Month: March 2023

ഇന്ത്യ-ഓസ്ട്രേലിയ ബോർഡർ ഗവാസ്കർ ട്രോഫിയിലെ അവസാന മത്സരം പുരോഗമിച്ചു കൊണ്ടിരിക്കുകയാണ്.
ഇന്ത്യ സീരീസിലെ രണ്ടു മത്സരങ്ങൾ ജയിച്ചപ്പോൾ കഴിഞ്ഞ മത്സരം ഓസ്ട്രേലിയ ജയിച്ചിരുന്നു. ഈ മത്സരത്തിൽ ആദ്യ ഇന്നിംഗ്സിൽ ഓസ്ട്രേലിയ മികച്ച രീതിയിൽ ബാറ്റ് ചെയ്തിരുന്നു എങ്കിലും വിരാട് കോഹ്ലിയുടെയും ഗില്ലിന്റെയും ബാറ്റിംഗ് മികവിൽ ഇന്ത്യ ലീഡ് സ്വന്തമാക്കി.

വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനൽ മത്സരത്തിൽ ഓസ്ട്രേലിയക്കൊപ്പം ഫൈനൽ കളിക്കുവാൻ ഇന്നത്തെ മത്സരത്തിന്റെ വിധി വളരെ നിർണായകമാണ്. ഇന്നത്തെ മത്സരം ഇന്ത്യ തോൽക്കുകയോ സമനിലയിൽ ആവുകയോ ചെയ്യുകയാണ് എങ്കിൽ ന്യൂസിലാൻഡിൽ പുരോഗമിക്കുന്ന ശ്രീലങ്ക ന്യൂസിലാൻഡ് മത്സരത്തിന്റെ വിധിയും വളരെ നിർണായകമാകും. പക്ഷേ ഇപ്പോഴുള്ള മത്സരത്തിന്റെ ഗതി പ്രകാരം ഇന്ത്യ തോൽക്കുക എന്നത് വളരെ വിദൂരമാണ്.

ഏറെ നാളുകൾക്ക് ശേഷമാണ് ഒരു ടെസ്റ്റ് മത്സരം ഇന്ത്യയിൽ അഞ്ചാം ദിവസത്തിലേക്ക് കടന്നിരിക്കുന്നത്. സീരിസിലെ മറ്റു മൂന്നു മത്സരങ്ങളും മൂന്നു ദിവസത്തിൽ തന്നെ കഴിഞ്ഞിരുന്നു. ഓസ്ട്രേലിയയുടെ രണ്ടാം ഇന്നിംഗ്സ് ബാറ്റിംഗ് ആണ് ഇപ്പോൾ പുരോഗമിച്ചുകൊണ്ടിരിക്കുന്നത്. ഇന്നലെ മത്സരം അവസാനിക്കുന്നതിന് തൊട്ടുമുൻപ് ഇന്ത്യ പുറത്തായിരുന്നു. ഓസ്ട്രേലിയക്കായി ഇന്നലെ ബാറ്റിംഗ് ഓപ്പണിങ് ഇറങ്ങിയത് നൈറ്റ് വാച്ച്മാൻ ആയ മാത്യു കുൻഹ്മാൻ ആയിരുന്നു.

ഇന്നലെ ഓസ്ട്രേലിയ കളി അവസാനിച്ചത് വിക്കറ്റ് നഷ്ടപ്പെടാതെയാണ്. ട്രാവിസ് ഹെഡും മാത്യു കുൻഹ്മാനും ഇന്ന് കളി തുടങ്ങി ഗ്രൗണ്ടിൽ എത്തിയപ്പോൾ തുടക്കത്തിൽ തന്നെ ഓസ്ട്രേലിയക്ക് മാത്യുവിനെ നഷ്ടമായി. അമ്പയർ നിതിൻ മേനോന്റെ തെറ്റായ തീരുമാനമാണ് പുറത്താക്കലിന് കാരണമായത് എന്ന് റിപ്ലൈയിൽ വ്യക്തമായി.

