Category: Latest News

ഇന്ത്യയും ഓസ്ട്രേലിയയും തമ്മിലുള്ള ട്വന്റി-20 പരമ്പരയിലെ രണ്ടാം മത്സരത്തിൽ ഇന്ത്യക്ക് 6 വിക്കറ്റ് വിജയം ഇതോടെ പരമ്പരയിൽ 1-1 നു ഇന്ത്യക്ക്‌ ഒപ്പത്തിനൊപ്പമെത്താനായി, ഔട്ട്‌ഫീൽഡിലെ നനവ് കാരണം ഏറെ വൈകിയാണ് മൽസരം തുടങ്ങാൻ സാധിച്ചത്, 8 ഓവർ വീതം ആക്കി ചുരുക്കിയാണ് മൽസരം നടന്നത്, പരമ്പരയിലെ അവസാന മത്സരം സെപ്റ്റംബർ 25 ഞായറാഴ്ച ഹൈദരാബാദിൽ നടക്കും.

മത്സരത്തിൽ ടോസ് നേടിയ ഇന്ത്യൻ ക്യാപ്റ്റൻ രോഹിത് ശർമ ഓസ്ട്രേലിയയെ ബാറ്റിങ്ങിന് അയക്കുകയായിരുന്നു, ഇന്ത്യൻ ടീമിൽ ഉമേഷ്‌ യാദവിന് പകരം ജസ്പ്രീത് ബുമ്രയും ഭുവനേശ്വർ കുമാറിന് പകരം റിഷഭ് പന്തും ടീമിലെത്തി, ഓസീസ് നിരയിൽ പരിക്കേറ്റ നതാൻ ഇല്ലിസിന് പകരം സീൻ അബോട്ടും ജോഷ് ഇംഗ്ലീസിനു പകരം ഡാനിയൽ സാംസും ടീമിലെത്തി, ഓസ്ട്രേലിയൻ ക്യാപ്റ്റൻ ആരോൺ ഫിഞ്ച് 15 ബോളിൽ 31റൺസ് എടുത്ത് മികച്ച തുടക്കമാണ് ഓസീസിന് നൽകിയത്, എന്നാൽ മറുവശത്ത് അപകടകാരികളായ മാക്സ് വെല്ലിനെയും (0) ടിം ഡേവിഡിനെയും (2) വീഴ്ത്തി അക്‌സർ പട്ടേൽ ഇന്ത്യയെ മത്സരത്തിലേക്ക് തിരിച്ച് കൊണ്ട് വന്നു, എന്നാൽ അവസാന ഓവറുകളിൽ തകർത്തടിച്ച മാത്യു വെയ്ഡ് (43*) ഓസ്ട്രേലിയയെ നിശ്ചിത 8 ഓവറിൽ 90/5 എന്ന നിലയിൽ എത്തിച്ചു.

മറുപടി ബാറ്റിങ്ങിനിറങ്ങിയ ഇന്ത്യക്ക് ഓപ്പണർമാരായ രോഹിത് ശർമയും രാഹുലും സ്ഫോടനാത്മക തുടക്കമാണ് സമ്മാനിച്ചത്, രാഹുൽ 10 റൺസ് എടുത്ത് ആദം സാമ്പയുടെ ബോളിൽ പുറത്തായെങ്കിലും ക്യാപ്റ്റൻ രോഹിത് ശർമ (46*) ഒരറ്റത്ത് നങ്കൂരമിട്ട് ഓസീസ് ബോളർമാരെ ആക്രമിച്ച് കളിച്ചപ്പോൾ ഇന്ത്യ ലക്ഷ്യത്തിലേക്ക് വേഗത്തിൽ മുന്നേറി, ഒടുവിൽ 4 ബോളുകൾ ശേഷിക്കെ ഇന്ത്യ 6 വിക്കറ്റിന് വിജയ തീരത്തെത്തി, ഇന്ത്യയെ മുന്നിൽ നിന്ന് നയിച്ച രോഹിത് ശർമ കളിയിലെ താരമായി തിരഞ്ഞെടുക്കപ്പെട്ടു.

പരിക്ക് കാരണം ഏഷ്യകപ്പ് നഷ്ടമായ ഇന്ത്യയുടെ പേസ് ബോളർ ജസ്പ്രീത് ബുമ്ര ഇന്ത്യൻ ടീമിലേക്ക് തിരിച്ചെത്തിയതോടെ ഇന്ത്യയുടെ ബോളിങ്ങ് ഡിപ്പാർട്മെന്റ് കൂടുതൽ ശക്തിയാർജിച്ചു, ആദ്യ മത്സരത്തിൽ ഇന്ത്യ തോൽക്കാൻ പ്രധാന കാരണം ബോളർമാരുടെ മോശം പ്രകടനം ആയിരുന്നു, മികച്ച രീതിയിൽ കളിച്ച് കൊണ്ടിരുന്ന ഓസ്ട്രേലിയൻ നായകൻ ഫിഞ്ചിനെ പുറത്താക്കിക്കൊണ്ട് ഇന്ത്യൻ ടീമിലേക്ക് തന്റെ തിരിച്ച് വരവ് ബുമ്ര ആഘോഷമാക്കി,

ഏഴാം ഓവർ എറിയാൻ എത്തിയ ബുമ്ര സ്റ്റീവ് സ്മിത്തിന്റെ കാല് ലക്ഷ്യമാക്കി എറിഞ്ഞ യോർക്കർ മികച്ച ഒരു ബോൾ ആയിരുന്നു, ഡെത്ത് ഓവറുകളിൽ തുടർച്ചയായി യോർക്കറുകൾ എറിയാൻ സാധിക്കുന്നു എന്ന പ്രത്യേകത മറ്റ് ഫാസ്റ്റ് ബോളർമാരിൽ നിന്ന് ജസ്പ്രീത് ബുമ്രയെ വ്യത്യസ്തനാക്കുന്ന ഒരു ഘടകമാണ്.

