനഞ്ചാം ഓവറിലാണ് മോഹിത് ശർമയ്‌ക്ക് ആദ്യ ഓവർ ലഭിക്കുന്നത്. രണ്ടാം പന്തിൽതന്നെ സിക്സ് അടിച്ച് സൂര്യ നയം വ്യക്തമാക്കി. എങ്കിലും തൊട്ടടുത്ത പന്തിൽ അദ്ദേഹത്തെ ക്ലീൻ ബോൾഡ് ആക്കിയാണ് മോഹിത് മറുപടി നൽകിയത്.

ഓവറിലെ അഞ്ചാം പന്തിൽ ഇഷാൻ കിഷന് പകരം കൺകഷൻ സബ്സ്റ്റിറ്റ്യൂട്ട് ആയിറങ്ങിയ മലയാളി താരം വിഷ്ണു വിനോദിനെയും മടക്കി. അതോടെ മുംബൈയുടെ കഥകഴിഞ്ഞു. 3 വിക്കറ്റുകൾ കൂടി വീഴ്ത്തിയ അദ്ദേഹം മുംബൈ വാലറ്റത്തെ ചുരുട്ടിക്കെട്ടി, ഗുജറാത്തിന് 62 റൺസിന്റെ ആധികാരികവിജയം സമ്മാനിക്കുകയായിരുന്നു.

5 വിക്കറ്റ് വിഡിയോ:

ഐപിഎൽ പതിനാറാം സീസണിലെ ഫൈനലിസ്റ്റുകളെ കണ്ടെത്താനുള്ള രണ്ടാം ക്വാളിഫയർ മത്സരത്തിൽ മുംബൈ ഇന്ത്യൻസിന് 234 റൺസ് വിജയലക്ഷ്യം. മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഗുജറാത്ത്, ഓപ്പണർ ശുഭ്മൻ ഗിൽ നേടിയ തകർപ്പൻ സെഞ്ചുറി മികവിൽ നിശ്ചിത 20 ഓവറിൽ 3 വിക്കറ്റ് നഷ്ടത്തിൽ 233 റൺസ് നേടി. ഐപിഎൽ പ്ലേഓഫ് ചരിത്രത്തിലെ ഏറ്റവും ഉയർന്ന ടീം ടോട്ടലാണ് ഇത്. മത്സരത്തിൽ വിജയിക്കുന്ന ടീം ഞായറാഴ്ച നടക്കുന്ന ഫൈനലിൽ ചെന്നൈയെ നേരിടും.

60 പന്തിൽ നിന്നും 7 ഫോറും 10 സിക്സും അടക്കം 129 റൺസെടുത്ത ഗിൽ, ഐപിഎൽ പ്ലേഓഫ് ചരിത്രത്തിലെ ഏറ്റവും ഉയർന്ന വ്യക്തിഗത സ്കോറിന് ഉടമയായി. 2023 ഐപിഎൽ സീസണിലെ അദ്ദേഹത്തിന്റെ മൂന്നാം സെഞ്ചുറിനേട്ടമാണ് ഇത്. ഇതോടെ സീസണിൽ ഏറ്റവും കൂടുതൽ റൺസ് നേടിയതിനുള്ള ഓറഞ്ച് തൊപ്പി ലിസ്റ്റിലും, ബംഗളൂരു നായകൻ ഡു പ്ലെസ്സിയെ പിന്തള്ളി ഗിൽ ഒന്നാമതെത്തി.

