Month: May 2023

ബുധനാഴ്ച ഉച്ചകഴിഞ്ഞ് ലഖ്നൗവിലെ അടൽ ബിഹാരി വാജ്പേയി ഏകന സ്റ്റേഡിയത്തിൽ നടന്ന ചെന്നൈ സൂപ്പർ കിംഗ്സ് – ലഖ്നൗ സൂപ്പർ ജയന്റ്സ് പോരാട്ടം, മഴമൂലം ഉപേക്ഷിച്ചതോടെ ഇരുടീമുകളും ഓരോ പോയിന്റ് വീതം പങ്കിട്ടിരുന്നു. മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ലഖ്നൗ 19.2 ഓവറിൽ 125/7 എന്ന നിലയിൽ നിൽക്കെയാണ് മഴയെത്തിയത്. 33 പന്തിൽ 59 റൺസോടെ ആയുഷ് ബദോണി പുറത്താകാതെ നിന്നു. ഇരുടീമുകൾക്കും ഇതോടെ 11 പോയിന്റായെങ്കിലും, റൺറേറ്റിന്റെ മികവിൽ ലഖ്നൗ രണ്ടാമതും ചെന്നൈ മൂന്നാമതുമാണ്.

ഇതിനുമുൻപ് ലഖ്നൗ കളിച്ച മത്സരത്തിൽ തിങ്കളാഴ്ച ഇതേ ഗ്രൗണ്ടിൽ ബംഗളൂരുവിനോട്‌ 18 റൺസിന് പരാജയപ്പെട്ടിരുന്നു. അന്നത്തെ മത്സരത്തിനിടയിലും മത്സരം കഴിഞ്ഞും സംഭവബഹുലമായ നിമിഷങ്ങൾ അരങ്ങേറിയിരുന്നു. ലഖ്നൗ സ്കോർ പിന്തുടരുന്നതിനിടെ ബാറ്റ് ചെയ്തിരു ന്ന നവീൻ ഉൾ ഹഖിന്റെ നേർക്ക് ബംഗളൂരു താരം വിരാട് കോഹ്‌ലി അസഭ്യവാക്കുകൾ ഉപയോഗിച്ചിരുന്നു. തുടർന്ന് ഇരുവരും വാക്കുതർക്കത്തിൽ ഏർപ്പെടുകയും, കോഹ്‌ലിയെ പിന്തിരിപ്പിക്കാൻ ശ്രമിച്ച അമിത് മിശ്രയുടെ നേർക്കും കോഹ്‌ലി ആക്രോശിക്കുകയും ചെയ്തു.

മത്സരശേഷമുള്ള താരങ്ങളുടെ ഹസ്തദാന സമയത്തും ഇതിന്റെ തുടർച്ചയായി കോഹ്‌ലിയും നവീനും വാക്കുകൾകൊണ്ട് ഏറ്റുമുട്ടി. അതിനുശേഷം കോഹ്‌ലിയോട് സംസാരിക്കാനെത്തിയ കൈൽ മയേഴ്സിനെ, ലഖ്നൗ പരിശീലകൻ ഗൗതം ഗംഭീർ ഇടപെട്ട് തടഞ്ഞു മടക്കിയയച്ചു. അതേത്തുടർന്ന് വിരാട് കോഹ്‌ലിയും ഗംഭീറും തമ്മിൽ രൂക്ഷമായ വാക്പോര് മുറുകുകയും കയ്യാങ്കളിയുടെ വക്കിലെത്തുകയും ചെയ്തിരുന്നു. ഒടുവിൽ ഓടിക്കൂടിയ സഹതാരങ്ങളും കോച്ചിംഗ് സ്റ്റാഫും ചേർന്ന് ഇരുവരെയും പിടിച്ചു മാറ്റുകയാണ് ഉണ്ടായത്. അന്നത്തെ പെരുമാറ്റദൂഷ്യത്തിന്‌ കോഹ്‌ലിയ്ക്കും ഗംഭീറിനും മുഴുവൻ മാച്ച് ഫീയും, നവീൻ ഉൾ ഹഖിന് മാച്ച് ഫീയുടെ പകുതിയും പിഴയായി ലഭിച്ചിരുന്നു.