നാഗ്പൂർ വിദർഭ ക്രിക്കറ്റ് അസോസിയേഷൻ സ്റ്റേഡിയത്തിൽ തിങ്ങിക്കൂടിയ ആരാധകരെയും, ലോകമെമ്പാടും ടെലിവിഷൻ സെറ്റുകൾക്ക് മുന്നിലും മൊബൈൽ ഫോണുകളിലും തൽസമയം കണ്ടവരെയും ആവേശത്തിന്റെ കൊടുമുടിയിൽ എത്തിച്ച രണ്ടാം ട്വന്റി ട്വന്റി മത്സരത്തിൽ ഓസ്ട്രേലിയക്ക് എതിരെ ഇന്ത്യൻ ടീമിന് ആറ് വിക്കറ്റിന്റെ തകർപ്പൻ വിജയം.

ആദ്യ മത്സരത്തിൽ ഇന്ത്യയെ നാല് വിക്കറ്റിന് തോൽപ്പിച്ച ഓസ്ട്രേലിയൻ ടീമിന് അതേ നാണയത്തിൽ മറുപടി നൽകാൻ സാധിച്ച ടീം ഇന്ത്യ പരമ്പര സമനിലയിൽ ആക്കുകയും ചെയ്തു. ഇതോടെ ഞായറാഴ്ച ഹൈദേരബാദിൽ നടക്കുന്ന മൂന്നാമത്തെയും അവസാനത്തെയും മത്സരം തീപാറുമെന്ന് ഏതാണ്ട് ഉറപ്പായി. നനഞ്ഞ ഔട്ഫീൽഡ്‌ മൂലം ഇന്ന് മത്സരം പതിവുസമയത്ത് ആരംഭിക്കാൻ കഴിഞ്ഞില്ല.

8 ഓവറാക്കി ചുരുക്കിയ മത്സരം ആരംഭിച്ചത് ഏഴ് മണിക്ക് പകരം ഒൻപതരയോടെയാണ്. കഴിഞ്ഞ മത്സരത്തിൽ നിന്നും രണ്ട് മാറ്റങ്ങളോടെയാണ് ഇന്ത്യ ഇന്ന് ഇറങ്ങിയത്. ഉമേഷ് യാദവിന് പകരം ജസ്പ്രീത് ബൂംറ ടീമിൽ മടങ്ങിയെത്തി. പേസർ ഭുവനേശ്വർ കുമാറിനു പകരം വിക്കറ്റ് കീപ്പർ ഋഷഭ് പന്തും ടീമിൽ ഇടംപിടിച്ചു. മത്സരത്തിൽ ടോസ് നേടിയ ഇന്ത്യൻ നായകൻ രോഹിത് ശർമ ഫീൽഡിംഗ് തെരഞ്ഞെടുക്കുകയായിരുന്നു.

ഓസ്ട്രേലിയൻ ടീം 8 ഓവറിൽ 5 വിക്കറ്റ് നഷ്ടത്തിൽ 90 എന്ന മികച്ച സ്കോർ കണ്ടെത്തി. 20 പന്തുകളിൽ 4 ബൗണ്ടറിയും 3 സിക്സും അടക്കം 43 റൺസ് എടുത്ത വിക്കറ്റ് കീപ്പർ മാത്യൂ വെഡ് ആണ് ടോപ് സ്കോറർ. നായകൻ ആരോൺ ഫിഞ്ച് 15 പന്തിൽ നാല് ബൗണ്ടറിയും ഒരു സിക്സും അടക്കം 31 റൺസ് എടുത്ത് മികച്ച പിന്തുണ നൽകി. സ്പിന്നർ അക്സർ പട്ടേൽ രണ്ട് ഓവറിൽ വെറും 13 റൺസ് വിട്ടുകൊടുത്ത് 2 വിക്കറ്റുകൾ വീഴ്ത്തി. ബൂംറ ഒരു കിടിലൻ യോർക്കറിലൂടെയാണ് ഫിഞ്ചിനേ പുറത്താക്കിയത്.

മറുപടി ബാറ്റിംഗിനിറങ്ങിയ ഇന്ത്യ രോഹിതിന്റെ തകർപ്പൻ അടികളിലൂടെ മത്സരത്തിൽ തുടക്കം മുതലേ മുൻതൂക്കം നേടി. 20 പന്തിൽ നാല് വീതം ബൗണ്ടറിയും സിക്സും സ്വന്തമാക്കിയ രോഹിത് 46 റൺസൊടെ പുറത്താകാതെ നിന്നു. സ്പിന്നർ ആദം സംബ മൂന്ന് വിക്കറ്റ് വീഴ്ത്തി. പത്ത് റൺസ് എടുത്ത രാഹുലിനെയും 11 റൺസ് എടുത്ത വിരാട് കോഹ്‌ലിയേയും ക്ലീൻ ബോൾഡ് ആക്കിയപ്പോൾ, നേരിട്ട ആദ്യ പന്തിൽ തന്നെ സൂര്യകുമാർ യാദവിനെ വിക്കറ്റിന് മുന്നിൽ കുരുക്കുകയും ചെയ്തു സാംബ. 9 റൺസ് എടുത്ത ഹാർദിക്‌ പാണ്ഡ്യയെ കമ്മിൻസും പുറത്താക്കിയതോടെ ഇന്ത്യൻ ആരാധകർ ആകാംക്ഷയിലായി.

എങ്കിലും ഋഷഭ് പന്തിനുപകരം ദിനേശ് കാർത്തിക് ആണ് ക്രീസിൽ എത്തിയത്. അവസാന ഓവറിൽ 9 റൺസ് ആണ് ഇന്ത്യക്ക് ജയിക്കാൻ ഉണ്ടായിരുന്നത്. രോഹിത് നോൺ സ്ട്രൈക്കർ എൻഡിലും. ഡാനിയേൽ സാംസ് എറിഞ്ഞ ആദ്യ പന്തിൽ തന്നെ ബാക്ക്വർഡ്‌ സ്ക്വയർ ലെഗ്ഗിലേക്ക് സിക്സ് അടിച്ച് കാർത്തിക് ഇന്ത്യൻ ആരാധകരുടെ ശ്വാസം നേരെവീഴ്ത്തി. രണ്ടാം പന്തിൽ ഡീപ് മിഡ് വിക്കറ്റിലേക്ക് ബൗണ്ടറിയും നേടിയതോടെ ഇന്ത്യൻ പതാകകൾ ഗാലറിയിൽ പാറിപ്പറന്നു. ഇനി അവസാന അങ്കത്തിനായി ഒരിക്കൽ കൂടി ഇരു ടീമുകളും ഏറ്റുമുട്ടുന്നു, ഞായറാഴ്ച ഹൈദരാബാദിൽ.