അശ്വിൻ ചെയ്ത പന്ത് കൃത്യമായി പുറത്തേക്ക് പോകുന്നതായി റിപ്ലൈയിൽ വ്യക്തമാക്കുന്നുണ്ട് എങ്കിലും നോൺ സ്ട്രൈക്കർ എൻഡിലുള്ളീസ് ഹെഡ് റിവ്യൂവിന് പോവണ്ട എന്ന് പറഞ്ഞു. എൽ ബി ഡബ്ല്യു ആയായിരുന്നു പുറത്താക്കൽ. ഒരു ഓപ്പണറോ മധ്യനിര ബാറ്റ്സ്മാനോ ആയിരുന്നുവെങ്കിൽ ഇന്ത്യയ്ക്ക് ഈ വിക്കറ്റ് ലഭിക്കില്ലായിരുന്നു എന്ന് കമന്ററിയിൽ ഹർഷ ബോഗ്ലെ പറഞ്ഞു. നിതിൻമേനോന്റെ തെറ്റായ തീരുമാനത്തിന്റെ വീഡിയോ ദൃശ്യം കാണാം.

ഇന്നലെ നടന്ന വനിതാ പ്രീമിയർ ലീഗിലെ പോരാട്ടത്തിൽ യുപി വാരിയേഴ്സ് ടീമിനെ 8 വിക്കറ്റിന് തകർത്ത് മുംബൈ ഇന്ത്യൻസ് ഏകപക്ഷീയവിജയം സ്വന്തമാക്കിയിരുന്നു. ടൂർണമെന്റിൽ കളിച്ച നാല് മത്സരങ്ങളിൽ നാലിലും വിജയിച്ച അവർ 8 പോയിന്റോടെ പട്ടികയിൽ ഒന്നാം സ്ഥാനം നിലനിർത്തി. മത്സരത്തിൽ ടോസ് നേടി ആദ്യം ബാറ്റിങ്ങിന് ഇറങ്ങിയ യുപി വാരിയേഴ്സ് നായിക അലിസ ഹീലിയുടെയും താലിയ മഗ്രാത്തിന്റെയും അർദ്ധസെഞ്ചുറികളുടെ മികവിൽ നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 159 റൺസ് എടുത്തു.

മറുപടി ബാറ്റിംഗിനിറങ്ങിയ മുംബൈ രണ്ട് വിക്കറ്റ് നഷ്ടത്തിൽ വെറും 17.3 ഓവറിൽ ലക്ഷ്യത്തിലെത്തി. ഒന്നാം വിക്കറ്റിൽ 58 റൺസ് കൂട്ടിച്ചേർത്ത ഹെയ്ലി മാത്യൂസ് – യാസ്‌തിക ഭാട്യ ഓപ്പണിംഗ് സഖ്യം അവർക്ക് മികച്ച തുടക്കം നൽകി. എങ്കിലും അതേ സ്കോറിൽ ഇരുവരെയും മടക്കിയ യുപി ടീം, മത്സരത്തിലേക്ക് തിരികെയെത്തി. മാത്യൂസ് 12 റൺസും യാസ്തിക 42 റൺസുമാണ് നേടിയത്. മൂന്നാം വിക്കറ്റിൽ ഒത്തുചേർന്ന നായിക ഹർമൻപ്രീത് കൗർ, ഓൾറൗണ്ടർ നാറ്റ് സിവെർ എന്നിവരുടെ വേർപിരിയാത്ത സെഞ്ചുറി കൂട്ടുകെട്ട് അവരെ വിജയത്തിലേക്ക് നയിച്ചു.

സിവർ 45 റൺസോടെ പുറത്താകാതെ നിന്നപ്പോൾ കൗർ 33 പന്തിൽ നിന്നും 9 ഫോറും ഒരു സിക്‌സുമടക്കം 53 റൺസ് നേടി കളിയിലെ താരമാകുകയും ചെയ്തു. കൗറിന്റെ ഇന്നിംഗ്സിന്റെ തുടക്കത്തിൽ തന്നെ ഭാഗ്യത്തിന്റെ ആനുകൂല്യം ലഭിക്കുകയുണ്ടായി. അഞ്ജലി സർവനി എറിഞ്ഞ പതിനൊന്നാം ഓവറിന്റെ മൂന്നാം പന്തിൽ വിക്കറ്റിൽ കൊണ്ടിട്ടും ബൈൽസ് വീണില്ല. ലെഗ് സൈഡിലൂടെ വന്ന പന്ത് ഫ്ളിക് ഷോട്ട് കളിക്കാൻ ശ്രമിച്ച കൗറിനു പിഴച്ചു. പന്ത് പിന്നിലൂടെ പോയി ലെഗ് സ്റ്റമ്പിൽ കൊള്ളുകയായിരുന്നു.