മറുപടി ബാറ്റിങ്ങിൽ കൂറ്റൻ വിജയലക്ഷ്യം പിന്തുടരുന്ന മുംബൈക്ക് ആഗ്രഹിച്ച തുടക്കമായിരുന്നില്ല ലഭിച്ചത്. വിക്കറ്റ് കീപ്പിങ് സമയത്ത് പരുക്കേറ്റ ഓപ്പണർ ഇഷാൻ കിഷന് പകരം രോഹിത്തിന്റെ കൂടെ ഇറങ്ങിയത് ഇംപാക്ട് പ്ലെയറായ നെഹാൽ വദേരയായിരുന്നു. 4 റൺസ് മാത്രം എടുത്ത് വദേരയും 8 റൺസ് എടുത്ത് രോഹിത് ശർമയും പുറത്തായി. അതോടെ നില പരുങ്ങലിലായ മുംബൈയ്ക്ക് ജീവൻ നൽകിയത് യുവതാരം തിലക് വർമയുടെ വെടിക്കെട്ട് ഇന്നിങ്സാണ്.

14 പന്ത് നേരിട്ട അദ്ദേഹം, 5 ഫോറും 3 സിക്സും അടക്കം അതിവേഗത്തിൽ 43 റൺസ് എടുത്താണ് പുറത്തായത്. പവർപ്ലേയിലെ അവസാന പന്തിൽ റാഷിദ് ഖാൻ ക്ലീൻബോൾഡ് ആക്കുകയായിരുന്നു. അതേസമയത്ത് മുംബൈയ്ക്ക് ജയിക്കാൻ ആവശ്യമായ റൺനിരക്ക്, അപ്പോഴത്തെ റൺനിരക്കിനേക്കാൾ കുറച്ചുകൊണ്ടുവരികയും ചെയ്തിരുന്നു തിലക്. സീനിയർ പേസറായ മുഹമ്മദ് ഷമി എറിഞ്ഞ അഞ്ചാം ഓവറിൽ 24 റൺസെടുത്ത അദ്ദേഹം പവർപ്ലെ ശരിക്ക് മുതലാക്കി.

ആദ്യ നാല് പന്തുകളിൽ നിന്നായി തുടരെ ബൗണ്ടറി കണ്ടെത്തിയ തിലക്, അഞ്ചാം പന്തിൽ ഒരു ഡബിൾ എടുത്തശേഷം അവസാന പന്തിൽ ഒരു കിടിലൻ സിക്‌സ് നേടുകയും ചെയ്തു. രണ്ട് ഓപ്പണർമാരെയും മടക്കി രണ്ടോവറിൽ 17/2 എന്ന നിലയിൽ വീണ്ടും ഒരു പവർപ്ലെ ഓവർകൂടി പന്തെറിയാനെത്തിയ ഷമി, തിലകിന്റെ ബാറ്റിന്റെ ചൂടറിഞ്ഞ് തിരിച്ചുപോയത് 3 ഓവറിൽ 41 റൺസുമായി!

വീഡിയോ..

അഹമ്മദാബാദിൽ നടക്കുന്ന ഐപിഎൽ പതിനാറാം സീസണിലെ രണ്ടാം ക്വാളിഫയർ മത്സരത്തിൽ, ഗുജറാത്ത് ടൈറ്റൻസിനെ നേരിടുന്ന മുംബൈയ്ക്ക് കൂറ്റൻ വിജയലക്ഷ്യം. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഗുജറാത്ത്, നിശ്ചിത 20 ഓവറിൽ 3 വിക്കറ്റ് നഷ്ടത്തിൽ 233 റൺസാണ് നേടിയത്. ഇത് ഐപിഎൽ പ്ലേഓഫ് ചരിത്രത്തിലെ ഏറ്റവും ഉയർന്ന ടീം ടോട്ടലാണ്‌. സീസണിലെ മൂന്നാം സെഞ്ചുറി നേടിയ ഓപ്പണർ ഗില്ലിന്റെ വെടിക്കെട്ട് ഇന്നിങ്സ് അവർക്ക് മുൻതൂക്കം നൽകി. സായി സുദർശൻ 43 റൺസും, നായകൻ പാണ്ഡ്യ 13 പന്തിൽ 28 റൺസും എടുത്തു.

