Category: Latest News

ഈ ടി20 ലോകകപ്പ് അപൂർവമായ  പിഴകൾക്ക് വേദിയായി മാറിയിരിക്കുകയാണ്. കഴിഞ്ഞ ദിവസം പന്ത് പിടിക്കുന്നതിനിടെ കൈയിൽ നിന്ന് വീണ ഗ്ലൗവിൽ കൊണ്ടത് കാരണം സൗത്താഫ്രിക്കയ്ക്ക് 5 റൺസ് വഴങ്ങേണ്ടി വന്നിരുന്നു. ഇപ്പോഴിതാ  സൗത്താഫ്രിക്കയുമായുള്ള  മത്സരത്തിൽ മറ്റൊരു അപൂർവമായ രീതിയിൽ ബംഗ്ലാദേശിന് 5 റൺസ് പിഴ വഴങ്ങേണ്ടി വന്നിരിക്കുകയാണ്.

ശാഖിബുൽ ഹസൻ എറിഞ്ഞ 11ആം ഓവറിലാണ് സംഭവം. സ്‌ട്രൈക്കിൽ ഉണ്ടായിരുന്ന റൂസ്സോയ്ക്ക് പന്തെറിയുന്നതിനിടെ വിക്കറ്റ് കീപ്പർ നൂറുൽ ഹസൻ നീങ്ങിയതാണ് പിഴ ലഭിക്കാൻ കാരണം. വിക്കറ്റിന് തൊട്ട് അരികിൽ ഉണ്ടായിരുന്ന ഹസൻ പന്ത് എത്തുന്നതിന് മുമ്പായി പിറകോട്ട് നീങ്ങുകയായിരുന്നു.

അമ്പയർ റോഡ് ടക്കർ ഇക്കാര്യം ശ്രദ്ധിക്കുകയും പിന്നാലെ മറ്റെ അമ്പയറുമായി ചർച്ച ചെയ്ത് 5 റൺസ് പിഴയായി നൽകുകയും ചെയ്തു.
ഐസിസി നിയമപ്രകാരം ബൗളര്‍ പന്തെറിയാന്‍ റണ്ണപ്പ് തുടങ്ങി കഴിഞ്ഞാല്‍ വിക്കറ്റ് കീപ്പര്‍ അനങ്ങാൻ പാടില്ല. ഇത് ലംഘിച്ചതിനാണ് ബംഗ്ലാദേശിന് പണി കിട്ടിയത്. 

മത്സരത്തിൽ സൗത്താഫ്രിക്ക 104 റൺസിന്റെ കൂറ്റൻ ജയമാണ് നേടിയത്. ആദ്യം ബാറ്റ് ചെയ്ത സൗത്താഫ്രിക്ക റൂസ്സോയുടെ സെഞ്ചുറി കരുത്തിൽ 205 റൺസ് നേടിയിരുന്നു. 56 പന്തിൽ 8 സിക്‌സും 7 ഫോറും സഹിതം 109 റൺസാണ് റൂസ്സോ അടിച്ചു കൂട്ടിയത്. 38 പന്തിൽ 63 റൺസ് നേടി ഡികോകും മികച്ച പിന്തുണയാണ് രണ്ടാം വിക്കറ്റിൽ നൽകിയത്.

മറുപടി ബാറ്റിങ്ങിൽ ബംഗ്ലാദേശിന് 101 റൺസ് മാത്രമാണ് നേടാനായത്. സൗത്താഫ്രിക്കൻ ബൗളർമാർ 10 വിക്കറ്റും എറിഞ്ഞു വീഴ്ത്തി. നോർജെ 4 വിക്കറ്റും ശംസി 3 വിക്കറ്റും നേടി. 31 പന്തിൽ 34 റൺസ് നേടിയ ലിട്ടന് ദാസാണ് ടോപ്പ് സ്‌കോറർ.