നാഗ്പൂരിലെ വിദർഭ ക്രിക്കറ്റ് അസോസിയേഷൻ സ്റ്റേഡിയത്തിൽ നടക്കുന്ന ഇന്ത്യ ഓസ്ട്രേലിയ ട്വന്റി ട്വന്റി പരമ്പരയിലെ രണ്ടാം മത്സരത്തിൽ ഇന്ത്യക്ക് 91 റൺസ് വിജയലക്ഷ്യം. നനഞ്ഞ ഔട്ട്ഫീൽഡ് മൂലം വൈകി തുടങ്ങിയ മത്സരം 8 ഓവർ വീതമാക്കി ചുരുക്കിയിരുന്നു.

ടോസ് നഷ്ടപ്പെട്ട് ആദ്യം ബാറ്റിങ്ങിന് ഇറങ്ങിയ ഓസ്ട്രേലിയൻ ടീം 8 ഓവറിൽ 5 വിക്കറ്റ് നഷ്ടത്തിൽ 90 എന്ന മികച്ച സ്കോർ കണ്ടെത്തി. 20 പന്തുകളിൽ 4 ബൗണ്ടറിയും 3 സിക്സും അടക്കം 43 റൺസ് എടുത്ത വിക്കറ്റ് കീപ്പർ മാത്യൂ വെയ്ദ് ആണ് ടോപ് സ്കോറർ. നായകൻ ആരോൺ ഫിഞ്ച് 15 പന്തിൽ 31 റൺസ് എടുത്തു.

സ്പിന്നർ അക്സർ പട്ടേൽ ആണ് ഇന്ത്യൻ താരങ്ങളിൽ മികച്ചുനിന്നത്. 2 ഓവറിൽ വെറും 13 റൺസ് മാത്രം വിട്ടുകൊടുത്ത് 2 വിക്കറ്റ് നേടി, രണ്ടും ക്ലീൻ ബോൾഡ്. ജസ്പ്രീത് ബൂംറ രണ്ട് ഓവറിൽ 23 റൺസ് വഴങ്ങി നായകൻ ആരോൺ ഫിഞ്ചന്റെ വിക്കറ്റ് നേടി. ശേഷിച്ച രണ്ട് പേർ റൺഔട്ട് ആയി. ഒരു ഓവർ മാത്രം എറിഞ്ഞ ചഹൽ 12 റൺസും പാണ്ഡ്യ 10 റൺസും വഴങ്ങി. ഹർഷൽ പട്ടേൽ രണ്ട് ഓവറിൽ 32 റൺസ്സാണ് വിട്ടുകൊടുത്തത്.

ഏറെ നാളായി പരിക്കുമൂലം ടീമിന് പുറത്തായിരുന്ന പേസർ ബൂംറ ഒരു കിടിലൻ യോർക്കേർ ഏറിഞ്ഞാണ് ഫിഞ്ചിനെ പുറത്താക്കിയത്. അതുവരെ ഇന്ത്യൻ ബോളർ മാരെ തലങ്ങും വിലങ്ങും പ്രഹരിച്ചിരുന്ന അദ്ദേഹത്തിന്റെ ലെഗ് സ്റ്റമ്പ് പിഴുത് ബുംറ ഇന്ത്യയെ മത്സരത്തിലേക്ക് തിരികെകൊണ്ടുവന്നു. മടങ്ങുന്ന വഴി തന്റെ വിക്കറ്റ് നേടിയ ബൂംറയെ അദ്ദേഹം അഭിനന്ദിക്കുന്നത് കാണാമായിരുന്നു.

കഴിഞ്ഞ മത്സരത്തിൽ കളിച്ച ഉമേഷ് യാദവിന് പകരമായാണ് അദ്ദേഹം ടീമിൽ തിരിച്ചെത്തിയത്. പേസർ ഭുവനേശ്വർ കുമാറിനുപകരം വിക്കറ്റ് കീപ്പർ ഋഷഭ് പന്തും ടീമിലേക്ക് മടങ്ങിയെത്തി. എട്ട് ഓവർ മത്സരം ആയത്കൊണ്ട് ഒരു ബോളർക്ക്‌ മാക്സിമം 2 ഓവർ മാത്രമേ എറിയാൻ സാധിക്കുകയുള്ളൂ.

ബുംറയെ അഭിനന്ദിച്ച് ഫിഞ്ച് ,വീഡിയോ ഇതാ :

ഓസ്ട്രേലിയൻ ടീമിന്റെ ഇന്ത്യൻ പര്യടനത്തിലെ രണ്ടാം ട്വന്റി ട്വന്റി മത്സരം ആരംഭിക്കുന്നതിനായുള്ള കാത്തിരിപ്പിലാണ് ലോകമെമ്പാടും ഉള്ള ആരാധകർ. വൈകീട്ട് ഏഴ് മണിക്ക് ആരംഭിക്കേണ്ട മത്സരത്തിൽ ഇതുവരെ ടോസ് ഇടാൻ പോലും കഴിഞ്ഞിട്ടില്ല. പൂർണമായും ഉണങ്ങാതെ കിടക്കുന്ന ഔട്ട്ഫീൽഡ് ആണ് കാരണം. ആദ്യ മത്സരത്തിൽ ഇന്ത്യയെ നാല് വിക്കറ്റിന് ഓസ്ട്രേലിയ തോൽപ്പിച്ചിരുന്നു. ഇന്ന് വിജയിച്ച് പരമ്പരയിൽ ഒപ്പമെത്താനാണ് ഇന്ത്യയുടെ ശ്രമം.

നാഗ്പൂരിലെ വിദർഭ ക്രിക്കറ്റ് അസോസിയേഷൻ സ്റ്റേഡിയത്തിൽ നടക്കുന്ന മത്സരത്തിന് മഴ ഭീഷണി നിലനിന്നിരുന്നു. എങ്കിലും ഇന്ന് പകൽ മഴ പൂർണമായും മാറിനിന്നിട്ടുകൂടി ഇന്നലെ രാത്രി പെയ്ത മഴയിൽ നനഞ്ഞ ഔട്ഫീൽഡ് ഇപ്പോഴും ചില ഭാഗങ്ങളിൽ ഉണങ്ങാതെ കിടക്കുന്ന കാഴ്ചയാണ് കാണാൻ കഴിയുന്നത്. ഗ്രൗണ്ട് സ്റ്റാഫ് ചില ഭാഗങ്ങളിൽ അറക്കപൊടി വിതറി മത്സരം ആരംഭിക്കുന്നതിനായി മൈതാനം തയ്യാറാക്കി എങ്കിലും അമ്പയർമാർക്ക് പൂർണ്ണ തൃപ്തി കൈവന്നിട്ടില്ല.