സംഭവത്തിൽ താരങ്ങളെ അനുകൂലിച്ചും പ്രതികൂലിച്ചും നിരവധി പേരാണ് സമൂഹമാധ്യമങ്ങളിൽ രംഗത്തെത്തിയത്. ഇപ്പോൾ പുറത്തുവരുന്ന മറ്റൊരു വീഡിയോയിൽ, ഗൗതം ഗംഭീർ ലഖ്നൗവിലെ സ്വന്തം കാണികൾക്ക് മുന്നിൽ അപമാനിതനാകുന്നുണ്ട്. ഇന്നലത്തെ ചെന്നൈയ്‌ക്കെതിരെ നടന്ന മത്സരത്തിൽ നിന്നുള്ളതാണ് വീഡിയോ. മൈതാനത്തുനിന്നും ഡ്രസിംഗ് റൂമിലേക്ക് പടിക്കെട്ടുകൾ കയറിപ്പോകുന്ന സമയത്ത് കാണികൾ കോഹ്‌ലി.. കോഹ്‌ലി.. വിളികളുമായി ഗംഭീറിനെ ചൊടിപ്പിക്കുകയായിരുന്നു. നടത്തം നിർത്തി രണ്ടു നിമിഷം അങ്ങോട്ടേക്ക് നോക്കിനിന്ന ഗംഭീർ, നീരസത്തോടെ കയറിപ്പോകുന്നത് വീഡിയോയിൽ കാണാം.

തിങ്കളാഴ്ച രാത്രി നടന്ന ബംഗളൂരു-ലഖ്നൗ ഐപിഎൽ മത്സരത്തിനിടെ ഇരുടീമുകളിലെയും താരങ്ങൾ തമ്മിലുണ്ടായ കശപിശയും അതിനെത്തുടർന്നുണ്ടായ സംഭവവികാസങ്ങളും ഇന്നും സമൂഹമാധ്യമങ്ങളിൽ ചർച്ചാവിഷയമായി തുടരുകയാണ്. വേഗം കുറഞ്ഞ പിച്ചിൽ നടന്ന ലോസ്കോറിംഗ് പോരാട്ടത്തിൽ 18 റൺസിനാണ് ബംഗളൂരു, ലഖ്നൗവിനെ കീഴടക്കിയത്. ഗ്രൗണ്ടിലെ അതിരുവിട്ട പെരുമാറ്റദൂഷ്യത്തിന് ബംഗളൂരു താരം വിരാട് കോഹ്‌ലിയ്ക്കും ലഖ്നൗ പരിശീലകൻ ഗൗതം ഗംഭീനും 100% മാച്ച് ഫീയും ലഖ്നൗവിന്റെ അഫ്ഗാൻ പേസർ നവീൻ ഉൾ ഹഖിന് 50% മാച്ച് ഫീയും പിഴയായി ഒടുക്കേണ്ടിവന്നിരുന്നു.

ലഖ്നൗ ബാറ്റിംഗ് സമയത്തായിരുന്നു സംഭവങ്ങളുടെ തുടക്കം കുറിച്ചത്. നവീൻ ഉൾ ഹഖിന്റെ ബാറ്റിങ്ങിനിടയിൽ, കോഹ്‌ലി മുന്നോട്ട് കയറിവരികയും ഇരുവരും പരസ്പരം വാക്കുകൾകൊണ്ട് ഏറ്റുമുട്ടുകയും ചെയ്തു. ലഖ്നൗ ഇന്നിങ്സിലെ പതിനേഴാം ഓവറിൽ ആയിരുന്നു അത്. തുടർന്ന് ഇരുവരെയും പിന്തിരിപ്പിക്കാനെത്തിയ നോൺസ്ട്രൈക്കർ അമിത് മിശ്രയുടെ നേർക്കും കോഹ്‌ലി അസഭ്യവാക്കുകൾ ഉപയോഗിച്ചിരുന്നു. മത്സരം കഴിഞ്ഞ് ടീമംഗങ്ങൾ പരസ്പരം ഹസ്തദാനം ചെയ്യുന്ന സമയത്ത് വീണ്ടുമൊരിക്കൽകൂടി കോഹ്‌ലി – നവീൻ വാക്പോരുണ്ടായി. അതിനുശേഷം കോഹ്‌ലിയോട് സംസാരിക്കാനെത്തിയ കൈൽ മെയേഴ്സിനെ പിന്തിരിപ്പിച്ചു കൊണ്ടുപോകുകയായിരുന്ന ലഖ്നൗ പരിശീലകൻ ഗൗതം ഗംഭീറും കോഹ്‌ലിയും തമ്മിലായി സംഘർഷം. ഒടുവിൽ ഏറെ പണിപ്പെട്ടാണ് സഹതാരങ്ങളും കോച്ചിംഗ് സ്റ്റാഫും ചേർന്ന് ഇരുവരെയും പിടിച്ചുമാറ്റി രംഗം ശാന്തമാക്കിയത്.