View this post on Instagram

A post shared by Women's Premier League (WPL) (@wplt20)

എൽഇഡി ലൈറ്റ് മിന്നിയതോടെ ബോളറും കീപ്പർ ഹീലിയും വിക്കറ്റ് നേട്ടം ആഘോഷിക്കാൻ തുടങ്ങി. പക്ഷേ അപ്പോഴാണ് ബൈൽസ് വീണിട്ടില്ല എന്ന് മനസ്സിലാക്കിയത്. യുപി വാരിയേഴ്സ് താരങ്ങൾ മൂക്കത്ത് വിരൽ വച്ചുപോയി. പന്ത് വിക്കറ്റിൽ കൊണ്ടപ്പോൾ ഒന്നിളകിയ ബൈൽസ്‌ വീണ്ടും അതേ സ്ഥാനത്ത് ഇരിപ്പുറപ്പിച്ചു. കൗർ 11 പന്തിൽ 7 റൺസ് എടുത്തുനിൽക്കുമ്പോഴാണ് ഇതുണ്ടായത്. അന്നേരം ആ വിക്കറ്റ് വീണിരുന്നുവെങ്കിൽ മത്സരത്തിന്റെ ഗതി തന്നെ മാറിമറിയുമായിരുന്നു. അതുവരെ മുട്ടിക്കളിച്ച ഹർമൻ, ജീവൻ ലഭിച്ചതോടെ ഗിയർ മാറ്റുകയും തുടർച്ചയായ ബൗണ്ടറികൾ നേടി മുംബൈയെ വിജയത്തിലെത്തിക്കുകയും ചെയ്തു.

വനിതാ പ്രീമിയർ ലീഗിലെ പോരാട്ടത്തിൽ മുംബൈ ഇന്ത്യൻസ് ടീമിനെതിരെ യുപി വാരിയേഴ്സ് ടീമിന് ഭേദപ്പെട്ട സ്കോർ. ടോസ് നേടി ആദ്യം ബാറ്റിംഗ് തെരഞ്ഞെടുത്ത അവർ നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 159 റൺസ് എടുത്തു. അർദ്ധസെഞ്ചുറി നേടിയ നായിക അലിസാ ഹീലിയുടെയും തലിയ മഗ്രാത്തിന്റെയും ഇന്നിങ്സുകളാണ് അവർക്ക് കരുത്തായത്. മുംബൈയ്ക്ക് വേണ്ടി ഇടംകൈ സ്പിന്നർ സൈക ഇഷക് 3 വിക്കറ്റ് വീഴ്ത്തി.

മത്സരത്തിൽ യുപി വാരിയേഴ്‌സ് താരം കിരൺ പ്രഭു നവ്ഗിരെ നേടിയ ഒരു ബൗണ്ടറി വളരെ വിചിത്രമായ ഒന്നായിരുന്നു. അമേലിയ കെർ എറിഞ്ഞ ഏഴാം ഓവറിൽ ആയിരുന്നു എല്ലാവരെയും അമ്പരപ്പിച്ച ആ ഷോട്ട് പിറന്നത്. ഓവറിലെ മൂന്നാം പന്തിൽ റിവേഴ്സ് സ്വീപ്പ് കളിക്കാൻ ശ്രമിച്ച നവ്ഗിരെയുടെ ബാറ്റിന്റെ പിൻഭാഗത്ത് അവസാന നിമിഷം കൊണ്ട പന്ത് വിക്കറ്റ് കീപ്പർ യാസ്ഥിക ഭട്യയുടെ ഇടതുവശത്തുകൂടി പറന്ന് ഷോർട്ട് ഫൈൻ ലെഗ് ഫീൽഡർക്ക്‌ സമീപത്തുകൂടി ബൗണ്ടറിയിലേക്ക് നീങ്ങുകയാണ് ഉണ്ടായത്.

ഇത്തരമൊരു ഷോട്ട് മുമ്പോന്നും കണ്ടിട്ടില്ലാത്ത തരത്തിൽ ഉള്ളതായിരുന്നു. ഇതു കണ്ട നവ്ഗിരേക്ക്‌ പോലും സ്വയം ചിരിയടക്കാൻ കഴിഞ്ഞില്ല. യുപി വാരിയേഴ്സ് ഡഗ് ഔട്ടിൽ ഉള്ളവരും ചിരിയടക്കാൻ പാടുപെടുന്ന ദൃശ്യങ്ങൾ കാണാമായിരുന്നു. മുംബൈ ഇന്ത്യൻസ് താരങ്ങളും ഈ വിചിത്ര ഷോട്ട് കണ്ട് പുഞ്ചിരി തൂകി നിൽക്കുന്ന കാഴ്ചയും കാണാൻ കഴിഞ്ഞു. എങ്കിലും നവ്ഗിരെയുടെ സന്തോഷം അധികം നീണ്ടില്ല. തൊട്ടടുത്ത പന്തിൽ തന്നെ വിക്കറ്റ് കീപ്പർക്ക്‌ ക്യാച്ച് സമ്മാനിച്ച അവർ, 14 പന്തിൽ 17 റൺസോടെ മടങ്ങി.