എട്ടുമണിക്ക് നടത്തിയ രണ്ടാം ഘട്ട വിലയിരുത്തലിലും കാര്യമായി മാറ്റങ്ങൾ ഒന്നും വന്നിട്ടില്ല. അടുത്ത ഇൻസ്പക്ഷൻ എട്ടേമുക്കാലോടുകൂടി നടത്തും. ഏറ്റവും ചുരുങ്ങിയ രീതിയിൽ ഒരു അഞ്ചോവർ വീതമുള്ള മത്സരം നടക്കണം എങ്കിൽ, ഒൻപതേമുക്കാലോടുകൂടി മത്സരം ആരംഭിക്കണം. അല്ലാത്തപക്ഷം മത്സരം ഉപേക്ഷിക്കുന്നതായി പ്രഖ്യാപിക്കും. ബോളർമാർ എറിയുന്ന ഭാഗത്താണ് കൂടുതൽ നനഞ്ഞുകിടക്കുന്നത്. അതുകൊണ്ട് തന്നെ കളിക്കാരുടെ സേഫ്റ്റി ആണ് പ്രധാനം എന്ന് അമ്പയർമാർ വ്യക്തമാക്കി.

ഇരു ടീമുകളും ഗ്രൗണ്ടിൽ പരിശീലനം തുടരുന്നു. അതിനിടെ ഇന്ത്യൻ താരങ്ങളായ ജസ്പ്രീത് ബൂംറയും ഹാർധിക് പാണ്ഡ്യയും ബോളിങ് പരിശീലനം നടത്തുന്ന ഒരു വീഡിയോ ആണ് ഇപ്പോൾ സമൂഹമാധ്യമങ്ങളിൽ നിറഞ്ഞുനിൽക്കുന്നത്. കാരണം, തങ്ങളുടെ സ്ഥിരം ശൈലിയിൽ അല്ല അവരുടെ ബോളിങ്. ഇന്ത്യൻ സീനിയർ താരവും ഓഫ്സ്പിന്നറൂമായ രവിചന്ദ്രൻ അശ്വിന്റെ കൂടെ ചേർന്ന് ഇരുവരും ഓഫ്സ്പിൻ ബോളിങ് രീതിയിൽ ഒരു കൈ നോക്കുകയാണ്.

ആദ്യം അശ്വിൻ ഒരു പന്ത് എറിയുന്നു, അതിനു ശേഷം ബൂംറ വന്ന് അതേപോലെ എറിയാൻ നോക്കുന്നു. ഇതുകണ്ട പാണ്ഡ്യയും ഇവരുടെ കൂടെ ചേരുന്നു. കുറച്ച് സമയം ഇവർ ഇതുപോലെ പന്തെറിഞ്ഞത് കാണികൾക്കും വേറിട്ട ഒരു അനുഭവമായി മാറി. എത്രയും വേഗം മത്സരം ആരംഭിക്കാൻവേണ്ടി കാത്തിരിക്കുകയാണ് അവർ.

പരിക്കുമൂലം ഏഷ്യ കപ്പ് നഷ്ടമായ ബൂംറ ട്വന്റി ട്വന്റി ലോകകപ്പ് ടീമിൽ ഇടം നേടിയിരുന്നു. ഓസ്ട്രേലിയ, ദക്ഷിണാഫ്രിക്ക പരമ്പരയിലും താരം കളിക്കുമെന്ന് ബിസിസിഐ അറിയിച്ചു എങ്കിലും ആദ്യ മത്സരത്തിൽ പൂർണ കായികക്ഷമത കൈവരിക്കാതിരുന്ന അദ്ദേഹത്തിന് പകരം ഉമേഷ് യാദവ് ഇറങ്ങുകയായിരുന്നു. അന്ന് ടോസ് സമയത്ത് നായകൻ രോഹിത് ശർമ പറഞ്ഞത് രണ്ടും മൂന്നും മത്സരങ്ങളിൽ അദ്ദേഹം ടീമിൽ തിരിച്ചെത്തും എന്നാണ്.

റോഡ് സേഫ്റ്റി സീരീസിലെ തങ്ങളുടെ നാലാം മത്സരത്തിൽ ഇംഗ്ലണ്ട് ലജൻഡ്സ് ടീമിനെതിരെ ഇന്ത്യ ലജൻഡ്സ് ടീമിന് 40 റൺസിന്റെ ആവേശോജ്ജ്വല വിജയം. മഴമൂലം 15 ഓവർ വീതമാക്കി ചുരുക്കിയ മത്സരത്തിൽ ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ 5 വിക്കറ്റ് നഷ്ടത്തിൽ 170 റൺസ് എന്ന കൂറ്റൻ സ്കോർ കണ്ടെത്തി. ഇംഗ്ലണ്ടിന്റെ മറുപടി 130/6 ന്‌ അവസാനിച്ചു. ഡെറാഡൂണിലെ രാജീവ് ഗാന്ധി ക്രിക്കറ്റ് സ്റ്റേഡിയത്തിൽ ആണ് മത്സരം നടന്നത്.

ടൂർണമെന്റിലെ ആദ്യ മത്സരത്തിൽ ദക്ഷിണാഫ്രിക്കൻ ടീമിനെ തകർത്ത് തുടങ്ങിയ ഇന്ത്യക്ക് പിന്നീട് നടന്ന രണ്ട് മത്സരങ്ങളിലും മഴ മൂലം കളി ഉപേക്ഷിക്കപ്പെട്ടു. രണ്ടാം മത്സരത്തിൽ വെസ്റ്റിൻഡീസ് ടീമിനെതിരെ ഒരു പന്തുപോലും എറിയാതെയാണ് കളി മഴ കൊണ്ടുപോയത്. മൂന്നാം മത്സരത്തിൽ ന്യൂസിലൻഡ് ടീമിനെതിരെ ആദ്യം ബാറ്റിങ്ങിന് ഇറങ്ങിയ ഇന്ത്യ 5.5 ഓവറിൽ 49/1 എടുത്തുനിൽക്കെ മഴ എത്തുകയായിരുന്നു.