നെതർലൻഡിന് എതിരായ മത്സരത്തിൽ ടോസ് നേടി ബാറ്റിങ് തിരഞ്ഞെടുത്ത ഇന്ത്യ നിശ്ചിത 20 ഓവറിൽ 2 വിക്കറ്റ് നഷ്ട്ടത്തിൽ 179 റൺസ് നേടി. രാഹുൽ ഒഴികെ ബാറ്റ് ചെയ്തവരെല്ലാം മികച്ച പ്രകടനമാണ് കാഴ്ച്ചവെച്ചത്. രോഹിത് (39 പന്തിൽ 53), കോഹ്ലി (44 പന്തിൽ 62), സൂര്യകുമാർ യാദവ് (25 പന്തിൽ 51) മൂന്നുപേരും ഇന്ത്യയ്ക്കായി ഫിഫ്റ്റി നേടിയിട്ടുണ്ട്.

മൂന്നാം ഓവറിലെ നാലാം പന്തിൽ കെഎൽ രാഹുലിനെ എൽബിഡബ്ല്യൂവിലൂടെ പുറത്താക്കി പോൾ ഇന്ത്യയുടെ ആദ്യ വിക്കറ്റ് വീഴ്ത്തിയിരുന്നു. അമ്പയറിന്റെ വിധി റിവ്യു ചെയ്യാതെ മടങ്ങിയതാണ് രാഹുലിന് വിനയായത്. പിന്നീട് നടന്ന പരിശോധനയിൽ സ്റ്റംപിൽ പന്ത് കൊണ്ടിട്ടില്ലെന്ന് വ്യക്തമായിരുന്നു.

ശേഷം ക്രീസിൽ എത്തിയ കോഹ്ലിയെയും കൂട്ടുപിടിച്ച് രോഹിത് രണ്ടാം വിക്കറ്റിൽ 73 റൺസ് കൂട്ടിച്ചേർത്തു. ഫിഫ്റ്റി നേടിയതിന് പിന്നാലെ രോഹിത് ക്യാച്ചിലൂടെ പുറത്താവുകയായിരുന്നു. നാലാമനായി എത്തിയ സൂര്യകുമാറും കോഹ്ലിയും ചേർന്നാണ് ഇന്ത്യൻ സ്‌കോർ പിന്നീട് 179ൽ എത്തിച്ചത്. 95 റൺസിന്റെ പാർട്ണർഷിപ്പാണ് ഇരുവരും കെട്ടിപടുത്തത്.

കോഹ്ലിയും രോഹിതും വലിയ സ്ട്രൈക് റേറ്റിൽ ബാറ്റ് ചെയ്യാൻ ബുദ്ധിമുട്ടിയ പിച്ചിൽ സൂര്യകുമാർ യാദവ് 204 സ്‌ട്രൈക് റേറ്റിൽ 1 സിക്‌സും 7 ഫോറും ഉൾപ്പെടെ 51 റൺസ് നേടി. സൂര്യകുമാർ യാദവിന്റെ വെടിക്കെട്ട് ഇന്നിങ്‌സാണ് ഇന്ത്യയെ മികച്ച സ്കോറിൽ എത്തിച്ചത്.

അവസാന പന്തിൽ സിക്സ് നേടിയാണ് സൂര്യകുമാർ ഫിഫ്റ്റി പൂർത്തിയാക്കിയത്.
ബാക്ക്വാർഡ് സ്ക്വയർ ലെഗിലൂടെ ഫ്ലിക്ക് ചെയ്യുകയായിരുന്നു. മറുവശത്ത് ഉണ്ടായിരുന്ന കോഹ്ലി വലിയ ആവേശത്തോടെയാണ് സൂര്യകുമാർ യാദവിന്റെ ഫിഫ്റ്റി ആഘോഷമാക്കിയത്.

പാകിസ്ഥാനെതിരായ മത്സരത്തിന് പിന്നാലെ നെതർലൻഡിനെതിരെയും ബാറ്റിങ്ങിൽ നിരാശപ്പെടുത്തി കെഎൽ രാഹുൽ. പാകിസ്ഥാനെതിരെ 4 റൺസ് മാത്രം നേടി പുറത്തായ രാഹുൽ വൻ വിമർശനത്തിന് ഇരയായിരുന്നു. വമ്പൻ മത്സരങ്ങളിൽ പരാജയമെന്ന് ചൂണ്ടിക്കാട്ടിയായിരുന്നു വിമർശനം.