അഹമ്മദാബാദ് ടെസ്റ്റിൽ നാലാം ദിനം പൂർത്തിയാകുമ്പോൾ മത്സരം ഒന്നുകൂടി മുറുകുകയാണ്‌. ഇന്ന് അതിമനോഹരമായ ഇന്നിങ്സ് കാഴ്ച്ചവെച്ച് 186 റൺസ് എടുത്ത വിരാട് കോഹ്‌ലിയുടെയും മികച്ച പിന്തുണ നൽകി കളിച്ച അക്ഷർ പട്ടേൽ (79), കീപ്പർ ഭരത് (44) എന്നിവരുടെയും മികവിൽ ഒന്നാം ഇന്നിംഗ്സിൽ ഇന്ത്യ 571 റൺസ് നേടി. നേരത്തെ ആദ്യ ഇന്നിംഗ്സിൽ ഓസീസിനേ 480 റൺസിൽ ഒതുക്കിയ ഇന്ത്യക്ക് ഇതോടെ മത്സരത്തിൽ 91 റൺസിന്റെ നിർണായക ലീഡ് സ്വന്തമായി. അവസാന നിമിഷങ്ങളിൽ രണ്ടാം ഇന്നിംഗ്സ് ബാറ്റിങ്ങിന് ഇറങ്ങിയ ഓസീസ് 6 ഓവറിൽ 3 റൺസ് എടുത്തിട്ടുണ്ട്.

മത്സരത്തിൽ വിരാട് കോഹ്‌ലിയുടെ വിക്കറ്റ് നേടാനായി ഓസീസ് താരങ്ങൾ പഠിച്ച പണി പതിനെട്ടും പയറ്റിനോക്കി. മറുവശത്ത് ഓരോ വിക്കറ്റ് വീണുകൊണ്ടിരിക്കുമ്പോഴും വമ്പനടികളിലൂടെ തന്റെ ഇരട്ടസെഞ്ചുറി നേട്ടത്തിലേക്ക് അദ്ദേഹം അടുത്തുകൊണ്ടിരുന്നു. മാത്രമല്ല, ഇന്ന് വേഗത്തിൽ സ്കോർ ചെയ്ത് അവസാന മണിക്കൂറിൽ ഏതാനും ഓവറുകൾ ഓസീസ് ബാറ്റിങ്ങിന് നൽകണം എന്നുള്ള ലക്ഷ്യവും ഉണ്ടായിരുന്നു. മിക്ക ഫീൽഡർമാരും മുപ്പതുവാര വൃത്തത്തിന്റെ അകത്ത് നിന്നതുകൊണ്ട് കോഹ്‌ലി അനായാസം ഉയർത്തിയടിച്ച് റൺസ് കണ്ടെത്തിക്കൊണ്ടിരുന്നു.

ഒടുവിൽ സഹികെട്ട് നായകൻ സ്റ്റീവൻ സ്മിത്ത് എല്ലാ ഫീൽഡർമാരെയും ബൗണ്ടറിയിലേക്ക് നീക്കി വിന്യസിക്കേണ്ടിവന്നു. ഓഫ് സ്പിന്നർ ലയൺ 178ആം ഓവർ എറിയാൻ എത്തിയപ്പോൾ ആയിരുന്നു അത്. അതിന് ഫലം കാണുകയും ചെയ്തു എന്ന് പറയേണ്ടി വരും. ഓവറിലെ മൂന്നാം പന്തിൽ കോഹ്‌ലി ഉയർത്തിയടിച്ച പന്ത് ഡീപ് മിഡ് വിക്കറ്റിൽ പീറ്റർ ഹാൻഡ്സ്കോമ്പിൻെറ കൈകളിൽ വന്നെങ്കിലും ക്യാച്ച് പൂർത്തിയാക്കാൻ സാധിച്ചില്ല.