ഇന്നലെ നടന്ന മത്സരത്തിൽ ഇതിഹാസ താരം സച്ചിൻ തെണ്ടുൽക്കർ തന്റെ ബാറ്റിംഗ് കൊണ്ട് ഒരിക്കൽ കൂടി നമ്മളെ വിസ്മയിപ്പിക്കുന്ന കാഴ്ചയാണ് കാണാൻ കഴിഞ്ഞത്. ഓവർ വെട്ടിച്ചുരുക്കിയതോടെ അതിവേഗം റൺസ് കണ്ടെത്തേണ്ടത് അത്യാവശ്യമാണെന്നു മനസ്സിലാക്കി മികച്ച സ്ട്രൈക്ക് റേറ്റിൽ സച്ചിനും മറ്റു ഇന്ത്യൻ താരങ്ങളും ബാറ്റ് ചെയ്തു. 20 പന്ത് നേരിട്ട സച്ചിൻ 3 വീതം ബൗണ്ടറിയും സിക്സും പറത്തി 40 റൺസ് നേടിയാണ് പുറത്തായത്. സച്ചിൻ തന്നെയാണ് പിന്നീട് കളിയിലെ താരമായി തിരഞ്ഞെടുക്കപ്പെട്ടതും.

ഇന്ത്യൻ ഇന്നിംഗ്സിലെ മൂന്നാം ഓവറിന്റെ അവസാന 3 പന്തുകളിൽ 6,6,4 എന്നിങ്ങനെ അടിച്ചുകൂട്ടിയ സച്ചിന്റെ വീഡിയോ ഇപ്പോൾ സമൂഹമാധ്യമങ്ങളിൽ വൻ തരംഗമായി മാറിയിരിക്കുകയാണ്. ക്രിസ് ട്രെമ്ലെട്ട്‌ ആയിരുന്നു ബോളർ. നാലാം പന്തിൽ അല്പം മുന്നോട്ടാഞ്ഞു പന്തിനെ കോരിയെടുത്ത് വിക്കറ്റിന് പിന്നിലേക്ക് കിടിലൻ സിക്സ്. അഞ്ചാം പന്തിൽ ക്രീസിൽ നിന്നും മുന്നോട്ട് സ്‌റ്റെപ്പൗട്ട്‌ ചെയ്ത് കയറിവന്ന് ലോങ് ഓണിലേക്ക് ഒരു കൂറ്റൻ സിക്സ്. അവസാന പന്തിൽ ലോങ് ഓണിനും മിഡ് വിക്കറ്റിനും ഇടയിലൂടെ ബൗണ്ടറിയും.

തന്റെ 49 ആം വയസ്സിലും ഇത്ര ചുറുചുറുക്കോടെ ബാറ്റിംഗ് തുടരുന്ന സച്ചിന്റെ വെടിക്കെട്ട് ബാറ്റിംഗ് കണ്ട ആവേശത്തിൽ മറ്റു ഇന്ത്യൻ താരങ്ങളും നിറയെ ബൗണ്ടറിയും സിക്സും അടിച്ചുകൂട്ടി. യുവരാജ് സിംഗ് 15 പന്തിൽ 31 റൺസും യുസുഫ് പഠാൻ 11 പന്തിൽ 27 റൺസും എടുത്തു. മൂന്ന് വിക്കറ്റ് വീഴ്ത്തിയ സ്റ്റീഫൻ പാരി മാത്രമാണ് ബോളിങ്ങിൽ തിളങ്ങിയത്, ബാക്കി എല്ലാവരും നിറയെ റൺസ് വഴങ്ങി. മറുപടി ബാറ്റിങ്ങിൽ കൃത്യമായ ഇടവേളകളിൽ വിക്കറ്റ് നേടി ഇന്ത്യൻ ബോളർമാർ ഇംഗ്ലണ്ട് താരങ്ങളെ ഉയർന്ന സ്കോർ നേടാൻ സമ്മതിച്ചില്ല. രാജേഷ് പാവാർ മൂന്ന് വിക്കറ്റ് നേടി തിളങ്ങിയപ്പോൾ സ്റ്റുവർട്ട് ബിന്നിയും പ്രഗ്യാൻ ഓജയും മൻപ്രീത് ഗോണിയും ഓരോ വിക്കറ്റ് വീതം വീഴ്ത്തി.

എട്ടു ടീമുകൾ മാറ്റുരയ്ക്കുന്ന സീരീസിൽ ഓരോ ടീമിനും അഞ്ച് മത്സരങ്ങൾ വീതം ആണുള്ളത്. ഇന്ത്യയുടെ അവസാന മത്സരം ഞായറാഴ്ച ബംഗ്ലാദേശ് ടീമിന് എതിരെയാണ്. ഓസ്ട്രേലിയ, ശ്രീലങ്ക ടീമുകൾക്ക് എതിരെ ഇന്ത്യക്ക് മത്സരമില്ല. ഓരോ ടീമിനും അഞ്ച് മത്സരങ്ങൾ പൂർത്തിയാകുമ്പോൾ പോയിന്റ് പട്ടികയിൽ ആദ്യ നാല് സ്ഥാനങ്ങളിൽ വരുന്നവർ സെമി ഫൈനലിൽ ഇടം നേടും. ഇന്ത്യയാണ് ഇപ്പോൾ പട്ടികയിൽ ഒന്നാം സ്ഥാനത്ത് നിൽക്കുന്നത്.

6 6 4 Watch Video :

ന്യൂസിലൻഡ് എ ടീമിന്റെ ഇന്ത്യൻ പര്യടനത്തിലെ ആദ്യ ഏകദിന മത്സരത്തിൽ ഇന്ത്യക്ക് ഏഴ് വിക്കറ്റിന്റെ തകർപ്പൻ ജയം. മലയാളി താരം സഞ്ജു വി സാംസൺ ഇതാദ്യമായി ഇന്ത്യൻ എ ടീം നായകനായി ഇറങ്ങിയ മത്സരത്തിൽ കളിയുടെ എല്ലാ മേഖലകളിലും സമ്പൂർണ ആധിപത്യം നേടിയാണ് ഇന്ത്യ വിജയം നേടിയത്.