ഇന്ന് സിഡ്‌നിയിൽ നടന്നുകൊണ്ടിരിക്കുന്ന മത്സരത്തിൽ നെതർലൻഡിനെതിരെ രാഹുൽ വലിയ സ്‌കോർ നേടുമെന്ന് പ്രതീക്ഷിച്ചെങ്കിലും 9 റൺസിൽ പുറത്തായിരിക്കുകയാണ്. എന്നാൽ ഔട്ട് അല്ലാതിരുന്ന എൽബിഡബ്ല്യൂവിൽ അമ്പയരുടെ വിധി അനുസരിച്ച് ഗ്രൗണ്ട് വിട്ടതാണ് വിനയായത്. അമ്പയർ ഉടനെ ഔട്ട് വിളിച്ചതോടെ റിവ്യു നൽകാൻ കൂട്ടാക്കാതെ രാഹുൽ മടങ്ങുകയായിരുന്നു.

നോൺ സ്‌ട്രൈക് എൻഡിൽ ഉണ്ടായിരുന്ന ക്യാപ്റ്റൻ രോഹിത് റിവ്യു എടുക്കാൻ രാഹുലിനോട് പറഞ്ഞിരുന്നുവെങ്കിലും രാഹുൽ വേണ്ടെന്ന് വെക്കുകയായിരുന്നു. പിന്നാലെ ബോൾ ട്രാക്കിങ്ങിൽ പന്ത് സ്റ്റംപിൽ കൊള്ളാതെയാണ് കടന്ന് പോയതെന്ന് വ്യക്തമായത്.

അതേസമയം ഇന്ത്യൻ ഇന്നിംഗ്സ് 7 ഓവർ പിന്നിട്ടപ്പോൾ 38/1 എന്ന നിലയിലാണ് ഇന്ത്യ. രോഹിതും (20 പന്തിൽ 20) കോഹ്ലിയുമാണ് (10 പന്തിൽ 8) ക്രീസിൽ. പോൾ വൻ മീകറനാണ് രാഹുലിന്റെ വിക്കറ്റ് ലഭിച്ചത്. പാകിസ്ഥാനെതിരെ കളിച്ച അതേ ടീമുമായി തന്നെയാണ് ഇന്ത്യ ഇന്നിറങ്ങിയത്.

വീഡിയോ കാണാം:

ടി20 ലോകക്കപ്പിൽ ഇംഗ്ലണ്ടിനെ 5 റൺസിന് പരാജയപ്പെടുത്തി അയർലൻഡ്. മഴ വില്ലനായി എത്തിയതോടെ ഡക്ക് വർത്ത് ലൂയിസ് നിയമപ്രകാരം 5 റൺസിന്റെ ജയം അയർലൻഡിനെ തേടിയെത്തുകയായിരുന്നു.
ആദ്യം ബാറ്റ് ചെയ്ത അയർലൻഡ് 10 വിക്കറ്റ് നഷ്ട്ടത്തിൽ 157 റൺസ് നേടിയിരുന്നു. മറുപടി ബാറ്റിങ്ങിന് ഇറങ്ങിയ ഇംഗ്ലണ്ടിന് തുടക്കം തകർച്ചയോടെയായിരുന്നു.

ആദ്യ ഓവറിലെ രണ്ടാം പന്തിൽ തന്നെ ക്യാപ്റ്റൻ ജോസ് ബട്ട്ലറെ പൂജ്യത്തിൽ മടക്കി. ജോഷുവ ലിറ്റ്ലിന്റെ പന്തിൽ വിക്കറ്റ് കീപ്പർക്ക് ക്യാച്ച് നൽകുകയായിരുന്നു. പിന്നാലെ മൂന്നാം ഓവറിലെ നാലാം പന്തിൽ ഹെയ്ൽസ് മടങ്ങി. 5 പന്തിൽ 7 റൺസ് നേടിയിരുന്നു. ആറാം ഓവറിലെ ആദ്യ പന്തിൽ 6 റൺസ് നേടിയ സ്റ്റോക്സും ബൗൾഡ് ആയതോടെ ഇംഗ്ലണ്ട് പരുങ്ങലിലായി. 3ന് 29 എന്ന നിലയിലായി ഇംഗ്ലണ്ട്. 