ജീവൻ കിട്ടിയെങ്കിലും കോഹ്‌ലി തട്ടിമുട്ടി 200 കടത്താൻ ശ്രമം നടത്തിയില്ല. ടോഡ്‌ മർഫി എറിഞ്ഞ അടുത്ത ഓവറിലും കോഹ്‌ലി വൻ ഷോട്ട് കളിക്കാൻ ശ്രമിച്ചപ്പോൾ ഇത്തവണ ഡീപ് മിഡ് വിക്കറ്റിൽ മാർണസ് ലഭുഷേയ്ൻ കൈപ്പിടിയിൽ ഒതുക്കി. അതോടെ 186 റൺസിൽ കോഹ്‌ലി പുറത്താകുകയും ഇന്ത്യൻ ഇന്നിങ്സിന് അന്ത്യം കുറിക്കുകയും ചെയ്തു.

അഹമ്മദാബാദിൽ നടക്കുന്ന ബോർഡർ ഗാവസ്കർ ട്രോഫി ടെസ്റ്റ് പരമ്പരയിലെ അവസാന മത്സരം ആവേശകരമായ അന്ത്യത്തിലേക്ക് നീങ്ങുകയാണ്. നാലാം ദിനമായ ഇന്ന് കളി നിർത്തുമ്പോൾ ഓസ്ട്രേലിയൻ ടീം രണ്ടാം ഇന്നിംഗ്സിൽ 6 ഓവറിൽ 3 റൺസ് എടുത്തുനിൽക്കുകയാണ്. നേരത്തെ ഇന്ത്യ ഒന്നാം ഇന്നിംഗ്സിൽ 571 റൺസ് നേടി 91 റൺസിന്റെ ലീഡ് നേടിയിരുന്നു. 186 റൺസെടുത്ത വിരാട് കോഹ്‌ലിയുടെയും 79 റൺസ് എടുത്ത അക്ഷർ പട്ടേലിന്റെയും 44 റൺസ് നേടിയ ഭരത്തിന്റെയും ഇന്നിങ്സുകളാണ് ഇന്ത്യക്ക് കരുത്തായത്. ഇന്നലെ ഓപ്പണർ ഗില്ലും സെഞ്ചുറി നേടിയിരുന്നു.

289/3 എന്ന നിലയിൽ ഇന്ന് ബാറ്റിംഗ് പുനരാരംഭിച്ച ഇന്ത്യക്ക് ആദ്യ മണിക്കൂറിൽതന്നെ 28 റൺസ് എടുത്ത ജഡേജയുടെ വിക്കറ്റ് നഷ്ടമായി. എങ്കിലും വിക്കറ്റ് കീപ്പർ ഭരത്തിനെ കൂട്ടുപിടിച്ച് കോഹ്‌ലി തന്റെ സെഞ്ചുറി നേട്ടം പൂർത്തിയാക്കി. 2019 നവംബറിൽ ഇഡൻ ഗർഡൻസിൽ ബംഗ്ലാദേശിന് എതിരായ മത്സരത്തിൽ സെഞ്ചുറി നേടിയ ശേഷമുള്ള അടുത്ത ടെസ്റ്റ് സെഞ്ചുറിയാണിത്. രണ്ടാം സെഷനിൽ 44 റൺസെടുത്ത ഭരത് മടങ്ങിയ ശേഷം എത്തിയ അക്ഷർ പട്ടേൽ മികച്ച ബാറ്റിംഗ് കാഴ്ചവെച്ചു.

ആറാം വിക്കറ്റിൽ ഇരുവരും ചേർന്ന് 162 റൺസ് കൂട്ടുകെട്ട് സൃഷ്ടിച്ചു. 79 റൺസ് എടുത്ത പട്ടേൽ ചായയ്ക്ക് ശേഷമുള്ള സെഷനിൽ മടങ്ങി. വിരാട് കോഹ്‌ലി ഇരട്ടസെഞ്ചുറി നേട്ടത്തിനായി കിണഞ്ഞു പരിശ്രമിച്ചുവെങ്കിലും 186 റൺസിൽ ടോഡ്‌ മർഫിയുടെ പന്തിൽ വൻ ഷോട്ട് കളിക്കാൻ ശ്രമിച്ചപ്പോൾ ക്യാച്ച് ഔട്ട് ആകുകയായിരുന്നു. ഇന്ത്യയുടെ അവസാന 4 വിക്കറ്റുകൾ 16 റൺസിനിടെ വീണിരുന്നു. പുറംവേദനയെ തുടർന്ന് ശ്രേയസ് അയ്യർ ബാറ്റിങ്ങിന് ഇറങ്ങിയതുമില്ല. എങ്കിലും 91 റൺസ് ലീഡ് നേടാനായതിൽ ഇന്ത്യക്ക് സമാധാനിക്കാം.