നായകനായുള്ള ആദ്യ മത്സരത്തിൽ തന്നെ ടോസ് ഭാഗ്യം ലഭിച്ച സഞ്ജു ഫീൽഡിംഗ് തെരഞ്ഞെടുക്കുകയായിരുന്നു. ചെന്നൈയിലെ എം എ ചിദംബരം സ്റ്റേഡിയത്തിൽ നടന്ന മത്സരത്തിൽ ഇന്ത്യൻ ബൗളർമാർക്ക് മുന്നിൽ തകർന്നടിഞ്ഞ ന്യൂസിലൻഡ് ടീം 40.2 ഓവറിൽ വെറും 167 റൺസിന്‌ എല്ലാവരും പുറത്താവുകയായിരുന്നു. ഇന്ത്യക്കായി ശാർദൂൽ താകൂർ 4 വിക്കറ്റും കുൽദീപ് സെൻ മൂന്ന് വിക്കറ്റും വീഴ്ത്തിയപ്പോൾ സ്പിന്നർ കുൽദീപ് യാദവ് ഒരു വിക്കറ്റ് നേടി. ശേഷിച്ച രണ്ട് പേർ റൺഔട്ട് ആകുകയായിരുന്നു.

168 റൺസ് എന്ന താരതമ്യേന ചെറിയ വിജയലക്ഷ്യം പിന്തുടർന്ന ഇന്ത്യക്കായി ഋതുരാജ് ഗയക്വാദ് 41 റൺസും രാഹുൽ ത്രിപാഠി 31 റൺസും രജത് പടിദാർ 45* റൺസും എടുത്തു. ഫിനിഷർ ആയി ഇറങ്ങിയ നായകൻ സഞ്ജു സാംസൺ 29 റൺസോടെ പുറത്താകാതെ നിന്നു. ഈ ഇന്നിംഗ്സിൽ ഒരു ബൗണ്ടറിയും മൂന്ന് കൂറ്റൻ സിക്സറും ഉൾപ്പെടും. ഇവരുടെ മികവിൽ ഇന്ത്യ 31.5 ഓവറിൽ വിജയലക്ഷ്യം മറികടന്നു. സമീപകാലത്ത് ഇന്ത്യൻ സീനിയർ ടീമിലും ഏകദിന മത്സരങ്ങളിൽ ഫിനിഷ് ചെയ്യാൻ തനിക്ക് സാധിക്കും എന്ന് സഞ്ജു തെളിയിച്ചിരുന്നു.

ഇന്ത്യ ഈ വർഷം നടത്തിയ ഒട്ടുമിക്ക വിദേശപര്യടനങ്ങളിലും കണ്ടപോലെ സഞ്ജുവിന് മികച്ച രീതിയിലുള്ള ആരാധകപിന്തുണയാണ് ചെന്നൈയിലും കാണാൻ കഴിഞ്ഞത്. സഞ്ജു ബാറ്റിങ്ങിന് ഇറങ്ങിയ നേരത്ത് കാതടപ്പിക്കുന്ന ശബ്ദത്തിലാണ് അവർ തങ്ങളുടെ പ്രിയ താരത്തെ വരവേറ്റത്. നേരിട്ട മൂന്നാം പന്തിൽ തന്നെ സഞ്ജു സിക്സ് അടിച്ചതോടെ ആവേശം പതിന്മടങ്ങ് വർധിച്ചു.

ഇന്ത്യൻ ടീമിൽ സ്ഥിരമായി മത്സരങ്ങൾ സിക്സ് അടിച്ച് അവസാനിപ്പിക്കുന്ന മുൻ നായകനും ഇതിഹാസ താരവുമായ ധോണിയെപ്പോലെതന്നെ ഒരു മികച്ച സിക്സ് നേടിയാണ് സഞ്ജുവും ഇന്ന് മത്സരം പൂർത്തിയാക്കിയത്. റചിൻ രവീന്ദ്രയുടെ പന്തിൽ സഞ്ജു ലോങ് ഓണിലേക്കു സ്റ്റെപ്പൗട്ട്‌ ചെയ്ത് കൂറ്റൻ സിക്സ് നേടിയതോടെ ആരാധകർ ചാടിയെഴുന്നേറ്റ് വിജയാഘോഷം തുടങ്ങി. മൈതാനത്ത് നിന്ന് മടങ്ങുന്ന സഞ്ജുവിനെ വൻ ആർപ്പുവിളികളുമായാണ് അവർ വരവേറ്റത്.

നേരത്തെ ഇന്ത്യൻ ടീമിന്റെ ഫീൽഡിംഗ് സമയത്ത് മികച്ച രീതിയിൽ തന്നെയാണ് അദ്ദേഹം കളി നിയന്ത്രിച്ചതും. തന്റെ ബോളർമാർക്ക് കൃത്യമായ അവസരങ്ങളിൽ പന്ത് നൽകി നിർണായക വിക്കറ്റുകൾ വീഴ്ത്തി മത്സരം ഇന്ത്യയുടെ കൈപ്പിടിയിൽ ഒതുക്കി. കൂടാതെ രണ്ട് മികച്ച ക്യാച്ചുകളും സഞ്ജു എടുത്തിരുന്നു. മത്സരത്തിൽ ന്യൂസിലൻഡ് ടീമും ഇന്ത്യൻ ടീമും ഉൾപ്പെടെ എല്ലാവരെയും മൊത്തത്തിൽ നോക്കുമ്പോൾ ഏറ്റവും കൂടുതൽ സിക്സ് അടിച്ചത് സഞ്ജു ആണ് – മൂന്ന് സിക്സുകൾ.

ആഴ്ചകൾക്ക് മുമ്പ് നടന്ന ഏഷ്യ കപ്പ് ടൂർണമെന്റിലും പിന്നീട് പ്രഖ്യാപിച്ച ട്വന്റി ട്വന്റി ലോകകപ്പ് ടീമിൽ നിന്നും തഴയപ്പെട്ട സഞ്ജു സാംസൺ ഇന്ത്യൻ എ ടീം നായകൻ ആയുള്ള തന്റെ അരങ്ങേറ്റ മത്സരത്തിൽ മികച്ച വിജയവുമായി തുടങ്ങി. ചെന്നൈയിലെ എം എ ചിദംബരം സ്റ്റേഡിയത്തിൽ നടന്ന ഏകദിന മത്സരത്തിൽ ഏഴ് വിക്കറ്റിന് ആയിരുന്നു ഇന്ത്യൻ എ ടീമിന്റെ വിജയം.