കോഹ്‌ലിയും ഗംഭീറും രൂക്ഷമായ വാക്പോര് നടത്തിയിരുന്നു. ഇതിൽ കൂടുതൽ വ്യക്തത നൽകിക്കൊണ്ട്, ടീം ഡഗ്ഔട്ടിൽ ഉണ്ടായിരുന്ന ഒരു വ്യക്തി ഇരുവരും സംസാരിച്ച കാര്യങ്ങളെകുറിച്ച് വെളിപ്പെടുത്തിയിരുന്നു. മത്സരശേഷം കൈൽ മെയെഴ്സ് കോഹ്‌ലിയോട്‌ താങ്കൾ എന്തിനാണ് ലഖ്നൗ താരങ്ങളെ ഇത്രകണ്ട് അധിക്ഷേപിക്കുന്നത് എന്ന് ചോദിച്ചു. മയെഴ്‌സിനെ പിന്തിരിപ്പിക്കാനെത്തിയ ഗംഭീർ കോഹ്‌ലിയോട് എന്താണ് താങ്കൾ പറയുന്നത് എന്ന് ചോദിച്ചപ്പോൾ, താൻ മയേഴ്‌സിനോട് സംസാരിക്കുമ്പോൾ എന്തിനാണ് ഇടയിൽ കയറിവന്ന് സംസാരിക്കുന്നത് എന്നാണ് കോഹ്‌ലി മറുപടിനൽകിയത്. ഞാൻ നിങ്ങളോട് ഒന്നും പറഞ്ഞില്ലല്ലോ എന്നും.

അതിനുള്ള മറുപടിയായി ഗംഭീർ പറഞ്ഞത്, താങ്കൾ ഞങ്ങളുടെ ടീമിലെ ഒരംഗത്തെയാണ് അധിക്ഷേപിച്ചത്, അത് ഞങ്ങളുടെ കുടുംബത്തെ അധിക്ഷേപിക്കുന്നത്‌ പോലെയാണ്… എന്നാണ്. അപ്പോൾ കോഹ്‌ലി പറഞ്ഞത്, എന്നാൽ താങ്കൾ താങ്കളുടെ കുടുംബത്തെ സംരക്ഷിക്കൂ… എന്നായിരുന്നു. ഇരുവരെയും പിടിച്ചുമാറ്റുന്ന സമയത്ത് ഗംഭീർ അവസാനമായി പറഞ്ഞത്, എന്നാൽ താങ്കൾതന്നെ അത് ഞങ്ങൾക്ക് പഠിപ്പിച്ചുതരികയെന്നാണ്. സംഭവം നേരിട്ടുകണ്ട ഈ ദൃക്സാക്ഷിയുടെ വെളിപ്പെടുത്തലും ഇപ്പോൾ സമൂഹമാധ്യമങ്ങളിൽ വൈറലായി മാറിയിട്ടുണ്ട്.

ഇന്ന് ഉച്ചകഴിഞ്ഞു നടക്കുന്ന ഐപിഎൽ മത്സരത്തിൽ പോയിന്റ് പട്ടികയിൽ മൂന്നാം സ്ഥാനത്തുള്ള ലഖ്നൗ, ചെന്നൈയെ നേരിടുകയാണ്. മത്സരത്തിൽ ടോസ് നേടിയ ചെന്നൈ നായകൻ മഹേന്ദ്രസിംഗ് ധോണി, ലഖ്നൗവിനെ ബാറ്റിങ്ങിന് അയയ്ക്കുകയായിരുന്നു. ചെന്നൈ നിരയിൽ പരുക്ക് ഭേദമായ പേസർ ദീപക് ചഹാർ, ആകാശ് സിങ്ങിന് പകരം ടീമിൽ മടങ്ങിയെത്തി. ലഖ്നൗ നായകനായ രാഹുലിന് കഴിഞ്ഞ മത്സരത്തിൽ ഫീൽഡിംഗിനിടെ പരുക്കേറ്റ് പുറത്തായിരുന്നു. ഓൾറൗണ്ടർ ക്രുനാൽ പാണ്ഡ്യയാണ് ഇന്ന് അവരെ നയിക്കുന്നത്.