ഇന്ന് രാവിലെ ഇന്ത്യൻ ബാറ്റിങ്ങിന് ഇടയിൽ വിരാട് കോഹ്‌ലി സഹതാരം ഭരത്തിനോട് വളരെ പരുഷമായ രീതിയിൽ പ്രതികരിച്ചിരുന്നു. ഇന്ത്യ 310/4 എന്ന നിലയിൽ നിൽക്കുമ്പോൾ ആയിരുന്നു അത്. ടോഡ്‌ മർഫി എറിഞ്ഞ ഓവറിനിടെ ലെഗ് സൈഡിലേക്ക് തട്ടിയിട്ട കോഹ്‌ലി സിംഗിൾ എടുക്കാനായി ഓടി. പിച്ചിന്റെ പകുതിയോളം ദൂരം പിന്നിട്ടപ്പോൾ ഭരത് ഓട്ടം നിർത്തിയത് കണ്ട് കോഹ്‌ലിക്ക് തിരികെ ബാറ്റിംഗ് എൻഡിലേക്ക് ഓടേണ്ടതായി വന്നു. ഭാഗ്യത്തിന് വിക്കറ്റ് കീപ്പർ പന്ത് കൈപ്പിടിയിൽ ഒതുക്കുന്നതിന് മുൻപേ ക്രീസിൽ എത്താൻ സാധിച്ചു. തുടർന്ന് പിന്തിരിഞ്ഞ് രൂക്ഷഭാവത്തിൽ ഒരു നോട്ടം വച്ചുകൊടുത്തപ്പോൾ ഭയന്നുപോയ ഭരത് കണ്ണുകൾ താഴേക്ക് നോക്കിക്കൊണ്ട് ഒഴിഞ്ഞുമാറാൻ ശ്രമിക്കുകയായിരുന്നു. ഈ ദൃശ്യങ്ങൾ സമൂഹമാധ്യമങ്ങളിൽ വൈറൽ ആയി മാറിയിരിക്കുകയാണ്.

ഇന്നലെ അവസാനിച്ച വെസ്റ്റിൻഡീസ് ദക്ഷിണാഫ്രിക്ക ടെസ്റ്റ് പരമ്പര ദക്ഷിണാഫ്രിക്ക 2-0ന് സ്വന്തമാക്കിയിരുന്നു. സെഞ്ചുറിയനിൽ നടന്ന ആദ്യ മത്സരത്തിൽ 87 റൺസിന് വിജയിച്ച അവർ, ഇന്നലെ ജോഹാനസ്ബർഗിൽ 284 റൺസിന്റെ കൂറ്റൻ വിജയവും സ്വന്തമാക്കി. രണ്ടാം ഇന്നിംഗ്സിൽ 172 റൺസ് ഉൾപ്പെടെ മത്സരത്തിലാകെ 200 റൺസ് എടുത്ത നായകൻ ടെംബാ ബാവുമായാണ്‌ കളിയിലെ താരം. ഓപ്പണർ ഐഡൻ മാർക്രം പരമ്പരയുടെ താരവുമായി തിരഞ്ഞെടുക്കപ്പെട്ടു.

ആദ്യ ഇന്നിംഗ്സിൽ 320 റൺസ് എടുത്ത ദക്ഷിണാഫ്രിക്കയ്ക്ക് മറുപടിയായി വെസ്റ്റിൻഡീസിന് 251 റൺസ് എടുക്കാനേ കഴിഞ്ഞുള്ളൂ. രണ്ടാം ഇന്നിംഗ്സിൽ മുന്നിൽനിന്നും നയിച്ച നായകൻ ടെമ്പാ ബാവുമയുടെ മികവിൽ അവർ 321 റൺസ് എടുത്തു. എന്നാൽ 391 എന്ന കൂറ്റൻ വിജയലക്ഷ്യം പിന്തുടർന്ന കരീബിയൻ പടയ്ക്ക്‌ 106 റൺസ് എടുക്കാൻ മാത്രമേ സാധിച്ചുള്ളൂ. സൈമൺ ഹാർമറും ജറാൾഡ് കോയിറ്റ്സിയും മൂന്ന് വിക്കറ്റ് വീതം വീഴ്ത്തിയപ്പോൾ റബാടയും കേശവ് മഹാരാജും രണ്ട് വിക്കറ്റ് വീതവും വീഴ്ത്തി.