നായകനായുള്ള ആദ്യ മത്സരത്തിൽ തന്നെ ടോസ് ഭാഗ്യം ലഭിച്ച സഞ്ജു ഫീൽഡിംഗ് തെരഞ്ഞെടുക്കുകയായിരുന്നു. ഇന്ത്യൻ പവർപ്ലേ ബോളർമാരായ ശർദൂൽ താക്കൂറും കുൽദീപ് സെന്നും ന്യൂസിലൻഡ് ബാറ്റർമാരെ നിലംതൊടാൻ അനുവദിച്ചില്ല. ആദ്യം 8 ഓവറിൽ 27/5 എന്ന നിലയിൽ തകർന്ന അവർ പിന്നീട് 18 ഓവറിൽ 74/8 എന്ന നിലയിലേക്ക് കൂപ്പുകുത്തി.

എങ്കിലും ഒൻപതാം വിക്കറ്റിൽ ഒത്തുചേർന്ന മൈക്കേൽ രിപ്പണും ജോ വാക്കറും ചേർന്ന കൂട്ടുകെട്ട് ന്യൂസിലൻഡ് ടീമിന് മാന്യമായ ഒരു സ്കോർ നേടിക്കൊടുത്തൂ. 49 പന്തിൽ നിന്നും മൂന്ന് ബൗണ്ടറിയും ഒരു സിക്സും അടക്കം 36 റൺസ് നേടിയ വാക്കർ റൺഔട്ട് ആകുകയും ശേഷം 104 പന്ത് നേരിട്ട രിപ്പണ് നാല് ബൗണ്ടറി അടക്കം 61 റൺസ് നേടി പത്താമനായി പുറത്താവുകയും ചെയ്തു. ടീം സ്കോർ 40.2 ഓവറിൽ 167 റൺസ്.

ശാർദൂൽ താകൂറിന് നാല് വിക്കറ്റ് ലഭിച്ചപ്പോൾ മറ്റൊരു പേസർ കുൽദീപ് സെൻ മൂന്ന് വിക്കറ്റും വീഴ്ത്തി. സ്പിന്നർ കുൽദീപ് യാദവ് ഒരു വിക്കറ്റും നേടിയപ്പോൾ രണ്ട് പേർ റൺഔട്ട് ആകുകയായിരുന്നു. മറുപടി ബാറ്റിംഗിനിറങ്ങിയ ഇന്ത്യക്ക് 17 റൺസ് എടുത്ത പൃഥ്വി ഷായെ വേഗം നഷ്ടമായി. എങ്കിലും രണ്ടാം വിക്കറ്റിൽ ഋതുരാജും ത്രിപഠിയും ചേർന്ന് 56 റൺസിന്റെ കൂട്ടുകെട്ട് സൃഷ്ടിച്ചു. 3 ബൗണ്ടറിയും 2 സിക്സും പറത്തിയ ഋതുരാജ് 41 റൺസും 4 ബൗണ്ടറി നേടിയ ത്രിപാഠി 31 റൺസും എടുത്തു പുറത്തായി.

നാലാമതായി ക്രീസിൽ എത്തിയ സഞ്ജു സാംസൺ നേരിട്ട മൂന്നാം പന്തിൽ തന്നെ സിക്സ് അടിച്ചിരുന്നു. പിന്നീട് ശ്രദ്ധാപൂർവ്വം കളിച്ച സഞ്ജു രജത് പഠിധാരിന് പിന്തുണ നൽകി. രജത് 41 പന്തിൽ ഏഴ് ബൗണ്ടറി സഹിതം 45 റൺസോടെ നിന്നപ്പോൾ സഞ്ജു ഒരു ബൗണ്ടറിയും മൂന്ന് കൂറ്റൻ സിക്സുകളും അടക്കം 29 റൺസ് നേടി പുറത്താകാതെ നിന്നു. നായകന്റെ പക്വതയോടെ കളിച്ച് ഇന്നിങ്സ് ബിൽഡ് ചെയ്ത ശേഷം അവസാനം ആഞ്ഞടിച്ച് ഇന്ത്യയെ വിജയത്തിൽ എത്തിക്കുകയായിരുന്നു സഞ്ജു. രചിൻ രവീന്ദ്ര എറിഞ്ഞ പന്തിൽ ലോങ് ഓണിലേക്ക് സിക്സ് പായിച്ചാണ് സഞ്ജു മത്സരം പൂർത്തിയാക്കിയത്. വേർപിരിയാത്ത നാലാം വിക്കറ്റിൽ ഇരുവരും ചേർന്ന് 69 പന്തിൽ 69 റൺസ് ആണ് നേടിയത്.

സഞ്ജു സാംസൺ ബാറ്റിങ്ങിന് ഇറങ്ങിയ സമയത്ത് സ്റ്റേഡിയത്തിൽ വൻ ഹർഷാരവവും ആർപ്പുവിളികളുമാണ് മുഴങ്ങിക്കേട്ടത്. യഥാർത്ഥത്തിൽ മത്സരത്തിന് കാണികളെ അനുവദിച്ചിരുന്നില്ല. എങ്കിലും ഗാലറിയുടെ ഒരു ഭാഗത്ത് ഒരു കൂട്ടം ആരാധകർ കയറിക്കൂടിയിരുന്നു. സഞ്ജു ബാറ്റും പിടിച്ച് ഗ്രൗണ്ടിലേക്ക് ഇറങ്ങിയതും അതുവരെ ഇല്ലാതിരുന്ന തരത്തിൽ ഉള്ള ആവേശമായിരുന്നു കാണികളിൽ കാണാൻ കഴിഞ്ഞത്.