ഇന്ന് മത്സരത്തിലെ ടോസ് സമയത്ത് അവതാരകനായ ഡാനി മോറിസൺ ചെന്നൈ‌‌ നായകനായ ധോണിയോട് വിടവാങ്ങൽ സീസൺ കളിക്കുന്നതിനെകുറിച്ച് ചോദിച്ചിരുന്നു. ലഖ്നൗവിന്റേ ഹോംഗ്രൗണ്ടായ എകന സ്റ്റേഡിയത്തിൽ മുഴുവൻ മഞ്ഞ പുതപ്പിച്ചാണ് ധോണി ഫാൻസ് അദ്ദേഹത്തെ വരവേറ്റത്. ഫാൻസിന്റെ ഈയൊരു സ്വീകരണം വിടവാങ്ങൽ സീസണിൽ എങ്ങനെ തോന്നുന്നു എന്നാണ് അദ്ദേഹം ധോണിയോട് ചോദിച്ചത്.

ഈ സീസണിൽ ഉടനീളം ഈയൊരു പ്രതിഭാസം ദൃശ്യമായിരുന്നു. ചെന്നൈ ചെപ്പോക് സ്റ്റേഡിയത്തിൽ എന്നപോലെ, എവെമത്സരം കളിക്കുന്ന സമയത്തും ചെന്നൈ ടീമിനെ ഗാലറി മുഴുവൻ മഞ്ഞയണിഞ്ഞ് ധോണി ഫാൻസ്, അദ്ദേഹത്തിന്റെ അവസാന സീസൺ ആഘോഷിച്ചുവരികയായിരുന്നു. എന്നാലിപ്പോൾ ധോണി മറുപടി നൽകിയത്, എന്റെ അവസാന സീസൺ എന്ന് നിങ്ങളാണ് പറയുന്നത്; ഞാനല്ല.. എന്നാണ്. ഇതോടെ അടുത്ത സീസണിലും ധോണി കളിക്കുമോ എന്നുള്ള ആകാംഷയിലാണ് ധോണി ഫാൻസ്.

കഴിഞ്ഞദിവസം നടന്ന ഐപിഎൽ മത്സരത്തിനിടെ ഉണ്ടായ പ്രശ്നങ്ങൾ ചില്ലറയല്ല. ഇരു ടീമിന്റെയും താരങ്ങൾ തമ്മിൽ മത്സരശേഷം കൊമ്പ് കോർത്തത് സോഷ്യൽ മീഡിയയിൽ ആരാധകർ ആഘോഷമാക്കിയിരിക്കുകയാണ്. ഈ പ്രവർത്തിയുടെ പേരിൽ ലക്നൗവിന്റെ മെന്ററായ ഗൗതം ഗംഭീറിനും ബാംഗ്ലൂർ സൂപ്പർതാരം വിരാട് കോഹ്ലിക്കും മാച്ച് ഫീസിന്റെ 100% പിഴയൊടുക്കാൻ മാച്ച് റഫറി വിധിച്ചിരുന്നു. ബാംഗ്ലൂർ വിജയത്തിന് ശേഷമാണ് തർക്കങ്ങൾ ഓരോന്നായി ഉടലെടുത്തത്.

താരതമ്യേന കുറഞ്ഞ സ്കോർ മാത്രം ഉയർത്തപ്പെട്ട മത്സരത്തിൽ 18 റൺസിനാണ് ബാംഗ്ലൂർ വിജയം കരസ്ഥമാക്കിയത്. സ്പിന്നിനെ തുണക്കുന്ന പിച്ച് ആയിരുന്നു ലക്നൗവിൽ ക്യൂറേറ്റർമാർ ഒരുക്കിയത്. ആദ്യം ബാറ്റ് ചെയ്ത ബാംഗ്ലൂർ ഉയർത്തിയത് 127 റൺസിന്റെ ചെറിയ വിജയലക്ഷ്യമാണ് എങ്കിലും ലക്‌നൗവിന് കാലിടറി. ലക്നൗ ഇന്നിംഗ്സ് 108 റൺസിന് അവസാനിച്ചു.