ഈ സീസണിൽ മുംബൈ ബോളിങ് നിരയുടെ കുന്തമുനയായ ആകാശ് മധ്വാളിനെ പോലും ഗിൽ വെറുതെ വിട്ടില്ല. സൺറൈസേഴ്സ് ഹൈദരാബാദിനെതിരെ നടന്ന മുംബൈയുടെ അവസാന ലീഗ് മത്സരത്തിൽ 4 വിക്കറ്റും, ലഖ്നൗ സൂപ്പർ ജയന്റ്സിനെതിരെ എലിമിനേറ്ററിൽ 5 വിക്കറ്റ് വീഴ്ത്തി കളിയിലെ താരവുമായതാണ് ആകാശ്. അദ്ദേഹം എറിഞ്ഞ പന്ത്രണ്ടാം ഓവറിൽ 3 സിക്‌സാണ് ഗിൽ പറത്തിയത്.

സീസണിൽ മുംബൈ വാങ്കഡെ സ്റ്റേഡിയത്തിൽ നടന്ന മത്സരത്തിൽ 6 റൺസെടുത്ത ഗില്ലിനെ ക്ലീൻബോൾഡ് ആക്കിയ താരമാണ് ആകാശ്. അതിനുള്ള ഗില്ലിന്റെ മധുരപ്രതികാരം കൂടിയായി ഈ വെടിക്കെട്ട് ഓവർ. ആദ്യ പന്തിൽ ബാക്ക്വേർഡ് സ്ക്വയർ ലെഗ്ഗിലേക്കും, രണ്ടാം പന്തിൽ പുൾഷോട്ട് കളിച്ച് ഡീപ് മിഡ് വിക്കറ്റിലേക്കും, അഞ്ചാം പന്തിൽ ഫ്ളിക്ക്‌ ഷോട്ടിലൂടെ വീണ്ടും ഡീപ് മിഡ് വിക്കറ്റിലേക്ക് മറ്റൊരു സിക്സും. ഒടുവിൽ 60 പന്തിൽ 129 റൺസെടുത്ത അദ്ദേഹത്തെ മധ്വാൾ തന്നെയാണ് പുറത്താക്കിയത്.

6,6,6 വീഡിയോ…

പതിനാറാം ഐപിഎൽ സീസൺ അതിന്റെ അവസാന ആഴ്‌ച്ചയിലാണ് എത്തിനിൽക്കുന്നത്. രണ്ട് മാസത്തോളം നീണ്ട ആവേശപോരാട്ടങ്ങൾക്കൊടുവിൽ ഇനി അവശേഷിക്കുന്നത് രണ്ടേ രണ്ട് മത്സരങ്ങൾ. ആദ്യ ക്വാളിഫയർ വിജയിച്ച ചെന്നൈ സൂപ്പർ കിംഗ്സ് നേരത്തെത്തന്നെ ഫൈനലിൽ എത്തിയിരുന്നു. അവരുടെ എതിരാളികളെ കണ്ടെത്താനുള്ള രണ്ടാം ക്വാളിഫയർ മത്സരം ഇന്ന് രാത്രി നടക്കാൻ പോകുകയാണ്.

നിലവിലെ ചാമ്പ്യന്മാരായ ഗുജറാത്ത് ടൈറ്റൻസും, അഞ്ചുതവണ ജേതാക്കളായ മുംബൈ ഇന്ത്യൻസും തമ്മിലാണ് മത്സരം. ടേബിൾ ടോപ്പേഴ്‌സായി പ്ലേഓഫിലേക്ക് കുതിച്ചെത്തിയ ഗുജറാത്തിന് പക്ഷേ, ചെന്നൈയ്ക്ക് മുന്നിൽ കാലിടറി. നാലാം സ്ഥാനക്കാരായി എത്തിയ മുംബൈ, മൂന്നാം സ്ഥാനക്കാരായ ലഖ്നൗവിനെ എലിമിനേറ്റ് ചെയ്താണ് വരവ്. ആ ആധികാരികവിജയത്തിന്റെ ആത്മവിശ്വാസത്തിൽ വരുന്ന മുംബൈയ്ക്ക് പക്ഷേ, സന്തുലിതമായ ഗുജറാത്ത് ടീമിനോടാണ് ഏറ്റുമുട്ടേണ്ടത്.