ഇന്നലെ വിക്കറ്റ് നേട്ടം ആഘോഷിക്കുന്നതിനിടയിൽ കാലുതെറ്റി വീണ മഹാരാജിനെ ഒടുവിൽ സ്ട്രെച്ചറിലാണ് ഗ്രൗണ്ടിൽ നിന്നും കൊണ്ടുപോയത്. കൈൽ മയേഴ്‌സിനെ വിക്കറ്റിന് മുന്നിൽ കുരുക്കിയെങ്കിലും അമ്പയർ ഔട്ട് നൽകിയില്ല. ദക്ഷിണാഫ്രിക്ക റിവ്യൂ എടുക്കുകയും അത് ഔട്ടാണെന്ന് സ്ക്രീനിൽ തെളിയുകയും ചെയ്തു. ആ നിമിഷത്തിൽ ഗ്രൗണ്ടിൽ ചാടി വിക്കറ്റ് നേട്ടം ആഘോഷിക്കാൻ ശ്രമിച്ചപ്പോൾ ആണ് കേശവ് മഹാരാജ് തെന്നിവീണത്. നേരത്തെ മറ്റൊരു ബോളർ മുൾഡർ പരുക്കേറ്റ് മടങ്ങിയതോടെ 4 ബോളർമാരായി ചുരുങ്ങിയിരുന്നു. മഹാരാജും കൂടി പോയതോടെ മൂന്നു പേരായി അവർ ചുരുങ്ങി. എങ്കിലും വെസ്റ്റിൻഡീസ് താരങ്ങൾ ബാറ്റിംഗ് മറന്നതോടെ 3 വിക്കറ്റ് വീതം വീഴ്ത്തിയ സൈമൺ ഹാർമറും ജറാൾഡ് കോയിറ്റ്സിയും ചേർന്ന് അവരെ 106 റൺസിൽ ഓൾഔട്ടാക്കി.

ടെസ്റ്റ്‌ ക്രിക്കറ്റ്‌ എന്നത് ഒരു അതിജീവനമാണ്. ഏറ്റവും നന്നായി പരീക്ഷണങ്ങളെ നേരിടുന്നവർ വിജയിക്കുക തന്നെ ചെയ്യുന്നു.പ്രതിരോധവും ആക്രമണവും ഈ പരീക്ഷകൾ വിജയിക്കാൻ ഒരേ പോലെ ഉപയോഗപെടുത്താം. ഇപ്പോൾ നടന്ന് കൊണ്ടിരിക്കുന്ന ബോർഡർ ഗവസ്‌കർ ട്രോഫി ടെസ്റ്റ്‌ മത്സരത്തിലും സംഭവിക്കുന്നത് മറ്റൊന്നുമല്ല.ഷോർട്ട് ബോളുകൾ കൊണ്ട് പരീക്ഷിച്ച ഗ്രീനെ ആക്രമണം എന്നാ ആയുധം കൊണ്ട് ഭാരത് വിജയിച്ചിരിക്കുകയാണ്.

മത്സരത്തിന്റെ 134 മത്തെ ഓവറിലാണ് സംഭവം. കോഹ്ലിക്ക് ഒപ്പം ഭാരത് ചേർന്നതോടെ ഓസ്ട്രേലിയക്ക്‌ മത്സരത്തിലേക്ക് തിരകെ വരാനുള്ള ഏക വഴിയും നഷ്ടമാവുകയാണ്. ഒടുവിൽ ഷോർട് ബോളുകൾ കൊണ്ട് ഇന്ത്യൻ ബാറ്റർമാരെ പരീക്ഷിക്കാൻ സ്മിത്തും ഗ്രീനും തയ്യാറായി.എന്നാൽ ഓസ്ട്രേലിയ മനസ്സിൽ കണ്ടത് ഭരത് മാനത്ത് കാണുകയായിരുന്നു.