മത്സരശേഷം ഗൗതം ഗംഭീറും വിരാട് കോഹ്ലിയും കൊമ്പ് കോർത്തു. ഇതിനുപുറമെ അഫ്ഗാൻ താരമായ നവീൻ ഉൾ ഹക്കും വിരാട് കോഹ്ലിയും ഏറ്റുമുട്ടി. മിക്ക താരങ്ങളും പരസ്പരം സംവാദത്തിലും വാക്ക് തർക്കത്തിനും മത്സരശേഷം ഏറ്റുമുട്ടിയിരുന്നു. ഇതിന് പ്രധാനമായും കാരണമായത് ഈ സീസണിൽ ഇതിനുമുമ്പേ ഇരു ടീമുകളും ഏറ്റുമുട്ടിയ സമയത്ത് സൂപ്പർ ജയനന്റസ് നടത്തിയ അമിത ആഘോഷമായിരുന്നു. ഇതിനൊരു പ്രതികാരം എന്നപോലെയായിരുന്നു ബാംഗ്ലൂർ കഴിഞ്ഞദിവസം ആഘോഷിച്ചത്.

പലതരത്തിലുള്ള പ്രശ്നങ്ങൾ ഇരുടീമുകളും തമ്മിൽ ഉടലെടുത്തപ്പോഴും ഇന്ത്യൻ ടീമിൽ സഹതാരങ്ങളായ വിരാട് കോഹ്ലിയും രാഹുലും തമ്മിൽ സ്നേഹപൂർവ്വമുള്ള സംഭാഷണവും നടന്നു. രാഹുലിന് ബാംഗ്ലൂർ ബാറ്റ് ചെയ്യവേ ഫീൽഡിങ് നടത്തുന്ന ശ്രമത്തിനിടയിൽ പരിക്കേറ്റിരുന്നു. മത്സരശേഷം വിരാട് കോഹ്ലി രാഹുലിന്റെ അടുത്ത് പരിക്കിനെ കുറിച്ച് ചോദിച്ച് ഓക്കെയാണോ എന്ന് വിലയിരുത്താൻ മറന്നില്ല. പ്രശ്നങ്ങൾക്കിടയിലും കോഹ്ലി നടത്തിയ ഈ സംഭാഷണം സോഷ്യൽ മീഡിയയിൽ ശ്രദ്ധ പിടിച്ചു പറ്റുന്നുണ്ട്. ഡാ നീ ഒക്കെ അല്ലേ എന്ന് വിരാട് കോഹ്ലി രാഹുലിന്റെ അടുത്ത് ചോദിക്കുന്ന സംഭാഷണത്തിന്റെ വീഡിയോ ദൃശ്യം കാണാം.

ഇന്നലെ രാത്രി ലഖ്നൗ ഏകന സ്റ്റേഡിയത്തിൽ നടന്ന ബംഗളൂരു-ലഖ്നൗ ഐപിഎൽ മത്സരവും അതിനെത്തുടർന്നുണ്ടായ സംഭവവികാസങ്ങളും ഇപ്പോഴും സമൂഹമാധ്യമങ്ങളിൽ ചർച്ചാവിഷയമായി തുടരുകയാണ്. വേഗം കുറഞ്ഞ പിച്ചിൽ നടന്ന ലോസ്കോറിംഗ് പോരാട്ടത്തിൽ 18 റൺസിനാണ് ബംഗളൂരു, ലഖ്നൗവിനെ കീഴടക്കിയത്. മത്സരത്തിൽ ടോസ് നേടി ആദ്യം ബാറ്റിംഗിനിറങ്ങിയ അവർ നിശ്ചിത 20 ഓവറിൽ 9 വിക്കറ്റ് നഷ്ടത്തിൽ 126 റൺസ് എടുത്തപ്പോൾ, ലഖ്നൗ മറുപടി ബാറ്റിങ്ങിൽ 19.5 ഓവറിൽ 108 റൺസിൽ ഓൾഔട്ടാകുകയായിരുന്നു.

ലഖ്നൗ നിരയിലെ അഫ്ഗാൻ പേസർ നവീൻ ഉൾ ഹഖ്, ബാറ്റിങ്ങിന് ഇടയിൽ വിരാട് കോഹ്‌ലിയുടെ മുഖാമുഖം വരികയും ഇരുവരും പരസ്പരം വാക്കുകൾകൊണ്ട് ഏറ്റുമുട്ടുകയും ചെയ്തു. ലഖ്നൗ ഇന്നിങ്സിലെ പതിനേഴാം ഓവറിൽ ആയിരുന്നു സംഭവം. തുടർന്ന് ഇരുവരെയും പിന്തിരിപ്പിക്കാനെത്തിയ നോൺസ്ട്രൈക്കർ എൻഡിൽ ഉണ്ടായിരുന്ന അമിത് മിശ്രയുടെ നേർക്കായി കോഹ്‌ലിയുടെ ദേഷ്യം. മത്സരം കഴിഞ്ഞിട്ടും തർക്കത്തിന് അറുതിവന്നിരുന്നില്ല.