അതിനിടെ മുംബൈ ഇന്ത്യൻസ് നായകൻ രോഹിത് ശർമ്മയ്ക്ക് നേരിട്ട ഒരു അപ്രതീക്ഷിത നിമിഷത്തിന്റെ വീഡിയോയാണ് ഇപ്പോൾ സമൂഹമാധ്യമങ്ങളിൽ വൈറലായി മാറിയിരിക്കുന്നത്. കനത്ത പോലീസ് സുരക്ഷയിൽ ടീം ബസിലേക്ക് കയറാൻ തുടങ്ങിയ രോഹിത്തിന്റെ നേർക്ക്, ആൾക്കൂട്ടത്തിൽ നിന്നും ഒരു യുവാവ് പാഞ്ഞടുക്കുകയായിരുന്നു.

പെട്ടെന്നുള്ള നിമിഷത്തിൽ അദ്ദേഹം ഫോൺ നീട്ടി സെൽഫിയെടുക്കാൻ തുടങ്ങിയെങ്കിലും രോഹിത് അനിഷ്ടം പ്രകടിപ്പിച്ചു. തുടർന്ന് അയാൾ ഒരു വിചിത്രമായ ആവശ്യമാണ് ഉന്നയിച്ചത്. തന്റെ കവിൾത്തടത്തിൽ ചൂണ്ടിക്കാണിച്ചുകൊണ്ട് മുത്തം നൽകണമെന്ന് ആവർത്തിച്ചുകൊണ്ടിരുന്നു. യുവാവിന്റെ ഞെട്ടിക്കുന്ന ആവശ്യം കേട്ട് രോഹിത് ശർമ തെല്ലൊന്ന് അമ്പരന്നുപോയി. തുടർന്ന്, അയാളെ വശത്തേക്ക്‌ മാറ്റി ഒരുവിധത്തിൽ ബസിൽ കയറിപ്പറ്റി. അപ്പോഴേക്കും സമീപത്ത് നിന്നിരുന്നവർ അയാളെ പിടിച്ചുമാറ്റുന്നതും കാണാം.

വീഡിയോ..

pic.twitter.com/H6qblb1ita

— Out Of Context Cricket (@GemsOfCricket) May 20, 2023

ഞായറാഴ്ച രാത്രി അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കുന്ന പതിനാറാം ഐപിഎൽ സീസൺ കലാശപ്പോരാട്ടത്തിൽ, ചെന്നൈ സൂപ്പർ കിംഗ്സിന്റെ എതിരാളികൾ ആരെന്ന് അറിയാനുള്ള കാത്തിരിപ്പിന് ഇനി മണിക്കൂറുകൾ മാത്രം ബാക്കി. ഇതേ സ്റ്റേഡിയത്തിൽ ഇന്ന് രാത്രി നടക്കുന്ന പ്ലേഓഫിലെ രണ്ടാം ക്വാളിഫയർ മത്സരത്തിൽ ഗുജറാത്ത് ടൈറ്റൻസും മുംബൈ ഇന്ത്യൻസും ഏറ്റുമുട്ടുകയാണ്.

ചൊവ്വാഴ്ച നടന്ന ആദ്യ ക്വാളിഫയർ മത്സരത്തിൽ ഗുജറാത്തിനെ 15 റൺസിന് കീഴടക്കിയാണ്, ചെന്നൈ ഫൈനലിന് യോഗ്യത നേടിയത്. അതിനുശേഷം ബുധനാഴ്ച നടന്ന എലിമിനേറ്ററിൽ ലഖ്നൗവിനെ കീഴടക്കി എത്തുന്ന മുംബൈയും, ഗുജറാത്തും തമ്മിൽ മത്സരിച്ച് ഇന്ന് വിജയിക്കുന്നവർ ഫൈനലിലെത്തും. നിലവിലെ ചാമ്പ്യന്മാരായ ഗുജറാത്തും, അഞ്ചുതവണ ജേതാക്കളായ മുംബൈയും പരസ്പരം കൊമ്പുകോർക്കുമ്പോൾ പോരാട്ടം തീപാറുമെന്നുറപ്പ്‌.