ഓവറിലെ ആദ്യത്തെ പന്ത് കോഹ്ലി നേരിടുന്നു. ഡോട്ട് ബോൾ . രണ്ടാമത്തെ പന്ത് ഷോർട് ബോൾ കോഹ്ലി സിംഗിൾ എടുക്കുന്നു. മൂന്നാമത്തെ പന്ത് ഭരത് നേരിടുന്നു.66 മീറ്റർ അകലെ ബൗണ്ടറിക്ക് അപ്പുറം ബോൾ എത്തുന്നു. വീണ്ടും ബൗൺസർ വീണ്ടും സിക്സർ. അടുത്ത പന്ത് കട്ട്‌ ചെയ്യുന്നു. ബൗണ്ടറി. ഒപ്പം നോ ബോളും, അടുത്ത പന്ത് വീണ്ടും നോ ബോൾ. അടുത്ത പന്ത് സിംഗിൾ. അവസാന പന്ത് കോഹ്ലി ഡിഫെൻഡ് ചെയ്യുന്നു. ഡോട്ട് ബോൾ. ഓവറിൽ 21 റൺസ്. അർഹിച്ച ഫിഫ്റ്റി സ്വന്തമാക്കാൻ കഴിയാതെ ഒടുവിൽ 44 റൺസ് സ്വന്തമാക്കിയ ഭരത് ലിയോണ് മുന്നിൽ വീഴുന്നു.

വീഡിയോ :

നാല് കൊല്ലങ്ങൾക്ക് മുന്നേയാണ് അയാൾ ഇതിന് മുന്നേ ടെസ്റ്റ്‌ ക്രിക്കറ്റിൽ ഒരു സെഞ്ച്വറി കുറിച്ചത്.2019 നവംബർ 22 ന്ന് ബംഗ്ലാദേശിനെതിരെ ഈഡൻ ഗാർഡൻസിൽ തന്റെ 27 മത്തെ ടെസ്റ്റ്‌ സെഞ്ച്വറി നേടുമ്പോൾ ഒരു ക്രിക്കറ്റ്‌ ആരാധകൻ പോലും കരുതിയിരുന്നില്ല കോഹ്ലിയുടെ അടുത്ത ടെസ്റ്റ്‌ സെഞ്ച്വറിക്ക്‌ വേണ്ടി ഇത്ര നാളുകൾ കാത്തിരിക്കേണ്ടി വരുമെന്ന്.സമകാലിക ക്രിക്കറ്റിലെ ഫാബ് ഫോറിൽ ആദ്യമായി 27 ടെസ്റ്റ്‌ സെഞ്ച്വറി നേടിയ കോഹ്ലി സ്മിത്തും റൂട്ടും 28 ൽ എത്തിയതിൻ നാളുകൾക്ക് അപ്പുറമാണ് കോഹ്ലി 28 ൽ എത്തിയത് എന്നത് വേദനകരമാണ്.

എന്നാൽ സെഞ്ച്വറി അടിക്കാൻ മറന്ന കോഹ്ലി കുട്ടി ക്രിക്കറ്റിലും ഏകദിനത്തിലും സെഞ്ച്വറികൾ അടിച്ചു കൂട്ടി തിരകെ വന്നു. ഏകദിനത്തിൽ തുടരെ തുടരെ സെഞ്ച്വറികൾ വീണ്ടും പിറന്നു.എന്നാൽ ടെസ്റ്റ്‌ ക്രിക്കറ്റിൽ മാത്രം അയാൾക്ക് തന്റെ പഴയ മികവ് നിലനിർത്താൻ കഴിഞ്ഞില്ല.ഒടുവിൽ ടീമിന് ഏറ്റവും ആവശ്യമായ സാഹചര്യത്തിൽ ഒരിക്കൽ കൂടി രാജാവ് അവതരിച്ചിരിക്കുന്നു.ടെസ്റ്റ്‌ ക്രിക്കറ്റിൽ തന്റെ 28 മത്തെ സെഞ്ച്വറി അയാൾ സ്വന്തമാക്കി കഴിഞ്ഞിരിക്കുന്നു.

ഈ സെഞ്ച്വറി നേടിയ ശേഷം വളരെ ശാന്തമായിയാണ് കോഹ്ലി ആഘോഷിച്ചത്. അഗ്രെഷൻ ഒന്നുമില്ലാതെ വളരെ ശാന്തമായി അദ്ദേഹം ഗാലറിയേ അഭിവാദ്യം ചെയ്തു.ഗാലറിയിൽ നിന്ന് കോഹ്ലിയേ വണങ്ങിയ ഒരു കൊച്ച് ആരാധകനെയും കാണാൻ കഴിഞ്ഞു.