അവർക്കുള്ള മറുപടി എന്നൊണ്ണം നേരിട്ട മൂന്നാം പന്തിൽ തന്നെ സിക്സ് പായിച്ച് സഞ്ജു കൂടുതൽ ആവേശം വിതറി. മത്സരം അവസാനിച്ചതും സഞ്ജുവിന്റെ ഒരു കൂറ്റൻ സിക്സിലൂടെ തന്നെ. ഇതിനുമുൻപ് ഇന്ത്യൻ ടീമിന്റെ ഭാഗമായി വിദേശ പര്യടനം നടത്തുന്ന സമയത്തും സഞ്ജുവിന് മികച്ച രീതിയിലുള്ള ആരാധകപിന്തുണയാണ് എല്ലായിടത്തും കണ്ടത്. ഈ ദൃശ്യങ്ങൾ എല്ലാം സമൂഹമാധ്യമങ്ങളിൽ വൻ തരംഗമായി മാറിയിരുന്നു.

തകർപ്പൻ സെഞ്ചുറി പ്രകടനത്തിനു പിന്നാലെ ഫീൽഡിംഗിൽ മികച്ച റൺ ഔട്ടുമായി തിളങ്ങി ഇന്ത്യൻ നായിക ഹർമൻപ്രീത് കൗർ. 334 റൺസ് എന്ന കൂറ്റൻ വിജയലക്ഷ്യം പിന്തുടരുന്ന ഇംഗ്ലണ്ട് ടീമിന്റെ ഒന്നാം നമ്പർ താരം, അപകടകാരിയായ ഓപ്പണർ ടാമി ബ്യുമൊണ്ടിനെ ആണ് മികച്ചൊരു ബുള്ളറ്റ് ത്രോയിലൂടെ കൗർ പുറത്താക്കിയത്.

ജുലൻ ഗോസ്വാമി എറിഞ്ഞ ആദ്യ ഓവറിൽ തന്നെ ഒരു പുൾ ഷോട്ട് ബൗണ്ടറി അവർ നേടിയിരുന്നു. രേണുക സിംഗ് എറിഞ്ഞ രണ്ടാം ഓവറിന്റെ അഞ്ചാം പന്തിലാണ് ആ റൺ ഔട്ട് പിറന്നത്. മിഡ് ഓണിലെക്ക്‌ പന്ത് തട്ടിയിട്ട ശേഷം ഇല്ലാത്ത ഒരു റണ്ണിനായി ഓടുകയായിരുന്നു അവർ. നല്ല വേഗത്തിൽ ബോളിങ് എൻഡിൽ ഓടിയെത്തി എങ്കിലും അപ്പോഴേക്കും പന്ത് വിക്കറ്റിനെ ചുംബിച്ചിരുന്നു.

മിഡ് ഓണിൽ ഫീൽഡ് ചെയ്യുകയായിരുന്ന ഹർമൻ തനിക്ക് നേരെ വന്ന പന്തിലേക്ക്‌ കൃത്യമായി കൈകൾ ചലിപ്പിക്കുകയും, ഒരു നിമിഷം പോലും പാഴാക്കാതെ പന്തെടുത്ത് നേരെ സ്റ്റമ്പിലേക്ക്‌ ഒരു വെടിയുണ്ട കണക്കെയുള്ള ത്രോ ഏറിയുകയുമായിരുന്നു. ഇന്ന് ഇനി എന്താണ് ഹർമന് ചെയ്യാൻ സാധിക്കാത്തതായിട്ടുള്ളളത്!

തന്റെ കരിയറിലെ അഞ്ചാം ഏകദിന സെഞ്ചുറി നേട്ടമാണ് ഇന്ന് ഹർമൻ സ്വന്തമാക്കിയത്. 111 പന്ത് നേരിട്ട അവർ 18 ബൗണ്ടറികളുടെയും 4 കൂറ്റൻ സിക്സിന്റെയും അകമ്പടിയോടെയാണ് പുറത്താകാതെ 143 റൺസ് നേടിയത്. ഹർമൻ താണ്ഡവത്തിൽ ആറാടിയ ടീം ഇന്ത്യ അവസാന മൂന്ന് ഓവറുകളിൽ നിന്ന് അടിച്ച് കൂട്ടിയത് 63 റൺസ് ആയിരുന്നു.

നേരത്തെ ടോസ് നഷ്ടപ്പെട്ട് ആദ്യം ബാറ്റിങ്ങിന് ഇറങ്ങിയ ഇന്ത്യക്ക് 8 റൺസ് എടുത്ത ശേഫാലി വർമയെ തുടക്കത്തിലേ നഷ്ടമായി. യാസ്ഥിക ഭാട്യ 26 റൺസും സ്മൃതി മൻതാന 40 റൺസും എടുത്തു. പിന്നീട് വന്ന ഹർലീൻ ഡിയോളിനെ കൂട്ട് പിടിച്ചാണ് ഹർമൻപ്രീത് കൗർ സ്കോർ ഉയർത്തിയത്. നാൽപതാം ഓവറിൽ 58 റൺസ് എടുത്ത് ഡിയോൾ പുറത്താകുമ്പോൾ ഇരുവരും ചേർന്ന് 113 റൺസിന്റെ കൂട്ടുകെട്ട് സൃഷ്ടിച്ചിരുന്നു.

പിന്നീട് വന്ന പൂജ വസ്ത്രാക്കരിന്റെ കൂടെ 50 റൺസിന്റെ കൂട്ടുകെട്ടിലും ഹർമൻ പങ്കാളിയായി. വേർപിരിയാത്ത ആറാം വിക്കറ്റിൽ ഇന്നിങ്സിന്റെ അവസാന 24 പന്തുകളിൽ നിന്നും 71 റൺസ് ആണ് ഹർമനും ദീപ്തി ശർമയും ചേർന്ന് നേടിയത്. അതിൽ ദീപ്തിയുടെ സംഭാവന വെറും 15 റൺസും. ഇംഗ്ലണ്ട് ഈ സ്കോർ പിന്തുടർന്ന് വിജയിക്കുകയാണ് എങ്കിൽ അത് വനിതാ ഏകദിന ക്രിക്കറ്റ് ചരിത്രത്തിലെ ഏറ്റവും ഉയർന്ന റൺ ചെയ്സ് ആകും. 2012ൽ ന്യൂസിലൻഡിന് എതിരെ 288 റൺസ് പിന്തുടർന്ന് ജയിച്ച ഓസ്ട്രേലിയൻ ടീമിന്റെ പേരിലാണ് ആ റെക്കോർഡ്.

അപകടകാരിയായ ടാമി ബ്യുമൊണ്ടിനെ ബുള്ളറ്റ് ത്രോയിലൂടെ പുറത്താക്കി കൗർ :വീഡിയോ.