നാലാം വിക്കറ്റിൽ മലാനും ബ്രുകും ചേർന്ന് ഇംഗ്ലണ്ട് സ്‌കോർ 67ൽ എത്തിച്ചു. ബ്രുക്കിനെ ക്യാച്ചിൽ കുടുക്കി അയർലൻഡ് ആ കൂട്ടുകെട്ടിന് അന്ത്യം കുറിച്ചു. ഇംഗ്ലണ്ട് സ്‌കോർ 86ൽ വെച്ച് മലാനും മടങ്ങി. 14.3 ഓവറിൽ 5ന് 105 എന്ന നിലയിൽ ഇംഗ്ലണ്ട് ബാറ്റ് ചെയ്യവെയാണ് മഴ വില്ലനായി എത്തിയത്. നേരെത്തെ മഴക്കാരണം വൈകിയാണ് മത്സരം ആരംഭിച്ചത്. ഇനിയും കളി മുമ്പോട്ട്  കൊണ്ട് പോകാൻ കഴിയില്ലെന്ന് ഉറപ്പിച്ചതോടെ ഡക്ക് വർത്ത് ലൂയിസ് നിയമപ്രകാരം 5 റൺസിന് അയർലൻഡ് ജയം നേടുകയായിരുന്നു.

നേരെത്തെ അയർലൻഡിന് വേണ്ടി ക്യാപ്റ്റൻ ബൽബിർനി 47 പന്തിൽ 62 റൺസ് നേടിയിരുന്നു. 27 പന്തിൽ 34 റൺസ് നേടിയ ടകറും മികച്ച് നിന്നു. ഇരുവരുടെയും രണ്ടാം വിക്കറ്റിലെ 82 റൺസ് കൂട്ടുകെട്ടാണ് അയർലൻഡിനെ മികച്ച സ്കോറിലേക്ക് നയിച്ചത്. ഇംഗ്ലണ്ടിന് വേണ്ടി മാർക്ക് വുഡും ലിവിങ്സ്റ്റനും 3 വിക്കറ്റ് വീതം വീഴ്ത്തിയിട്ടുണ്ട്.

ശ്രീലങ്കയ്ക്കെതിരായ ജയത്തോടെ ടി20 ലോകക്കപ്പിലെ ആദ്യ ജയം സ്വന്തമാക്കിയിരിക്കുകയാണ് ഓസ്‌ട്രേലിയ. ആദ്യ മത്സരത്തിൽ ന്യുസിലാൻഡിനോട്  ഓസ്‌ട്രേലിയ പരാജയപ്പെട്ടിരുന്നു. പെർത്തിൽ നടന്ന മത്സരത്തിൽ 158 വിജയലക്ഷ്യവുമായി ബാറ്റിങ്ങിന് ഇറങ്ങിയ ഓസ്‌ട്രേലിയ 21 പന്തുകൾ ബാക്കി നിൽക്കെ 3 വിക്കറ്റ് നഷ്ട്ടത്തിൽ മറികടന്നു.

18 പന്തിൽ 6 സിക്‌സും 4 ഫോറും ഉൾപ്പെടെ 58 റൺസ് നേടിയ സ്റ്റോയ്നിസാണ് ടോപ്പ് സ്‌കോറർ. ഒരു ബൗണ്ടറി പോലും നേടാതെ പവർ പ്ലേ പിന്നിട്ട ഓസ്‌ട്രേലിയ 13 ഓവറിൽ 3ന് 97 എന്ന നിലയിലായിരുന്നു. മാക്‌സ്വെൽ പുറത്തായതിന് ആ ഓവറിൽ ക്രീസിൽ എത്തിയ സ്റ്റോയ്നിസിന്റെ അഴിഞ്ഞാട്ടമാണ് പിന്നീട് കണ്ടത്.

ഹസരങ്ക എറിഞ്ഞ 15ആം ഓവറിൽ 19 റൺസും തൊട്ടടുത്ത ഓവറിൽ തീക്ഷ്ണയ്ക്കെതിരെ 20 റൺസുമാണ് അടിച്ചു കൂട്ടിയത്. 36 പന്തിൽ 50 വേണ്ടിയിരുന്ന ഓസ്‌ട്രേലിയയെ 15 പന്തിൽ ലക്ഷ്യത്തിലേക്ക് എത്തിച്ചു. 42 പന്തിൽ 31 റൺസ് നേടിയ ഫിഞ്ച് പുറത്താകാതെ നിന്നു.