ടീമംഗങ്ങൾ പരസ്പരം ഹസ്തദാനം ചെയ്യുന്ന സമയത്ത് വീണ്ടുമൊരിക്കൽകൂടി കോഹ്‌ലി – നവീൻ വാക്പോര് രൂക്ഷമായിരുന്നു. അതിനു ശേഷം കോഹ്‌ലിയോട് സംസാരിക്കാനെത്തിയ കൈൽ മെയേഴ്സിനെ പിന്തിരിപ്പിച്ചു കൊണ്ടുപോകുകയായിരുന്ന ലഖ്നൗ പരിശീലകൻ ഗൗതം ഗംഭീറും കോഹ്‌ലിയും തമ്മിലായി സംഘർഷം. ഒടുവിൽ ഏറെ പണിപ്പെട്ടാണ് സഹതാരങ്ങളും കോച്ചിംഗ് സ്റ്റാഫും ചേർന്ന് രംഗം ശാന്തമാക്കിയത്. ഇതിനുമുൻപ് 2013 ഐപിഎൽ സീസണിലും കോഹ്‌ലിയും ഗംഭീറും മുഖാമുഖം വന്നിരുന്നു.

ഇതിനെല്ലാമിടയിലും വിരാട് കോഹ്‌ലിയ്‌ക്ക് ലഖ്നൗവിൽ തടിച്ചുകൂടിയ ആയിരക്കണക്കിനു ആരാധകരിൽനിന്നും വളരെ മികച്ച പിന്തുണയാണ് ലഭിച്ചിരുന്നത്. അതിനെ സാധൂകരിക്കുന്ന ഒരു വീഡിയോ ഇപ്പോൾ ഇന്റർനെറ്റിൽ തരംഗമായി മാറിയിരിക്കുകയാണ്. മത്സരശേഷമുള്ള പോസ്റ്റ് മാച്ച് പ്രസന്റേഷൻ സമയത്തെ ഒരു നിമിഷമാണിത്. മത്സരത്തിലെ ഗെയിംചെയിഞ്ചർ അവാർഡ് ഏറ്റുവാങ്ങാൻ 3 വിക്കറ്റ് വീഴ്ത്തിയ ലഖ്നൗ പേസർ നവീൻ ഉൾ ഹഖ് എത്തിയ നിമിഷം, ഗാലറിയിൽനിന്നും കേട്ടത് കോഹ്‌ലി… കോഹ്‌ലി… എന്ന് ആർപ്പുവിളിക്കുന്ന ഫാൻസിന്റെ ബഹളമായിരുന്നു.

ഇന്നലെ ലഖ്നൗവിൽ നടന്ന ആവേശപോരാട്ടത്തിൽ ബംഗളൂരു റോയൽ ചലഞ്ചേഴ്സ്, 18 റൺസിന് ലഖ്നൗ സൂപ്പർ ജയന്റ്‌സിനെ കീഴടക്കിയിരുന്നു. മത്സരത്തിൽ ടോസ് നേടി ആദ്യം ബാറ്റ് ചെയ്ത ബംഗളൂരു ഓപ്പണർമാരായ വിരാട് കോഹ്‌ലിയുടെയും(30 പന്തിൽ 31), നായകൻ ഡു പ്ലെസ്സിയുടെയും(40 പന്തിൽ 44) മികവിൽ നിശ്ചിത 20 ഓവറിൽ 9 വിക്കറ്റ് നഷ്ടത്തിൽ 126 റൺസ് എടുത്തു. കൃത്യമായ ഇടവേളകളിൽ വിക്കറ്റ് വീഴ്ത്തിയ ബംഗളൂരു ബോളർമാർക്കു മുന്നിൽ പതറിയ ലഖ്നൗ ബാറ്റിംഗ് നിര, 19.5 ഓവറിൽ 108 റൺസിൽ ഓൾഔട്ടാകുകയായിരുന്നു.