അതിനിടെ ചെന്നൈ നായകൻ മഹേന്ദ്ര സിംഗ് ധോണിയുടെ ഒരു പ്രവർത്തി സമൂഹമാധ്യമങ്ങളിൽ ആരാധകർ ഏറ്റെടുത്തിരിക്കുകയാണ്. ചെന്നൈയിൽനിന്നും ഫൈനലിൽ പങ്കെടുക്കാനായി അഹമ്മദാബാദിലേക്ക് പുറപ്പെടുന്നതിന് മുൻപായി, ചെപ്പോക്ക് സ്റ്റേഡിയത്തിലെ ഗ്രൗണ്ട് സ്റ്റാഫിനോട് അവരുടെ പ്രവർത്തനങ്ങൾക്ക് നന്ദി അറിയിക്കാനായി എത്തിയതായിരുന്നു അദ്ദേഹം.

ടൂർണമെന്റിൽ ഉടനീളം മികച്ച രീതിയിൽ മൈതാനം കാത്തുസൂക്ഷിച്ച മുതിർന്ന ഗ്രൗണ്ട് സ്റ്റാഫിനും, പിച്ച് മാർക്കർമാർക്കും ടീമിന്റെ പേരിലുള്ള കടപ്പാട് അറിയിച്ച ധോണി, അവരോടൊപ്പം നല്ല സമയം ചിലവഴിക്കുകയും ചെയ്തു. എല്ലാവർക്കും വേണ്ടിയിരുന്നത് ധോണിയുടെ ഓട്ടോഗ്രാഫ് ആയിരുന്നു. ഒട്ടും മടി കാണിക്കാതെ എല്ലാവർക്കും അത് നൽകുകയും, ഓരോരുത്തരോടും വ്യക്തിപരമായി സംസാരിക്കുകയും ചെയ്തിരുന്നു അദ്ദേഹം. ടീം മാനേജ്മെന്റ് നൽകുന്ന ചെറിയൊരു പാരിതോഷികം എല്ലാവർക്കും ധോണിയുടെ കൈകൊണ്ട് വിതരണം ചെയ്യുന്നതും കാണാമായിരുന്നു.

വീഡിയോ..

Anbuden Thala – A mark of respect for the markers and the ground staff who toil hard to make us game ready! 💛📹#WhistlePodu #Yellove 🦁💛 @msdhoni pic.twitter.com/MTyFpvEWud

— Chennai Super Kings (@ChennaiIPL) May 25, 2023

ഐപിഎൽ പതിനാറാം സീസണിൽ എലിമിനേറ്റർ മത്സരം കൂടി പൂർത്തിയായപ്പോൾ, കിരീടപ്പോരിൽ ഇനി മത്സരിക്കുന്നത് മൂന്നേ മൂന്ന് ടീമുകൾ. ഒന്നാം ക്വാളിഫയർ മത്സരത്തിൽ ഗുജറാത്തിനെ തോൽപ്പിച്ച ചെന്നൈ, നേരത്തെതന്നെ ഫൈനലിൽ എത്തിയിരുന്നു. ഇന്നലെ നടന്ന പോരാട്ടത്തിൽ ലഖ്നൗവിനെ കീഴടക്കിയ മുംബൈ ഇന്ത്യൻസ്, രണ്ടാം ക്വാളിഫയർ മത്സരത്തിന് യോഗ്യത നേടിയിട്ടുണ്ട്. വെള്ളിയാഴ്ച രാത്രി നടക്കുന്ന ആ മത്സരത്തിൽ, അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ മുംബൈയും ഗുജറാത്തും ഏറ്റുമുട്ടും. ഇതേ സ്റ്റേഡിയത്തിൽ ഞായറാഴ്ചയാണ് ഫൈനൽ.