വാർണർ (10 പന്തിൽ 11), മിച്ചൽ മാർഷ് (17 പന്തിൽ 17), മാക്സ്വെൽ (12 പന്തിൽ 23) എന്നിവരുടെ വിക്കറ്റുകളാണ് ഓസ്‌ട്രേലിയയ്ക്ക് നഷ്ട്ടമായത്. ശ്രീലങ്കൻ ബൗളിങ് നിരയിൽ 3 ഓവറിൽ വിക്കറ്റ് ഒന്നും നേടാതെ 53 റൺസ് വഴങ്ങിയ ഹസരങ്ക പാടെ നിരാശപ്പെടുത്തി. ആദ്യം ബാറ്റ് ചെയ്ത ശ്രീലങ്കയ്ക്ക് വേണ്ടി നിസ്സങ്ക (40), അസലങ്ക (38) എന്നിവർ തിളങ്ങി.

വീഡിയോ കാണാം:

പാകിസ്ഥാനെതിരായ വാശിയേറിയ പോരാട്ടത്തിൽ  ഇന്ത്യ പരാജയപ്പെട്ടിരുന്നുവെങ്കിൽ ഏറ്റവും വിമർശനം ഏറ്റുവാങ്ങേണ്ടി വരുമായിരുന്ന താരങ്ങളിൽ ഒരാളാണ് ദിനേശ് കാർത്തിക്. അവസാന ഓവറിൽ ഹർദിക് പാണ്ഡ്യ പുറത്തായതിന് പിന്നാലെ ക്രീസിൽ എത്തിയ കാർത്തികായിരുന്നു 2 പന്തിൽ 2 റൺസ് വേണമെന്നപ്പോൾ സ്‌ട്രൈകിൽ ഉണ്ടായിരുന്നത്. നവാസിന്റെ വൈഡ് ഡെലിവറി സ്വീപിന് ശ്രമിച്ച് സ്റ്റംപിങിലൂടെ പുറത്താവുകയായിരുന്നു. ഇതോടെ ലക്ഷ്യം 1 പന്തിൽ 2 റൺസ് എന്നതിലേക്ക് മാറി.

എന്നാൽ തുടർന്ന് ക്രീസിൽ എത്തിയ അശ്വിൻ സമാന രീതിയിലുള്ള ഡെലിവറി വൈഡ് ആക്കി മാറ്റി, തൊട്ടടുത്ത ഡെലിവറി സിംഗിൾ നേടി ജയിപ്പിക്കുകയായിരുന്നു. ദിനേശ് കാർത്തിക്കിന്റെ അശ്രദ്ധമായ ബാറ്റിങ് ആരാധകരെ ചൊടിപ്പിച്ചിരുന്നുവെങ്കിലും വമ്പൻ ജയത്തിന് പിന്നാലെ വിമർശനം ഏറ്റു വാങ്ങാതെ കാർത്തിക് രക്ഷപ്പെട്ടു.

തന്നെ വിമർശനങ്ങളിൽ നിന്ന് രക്ഷിച്ച അശ്വിനോട് നന്ദി പറയാനും മറന്നില്ല. അടുത്ത മത്സരത്തിനായി ഇന്ത്യൻ ടീം അംഗങ്ങൾ സിഡ്‌നിയിലേക്ക് പോകുന്ന ദൃശ്യങ്ങൾ ബിസിസിഐ പങ്കുവെച്ചിരുന്നു. ഈ വിഡിയോയിൽ എയർപോർട്ടിൽ വെച്ച് ചിരിയോടെ കാർത്തിക് അശ്വിനോട് നന്ദി പറയുന്നത് കാണാം.

ഇന്ത്യയുടെ അടുത്ത മത്സരം നെതർലൻഡ്സിനോടാണ്. വ്യാഴാഴ്ച സിഡ്‌നി ഗ്രൗണ്ടിൽ വെച്ച് ഇരു ടീമും ഏറ്റുമുട്ടും. പിന്നാലെ 30ന് സൗത്താഫ്രിക്കയ്ക്കെതിരെയും നവംബർ 2ന് ബംഗ്ലാദേശിന് എതിരെയുമാണ്. ഗ്രൂപ്പ് ഘട്ടത്തിലെ അവസാന മത്സരം സിംബാബ്‌വെയ്ക്കെതിരെയാണ്. നവംബർ 6ന് മെൽബണിൽ വെച്ചാണ്.