ഇതിനുമുൻപ് ഈ സീസണിൽ ബംഗളൂരു ചിന്നസ്വാമി സ്റ്റേഡിയത്തിൽ ഇരുടീമുകളും ഏറ്റുമുട്ടിയപ്പോൾ ലഖ്നൗവാണ് വിജയിച്ചിരുന്നത്. അന്ന് ബംഗളൂരു ഉയർത്തിയ 213 റൺസ് വിജയലക്ഷ്യം ഒരു വിക്കറ്റ് ശേഷിക്കെ അവസാന പന്തിൽ മറികടന്ന ലഖ്നൗ, ചിന്നസ്വാമിയെ അക്ഷരാർഥത്തിൽ നിശബ്ദമാക്കിയിരുന്നു. അതിനുള്ള പകരംവീട്ടലായി ബംഗളൂരുവിന് ഇന്നലെത്തെ വിജയം. നായകൻ ഫാഫ്‌ ഡു പ്ലസ്സിയാണ് കളിയിലെ താരമായി തിരഞ്ഞെടുക്കപ്പെട്ടത്. വിജയത്തിനായി വീറും വാശിയും നിറഞ്ഞ പോരാട്ടത്തിൽ ഇരുടീമുകളിലേയും താരങ്ങൾ പരസ്പരം വാക്കുകൾകൊണ്ട് ഏറ്റുമുട്ടുന്ന അനേകം നിമിഷങ്ങൾ മത്സരത്തിനിടയിലും മത്സരശേഷവും അരങ്ങേറിയിരുന്നു.

ലഖ്നൗ ബാറ്റിങ്ങിന് ഇടയിൽ നവീൻ ഉൾ ഹഖ്, വിരാട് കോഹ്‌ലിയുമായി തർക്കത്തിൽ ഏർപ്പെടുകയും മത്സരശേഷമുള്ള ഹസ്തദാനസമയത്തും ഇരുവരും വീണ്ടും ഏറ്റുമുട്ടുകയും ചെയ്തിരുന്നു. അതിനുശേഷം ലഖ്നൗ ഓപ്പണർ കൈൽ മേയേഴ്‌സ്‌, കോഹ്‌ലിയോട് സംസാരിക്കുകയും അതിന്റെ തുടർച്ചയായി ലഖ്നൗ പരിശീലകൻ ഗൗതം ഗംഭീറും വിരാട് കോഹ്‌ലിയും പരസ്പരം നടന്നടുക്കുന്നതും വാക്കുതർക്കത്തിൽ ഏർപ്പെടുന്നതും സമൂഹമാധ്യമങ്ങളിൽ തരംഗമായി മാറിയിരിക്കുകയാണ്.

അത് മാത്രമല്ല, ഇപ്പോൾ മറ്റൊരു വീഡിയോ കൂടി ശ്രദ്ധേയമാകുന്നുണ്ട്. ലഖ്നൗ ബാറ്റിങ്ങിൽ നവീൻ ഉൾ ഹഖ് ബാറ്റ് ചെയ്യുന്ന സമയം. പതിനേഴാം ഓവർ എറിഞ്ഞത് പേസർ മുഹമ്മദ് സിറാജ്. അവസാന പന്തിൽ സിറാജ് മികച്ചൊരു യോർക്കർ എറിയുമ്പോൾ നവീന് കാര്യമായി ഒന്നും ചെയ്യാൻ കഴിയുന്നില്ല. പന്ത് വിക്കറ്റ് കീപ്പർ എടുക്കുന്നതിന് മുൻപായി അദ്ദേഹം ഒരു സിംഗിൾ നേടാൻ ശ്രമിക്കുന്നു. എങ്കിലും അതിനു കഴിയാതെ തിരികെ ക്രീസിൽ നിൽക്കുന്ന സമയത്ത് സിറാജ് അങ്ങോട്ട് നടന്നടുക്കുന്നു. കീപ്പർ ദിനേശ് കാർത്തിക് വിക്കറ്റിലേക്ക് എറിഞ്ഞ പന്ത് കൈക്കലാക്കി അല്പനേരം രൂക്ഷമായി നവീനെ നോക്കി നിന്ന സിറാജ്, ഒടുവിൽ പന്തെടുത്ത് വിക്കറ്റിലേക്ക് ഒരേറു വച്ചുകൊടുത്തുകൊണ്ടാണ് മടങ്ങുന്നത്.