ഇന്നലെ മത്സരത്തിൽ സമ്പൂർണ ആധിപത്യം പുലർത്തിയ മുംബൈ 81 റൺസിനാണ് ലഖ്നൗവിനെ കീഴടക്കിയത്. ടോസ് നേടി ആദ്യം ബാറ്റ് ചെയ്ത അവർ, നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 182 റൺസ് എടുത്തശേഷം, ലഖ്നൗവിനെ 16.3 ഓവറിൽ വെറും 101 റൺസിന് ഓൾഔട്ടാക്കുകയായിരുന്നു. 3.3 ഓവറിൽ വെറും 5 റൺസ് മാത്രം വിട്ടുകൊടുത്ത് അഞ്ച് വിക്കറ്റ് വീഴ്ത്തി, കളിയിലെ താരമായ പേസർ ആകാശ് മധ്വാലാണ് അവരെ തകർത്തത്. അനാവശ്യമായി സൃഷ്ടിച്ച മൂന്ന് റൺഔട്ടുകളും ലഖ്നൗവിന്റെ പരാജയത്തിന് കാരണമായി.

അതിൽ ഏറ്റവും അപകടകാരിയായ ബാറ്റർ ഓസീസ് താരം മാർക്കസ് സ്റ്റോയിനിസിനെ പുറത്താക്കിയതാണ് മത്സരത്തിൽ ഏറ്റവും നിർണായകമായത്. കാരണം ഒരറ്റത്ത് വിക്കറ്റുകൾ വീണുകൊണ്ടിരുന്നപ്പോഴും, ഒട്ടും കൂസലില്ലാതെ ബാറ്റ് വീശുകയായിരുന്നു അദ്ദേഹം. 27 പന്തിൽ നിന്നും 5 ഫോറും ഒരു സിക്സും അടക്കം 40 റൺസാണ് നേടിയത്. അദ്ദേഹത്തിന്റെ പുറത്താകൽ ഇരു ബാറ്റർമാരുടേയും ശ്രദ്ധക്കുറവ് കൊണ്ടാണെന്ന് പറയേണ്ടിവരും.

ഓൾറൗണ്ടർ കാമറൂൺ ഗ്രീൻ എറിഞ്ഞ പന്ത്രണ്ടാം ഓവറിന്റെ അഞ്ചാം പന്തിൽ ആയിരുന്നു പുറത്തായത്. ഡീപ് മിഡ് വിക്കറ്റ് ബൗണ്ടറിയിലേക്ക് പ്ലേസ് ചെയ്ത് ഡബിൾ എടുക്കാനായിരുന്നു സ്റ്റോയിനിസ് ശ്രമിച്ചത്. ദീപക് ഹൂഡയായിരുന്നു നോൺസ്ട്രൈക്കർ എൻഡിൽ. ഒരു റൺ ഓടിപ്പൂർത്തിയാക്കിയ ശേഷം, ഇരുതാരങ്ങളും പന്ത് എടുക്കുന്നത് നോക്കിയോടിയതാണ് വിനയായത്. രണ്ടാം റൺ എടുക്കുന്നതിനിടെ പിച്ചിന്റെ മധ്യത്തിൽവെച്ച് ഇരുവരും കൂട്ടിയിടിക്കുകയായിരുന്നു. എന്നിട്ടും സ്റ്റോയിനിസ് ഓടിയെങ്കിലും, ടിം ഡേവിഡ് എറിഞ്ഞ ത്രോയിൽ വിക്കറ്റ് കീപ്പർ ഇഷാൻ കിഷൻ അപ്പോഴേക്കും വിക്കറ്റിൽ കൊള്ളിച്ചു.

വീഡിയോ കാണാം..